अरुण तेस्रो आयोजनामा कार्यरत मजदुरको मृत्यु- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

अरुण तेस्रो आयोजनामा कार्यरत मजदुरको मृत्यु

रासस

संखुवासभा — संखुवासभामा निर्माणाधीन ९०० मेगावाट क्षमताको अरुण तेस्रो जलविद्युत् आयोजनामा कार्यरत एक मजदुरको मृत्यु भएको छ । चिचिला गाउँपालिका–३ सोलाखानीस्थित अडिट ३ मा कार्यरत भारतको मध्यप्रदेशका ४५ वर्षीय मुगेरीलाल सिंहको मृत्यु भएको प्रहरी नायब उपरीक्षक लालध्वज सुवेदीले जानकारी दिए । 

फाइल तस्बिर ।


गए राति सुरुङभित्र काम गर्ने क्रममा ढुंगाले लागेर भारतीय मजदुर सिंह घाइते भएका थिए । उनको उपचारका क्रममा जिल्ला अस्पतालमा मृत्यु भएको हो । घटनाबारे वास्तविकता पत्ता लगाउन प्रहरी घटनास्थलमा गएको प्रमुख जिल्ला अधिकारी नुरहरि खतिवडाले बताए । सुरुङभित्र काम गर्न जोखिम हुने गरेपनि आयोजनाले सुरक्षा सामग्री उपलब्ध नगराएको मजदुरको गुनासो छ ।

अरुण तेस्रो जलविद्युत् आयोजनास्थलमा अस्पताल नहुँदा मजदुरलाई समस्या भएको छ । हाल उक्त आयोजनामा नेपाली र भारतीय गरी झण्डै तीन हजार मजदुर कार्यरत छन् । काम गर्दा चोटपकट लागे वा बिरामी भए मजदुरलाई टाढाको अस्पताल लैजानुपर्ने बाध्यता छ । समय–समयमा स्वास्थ्य परीक्षण गर्नुपर्ने उनीहरुको माग छ ।

प्रकाशित : मंसिर १६, २०७८ १३:५९
प्रतिक्रिया
पठाउनुहोस्

पेस्की लिए पनि पुल अधुरै

३ वर्षयता ४४ लाख रूपैयाँ पेस्की लिए पनि दुइटा पिलर मात्र निर्माण
भूषण यादव

वीरगन्ज — पर्साको धोबीनी गाउँपालिका–१ घोरदाउरा टोलस्थित ओरिया खोलामा झोलुंगे पुल निर्माणका लागि उपभोक्ता समितिले दुई पटक गरी ४४ लाख रुपैयाँ पेश्की लिइसकेको छ । ३ वर्षअगाडि नै पेस्की लिए पनि हालसम्म दुइटा अधुरो पिलर मात्र निर्माण भएको छ । 

८ महिनाभित्र पुल बनाउन गाउँपालिका र समितिबीच २०७५/०७६ मा सम्झौता भएको थियो । गाउँपालिकाका अनुसार कुल बजेट ९५ लाख ९७ हजारमध्येबाट ४४ लाख रुपैयाँ पेस्की उपभोक्ता समितिले लिए पनि करिब ८ लाख रुपैयाँ मात्र खर्च भएको छ । तर, समितिको खाताबाट सबै पैसा झिकिएको छ ।

ओरिया खोलामा पुल नहुँदा घोरदाउराका बासिन्दा वर्षात्को समयमा भारतको बाटो प्रयोग गरी नेपाली बजार पुग्ने गरेका छन् । घोरदाउरा निवासी अच्छेलाल ठाकुरले भारतीय गाउँ इनरवा, खनिया, दसौता हुँदै नेपाली गाउँमा जानुपर्ने बाध्यता रहेको बताउँछन् । ‘वर्षातमा धेरै समस्या हुन्छ,’ उनले भने, ‘३ वर्ष अगाडि नै पुल निर्माण सुरु भएको थियो । तर, सुरुमा जुन काम भयो त्यसपछि ठप्प छ ।’

महालेखा परीक्षकको आर्थिक वर्ष २०७६/०७७ को प्रतिवेदनले सम्झौता अवधिसम्म काम नसकिएकोले ब्याजसमेत लगाई असुल गर्न गाउँपालिकालाई निर्देशन दिएको छ । सम्झौताअनुसार ८ महिनामा पुल निर्माण गर्नुपर्नेमा हालसम्म १० प्रतिशत पनि काम नभएको प्रतिवेदनमा उल्लेख छ । गाउँपालिकाले मंसिर ९ मा उपभोक्ता समितिलाई काम सम्पन्न भएको बिल बुझाउन वा ब्याजसमेत गरी ५१ लाख ३८ हजार रुपैयाँ दाखिला गर्न पत्राचार गरेको छ ।

प्रमुख प्रशासकीय अधिकृत राजुप्रसाद साहले पुल निर्माणमा अनियमितता भएको बताए । ‘पेस्की रकम पुल निर्माणमा खर्च गरिएको छैन,’ उनले भने, ‘अनुसन्धान गरी नियमानुसार कारबाही गरिनेछ ।’ उपभोक्ता समितिका अध्यक्ष सुरेशप्रसाद कुर्मीले पेस्की रकमबारे जानकारी नभएको बताए । ‘गाउँपालिकाबाट कति पेस्की भुक्तानी भयो र कति निकासा भयो त्यसबारे मलाई कुनै जानकारी छैन,’ उनले भने ।

गाउँपालिका प्रमुख सुरेश कुर्मीका निकट मानिने लालबाबुले खाली चेकमा हस्ताक्षर गरी लिएको उनको भनाइ छ । गाउँपालिका प्रमुख कुर्मीले एक/दुई दिनमै काम पुनः सुरु हुने दाबी गरे । ‘प्राविधिकसँग भएको सम्झौताअनुसार रकम दिइएको छ । अरू सामान खरिदका लागि टेन्डर आह्वान गर्न भनेको छु,’ उनले भने ।

सार्वजनिक खरिद नियमावली २०६४ को नियम ९७(५) मा उपभोक्ता समिति तथा लाभग्राही समुदायबाट काम गराउँदा सम्झौता रकमको बढीमा एक तिहाइ रकमसम्मको अग्रिम रूपमा पेस्की दिन सक्ने व्यवस्था छ । घोरदाउरामा नियमानुसार सम्झौत रकमको एक तिहाइ ३२ लाख पेस्की दिन मिल्नेमा ४४ लाख रुपैयाँ दिइएकाले नियमसम्मत नभएको महालेखाको प्रतिवेदनमा उल्लेख छ ।

प्रकाशित : मंसिर १६, २०७८ १३:५८
पूरा पढ्नुहोस्
प्रतिक्रिया
पठाउनुहोस्
x
×