बैंक लुटेको रकमसहित ७ भारतीय डेढ महिनादेखि बिहारमै लुकिछिपी- प्रदेश १ - कान्तिपुर समाचार

बैंक लुटेको रकमसहित ७ भारतीय डेढ महिनादेखि बिहारमै लुकिछिपी

जितेन्द्र साह

विराटनगर — डेढ महिनाअघि सीमावर्ती मोरङको धनपालथान गाउँपालिका–४ स्थित कर्सियाको बीपी चोकको सिटीजन्स बैंकको शाखाबाट लुटेको २४ लाख ८५ हजार ३ सय ९३ रुपैया“सहित फरार ७ भारतीय नागरिक अझै पक्राउ परेका छैनन् ।

प्रहरीको अनुसन्धान अनुसार उनीहरू भारत बिहारको अररियामा लुकेर बसेका छन् । लुटलगत्तै पक्राउका मुख्य योजनाकार विराटनगर–८, बलुवाहीका ३२ वर्षीय श्याम मुखियासहित तीन र केही दिनपछि पक्राउ परेका एक जनामाथि अझै अनुसन्धान जारी छ ।

‘यो संगठित अपराध भएकोले हद म्याद बाँकी छ,’मोरङ प्रहरीका अनुसन्धान अधिकृत डिएसपी दीपक श्रेष्ठले भने,‘ संगठित अपराध निवारण ऐन अन्तर्गत यस्तो कसुरमा पटकपटक गरी ६० दिन सम्म अनुसन्धान म्याद लिन सकिन्छ ।’

उनका अनुसार हालसम्मको अनुसन्धानमा एक नेपालीसहित ११ जनाको संलग्नता रहेको खुलासा भएको छ जसमध्ये मुख्य योजनाकार नेपाली र तीन भारतीय पक्राउ परिसकेका छन् । सीसीटीभी फूटेजबाट पक्राउ परेकाहरुको कसुर प्रमाणित भइसकेको र उनीहरुले पनि स्वीकारेको डिएसपी श्रेष्ठले बताए । प्रहरीका अनुसार लुटमा संलग्न विरुद्ध संगठित अपराध, ज्यान मार्ने उद्योग, डा“का, हातहतियार एवं खरखजाना तथा लागूऔषधमा मुद्दा चलाइनेछ ।

रकमसहित फरार ७ भारतीय लुटेराको खोजी भइरहेको प्रहरीले जनाएको छ । प्रहरीका अनुसार सीसीटीभी फुटेज र सोधपुछमा बाँकी लुटेराहरु बारे खुलासा भएको हो । प्रहरीका अनुसार एक बैंक कर्मचारीबाट लुटिएको मोबाइलको आईएमई नम्बरसमेत ट्रयाकिङमा राखिए पनि हालसम्म त्यसमा कुनै पनि गतिविधि नभएको देखिएको छ ।

‘रकमसहित भागेकाहरु अझै भारतको अररियामा रहेको जानकारी छ, अररिया प्रहरीलाई भेटेर सम्पूर्ण जानकारी दिएका छौं, निरन्तर सम्पर्कमा छौं, पहल गरिरहेको भारतीय पक्षले बताएका छन्,’डिएसपी श्रेष्ठले कान्तिपुरस“ग भने । पक्राउ र फरारमध्ये केही लुटेराहरू पारि पनि ‘वान्टेड’ सूचीमा रहेकाले भारतको अररिया प्रहरीले पहिलेदेखि खोजीरहेको थियो । प्रहरीका अनुसार फरारहरू सीमा वारिपारि बरोबर निगरानीमा छन् ।

लुटेरा समूहले २२ असोजमा विराटनगरको मेनरोडस्थित एक गार्मेन्ट र २५ असोजमा उक्त बैंक लुटेका थिए । प्रहरीका अनुसार उनीहरुले बैंकबाट करिब २५ लाख रुपैयाँ, एक मोबाइल र गार्मेन्टबाट १२ हजार रुपैया“ एवं ४ मोबाइल लुटेका थिए । ‘बैंकबाट लुटिएको रकम बरामदगीका लागि घटनालगत्तै केही दिनसम्म वारि लुटेराहरुले आउजाउ गरेको र बसेको हरेक स्थलमा छापा मारिसकिएको छ,’मोरङ प्रहरी प्रमुख एसपी जनार्दन जीसीले भने ।

यो संगठित अपराधको योजना बनाउन र लुटिएको रकम बाडफाड गर्नलाई मुखियाले मोरङको पूर्वीदक्षिण सीमावर्ती गाउँ जहदा गाउँपालिका–५, मझारेमा एक कोठा भाडामा लिएको प्रहरीको अनुसन्धानबाट खुलेको छ । ३१ असोजमा उनको कोठामा प्रहरीले खानतलासी गर्दा नाइन एमएमको १ पेस्तोल, त्यसमा लाग्ने १ म्याग्जिन र आधा किलो गा“जा बरामद भएको थियो । मुखियाले गा“जा भने निजी सेवनका लागि किनेको प्रहरीले जनाएको छ ।

बैंक लुटेलगत्तै भाग्दाभाग्दै मुखियास“गै पक्राउ दुई अभियुक्तले उक्त कोठा देखाएको एसपी जीसीले बताए । ‘गार्मेन्टमा लुटिएको १२ हजार रुपैया“ मुखियाकै कोठामा दामासाहीले बाँडियो, बैंकबाट लुटेको २५ लाख रुपैयाँसहित अर्को लुटेरा समूह भारत पुगिसकेको पछि पक्राउ परेका एक लुटेराबाट खुलासा भएको हो,’ एसपी जीसीले भने,‘लुटिएको नोटको नम्बरसहित लुटेराको तस्बिरहरू भारतका प्रहरी एवं दुवै तिरका मुद्रा सटही काउन्टरहरूलाई दिएका छौं, नोट साट्न आउना साथ पक्राउ पर्छन् ।’

बैंक लुटमा संलग्न थप एक भारत अररिया फारविसगञ्ज–१० का २० वर्षीय रोशन यादवलाई मोरङको सीमावर्ती क्षेत्र सुनवर्षी नगरपालिका–८, सिक्टीस्थित नेपाल चोक नजिकबाट १ कात्तिकमा प्रहरीले पक्राउ गरेको थियो । बैंकबाट लुटेको रकमसहित अन्य साथीहरु भारत भागेको यादवले नै प्रहरी बयानमा भनेका हुन् ।

लुटमा प्रयोग भएको दुई पेस्तोल बरामद भइसकेको छ । एसपी जीसीका अनुसार गार्मेन्टको लुटमा मुखिया, सुनवर्षीबाट पक्राउ परेक यादव, भारत अररिया सेखपुरा–५ का २८ वर्षीय सुनील यादव र गोराहा–४ का ३० वर्षीय विजय सहनीको संलग्नता थियो । ‘गार्मेन्टबाट ठूलो रकम हात नलागेपछि योजना अनुरुप बैंक लुट्नलाई मुखियाले गिरोहमा थप ७ जना र हतियार थपेका थिए,’उनले भने ।

बैंकभित्र लुटपाटको क्रममा नोटको बिटा समाएर अर्को साथीलाई दिने क्रममा असावधानीवश यादवले बोकेको पेस्तोलबाट गोली चल्दा गिरोहका अर्का सदस्य विजय सहनी घाइते भएका थिए । यिनै घाइते सहनीलाई लिएर भाग्ने क्रममा तत्कालै तीन जना र सातापछि यादव पनि पक्राउ परेका थिए ।

बैंक लुटेलगत्तै पक्राउ भएकाहरुबाट कटुवा पेस्तोल र नपड्केको एक राउन्ड गोली, १ मोबाइल, घटनास्थलबाट पेस्तोलको एक राउण्ड गोली, १ खोका र बैंकका घाइते सुरक्षागार्ड ३८ वर्षीय शितल कुमालको शरीरबाट निकालिएको एक गोली प्रहरीले बरामद गरेको थियो ।

सुरुआती अनुसन्धानमा बैंक लुटमा तीन पेस्तोल प्रयोग भएको देखिएको प्रहरीले जनाएको छ । बाँकी एक पेस्तोल रकम लिएर फरार भएकासँग हुनसक्ने प्रहरीको अनुमान छ । ‘धेरै दिनसम्म लुकेर बस्न र लुटिएको रकम खर्चिन सजिलो छैन,’ एक अनुसन्धान अधिकृतले भने ।

प्रकाशित : मंसिर ११, २०७८ १५:३०
प्रतिक्रिया
पठाउनुहोस्

काेसी अस्पतालमा अब पाठेघरकाे मुखकाे क्यान्सर परीक्षण हुने

जितेन्द्र साह

विराटनगर — पाठेघरको मुखमा क्यान्सर पत्ता लगाउन गरिने आधुनिक परीक्षण सेवा बुधबारदेखि विराटनगरस्थित कोसी अस्पतालको कोरोना प्रयोगशालामा सुरु भएको छ ।


‘पाठेघरको मुखबाट लिइएको स्वाबको आरटी–पीसीआर परीक्षण विधिबाट पाठेघरको मुखमा क्यान्सर भए/नभएको पता लगाउने गरिएको प्रयोगशालाका क्लिनिकल माइक्रोबायोलाेजिस्ट प्रणवकुमार यादवले बताए । उनले कान्तिपुरसँग भने,‘पीसीआर परीक्षणमा जस्तै यस्मा पनि क्यान्सर भए पोजिटिभ, नभए नेगेटिभ रिपोर्ट आउँछ ।’ यसमा पनि स्वाबलाई भीटीएम (भाइरल ट्रान्सपोर्ट मिडियम) मा राखेर परीक्षण गर्ने गरिएको उनले बताए । ‘कोरोना परीक्षण र यसमा प्रयोग हुने रिएजेन्ट मात्र फरक हुन्छ,’यादवले भने ।

चिकित्सकीय भाषामा ‘एचपीभी डिनए पीसीआर एण्ड जेनोटाइपिंग टेस्ट’ भनिने यो सेवा सुरु गर्ने नेपालको सरकारी अस्पतालहरुमध्ये कोसी अस्पताल पहिलो भएको उनको दाबी थियो । यादवको अनुसार अन्य अस्पताललले स्वाबलाई स्लाइडमा राखेर माइक्रोस्कोपले हेरेर रिपोर्ट तयार पार्छ जसलाई प्याथोलोजी स्मियर टेस्ट भनिन्छ । अत्याधुनिक आरटी–पीसीआर स्वचालित यन्त्रले जस्तो भरपर्दो रिपोर्ट माइक्रोस्कोपले हेरेर दिन नसकिने उनले बताए ।

‘काठमाडौंको निजी अस्पतालमा मात्र, त्यो पनि महंगो शुल्कमा हाम्रो जस्तो अत्याधुनिक परीक्षण सेवा उपलब्ध छ,’ यादवले भने, ‘काठमाडौं बाहिरका अधिकांश अस्पतालले क्यान्सरको शंका गरिएका बिरामीको स्वाब परीक्षणका लागि बढी भारततिरै पठाउँछ ।’ काठमाडौंको निजी अस्पतालमा ५ हजार रुपैयाँ र भारतमा १० हजार रुपैयाँसम्म लिइने यो परीक्षणको शुल्क कोसीले भने मात्र २ हजार ५ सय रुपैयाँ तोकेको छ ।

उनको अनुसार यो परीक्षणमा पाठेघरको मुखको क्यान्सरकालागि कारक मानिने एचपीभी ( ह्युमन प्यापीलोमाभाइरस) को किसिमसमेत पत्ता लाग्छ । ‘यसबाट बिरामीलाई कस्तो उपचार र कुन सुई दिने निर्धारण गर्न चिकित्सकलाई सहज हुन्छ,’ यादवले भने ।

स्वास्थ्य जाँच क्रममा प्रसुति विभागमा आउने सेवाग्राहीमध्ये क्यान्सरको शंका गरिएकालाई विज्ञ चिकित्सकले परीक्षणकालागि आरटी–पीसीआर प्रयोगशालामा पठाउने उनले बताए । यादवको अनुसार शुक्रबार सम्म ४ जनाले यो परीक्षण गराइसकेका छन् ।

अस्पतालका मेडिकल सुपरिन्टेन्डेन्ट (मेसु) डा. चुमनलाल दासले प्रयोगशाला एवं शल्यक्रिया विभागलाई आधुनिक बनाउन एक पछि अर्को प्रविधि भित्र्याइरहेको बताए । ‘कोसीको प्रयोगशालामा जटिलभन्दा जटिल रोगको परीक्षण/उपचार होस् भन्ने प्रयासमा छौं,’ उनले भने, ‘दूरबीनबाट प्रोस्टेटको शल्यक्रिया सेवा समेत सुरु गरेका छौं, मेडिकल वार्डलाई आधुनिक बनाइँदैछ र सेवाग्राहीको चाप अनुरुप पूर्वाधार थपिंदैछ ।’


प्रकाशित : मंसिर १०, २०७८ १५:०९
पूरा पढ्नुहोस्
प्रतिक्रिया
पठाउनुहोस्
×