कैदीबन्दीको आन्दोलनलाई बेवास्ता गर्दै गिरीलाई मोरङ कारागार ल्याइयो- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

कैदीबन्दीको आन्दोलनलाई बेवास्ता गर्दै गिरीलाई मोरङ कारागार ल्याइयो

विनोद भण्डारी

विराटनगर — कैदीबन्दीको डेढ महिनादेखिको आन्दोलनलाई बेवास्ता गर्दै मोरङ प्रशासनले अपहरण तथा शरीर बन्धक मुद्दामा कैद भुक्तानी गरिरहेका विराटनगरका अभिषेक गिरीलाई बिहीबार बिहान सबेरै मोरङ कारागारमा ल्याएको छ ।

सर्वत्र विरोध भइरहेकै समयमा गिरीलाई सप्तरीबाट मोरङ कारागार ल्याइएको प्रमुख जिल्ला अधिकारी काशीराज दाहालले बताए । उनलाई ल्याउने बित्तिकै कारागारको चौकीदार नियुक्त गरिएको स्रोतले बताएको छ ।

दिउँसो ल्याउँदा भित्रका कैदीबन्दीले अवरोध गर्ने भयले गिरीलाई सबेरै ल्याएर कारागार भित्र्याएको स्रोतको दाबी छ । डिल्लीबजार कारागारमा रहँदा गिरीलाई विभागले भदौ १७ गते मोरङ पठाउने निर्णय गरेको थियो । त्यसको केही दिनपछि गिरीलाई मोरङमा ल्याउँदा कैदीबन्दीले भित्र छिर्न नदिएपछि उनलाई सप्तरी कारागार लगिएको थियो ।

गिरीलाई मोरङमा ल्याउन डेढ महिनाको अवधिमा मोरङ कारागारमा तीनवटा नाइके परिवर्तन गर्दै अन्यत्र कारागार सरुवा गरिएका थियो । उनलाई ल्याउन पछिल्लो पटक कारागार प्रशासनले बुधबार गिरी विरोधी चौकीदार कात्तिक कामतसहित ८ जना कैदीबन्दीलाई झुम्का र सिन्धुली कारागार सरुवा गरेको थियो ।

त्यसअघि गिरीलाई मोरङ ल्याउने तयारीका लागि कारागार प्रशासनले त्यसबेलाका चौकीदार गिरी विरोधी नवीन राईलाई झुम्का कारागार सुरुवा गरिएको थियो । तर विभागको निर्णय तत्काल कार्यान्वयन नहुँदा कर्तव्य ज्यान मुद्दाका दोषी किरण गुरुङलाई चौकीदार बनाइएको थियो ।

गुरुङ चौकीदार भएपछि गिरीलाई मोरङ ल्याइयो । तर, त्यसको विरोधमा कैदीबन्दी आन्दोलनमा उत्रिए । गिरीलाई कारागार प्रशासनले भित्र्याउनै नसकेपछि सप्तरी कारागार पठायो । गिरीलाई झुम्का र झापा कारागारले लिन नमानेपछि सप्तरी पठाइएको स्रोतको भनाई छ ।

गिरीलाई सप्तरी पठाएपछि मोरङ कारागारमा गिरी पक्ष र विपक्षीका कैदीबन्दी बीच तीनसाताअघि झडप भयो । झडपमा चौकीदार गुरुङसहित ६ जना घाइते भएका थिए । झडपपछि कारागार प्रशासनले गुरुङसहित १४ कैदी बन्दीलाई झुम्का र झापा कारागारमा सरुवा गरेर कर्तव्य ज्यान मुद्दाकै कैदी कात्तिक कामतलाई प्रशासनले चौकीदार नियुक्त गरेको थियो । उनलाई बुधबार साँझ सरुवा गरेर बाहिर निकाल्दा कारागारको वातावरण तनावग्रस्त बनेको थियो ।

विराटनगरको देवकोटा चोकका गिरी यसअघि मोरङमै रहँदा कारागारका चौकीदार थिए । त्यसबेला उनले कैदीवन्दीलाई यातना दिएको र भित्रबाटै असुली र फिरौती धन्दा चलाएको भन्दै कारागार विभागले २०७४ चैतमा डिल्लीबजार कारागार सरुवा गरेको थियो । त्यसबेला गिरीले कैदीवन्दीलाई चरम यातना दिएको भन्दै यो कारागारका कैदीबन्दी उनलाई आउन नदिन डेढ महिनादेखि नियमित आन्दोलन गर्दै आएका थिए ।

युवती प्रयोग गरी सरकारी कर्मचारीलाई बन्धक बनाएर फिरौती मागेको आरोपमा गिरीलाई प्रहरीले २०७० सालमा पक्राउ गरेको थियो । यसअघि उनी विराटनगर जतुवाका करण यादवको हत्यामा पक्राउ परेर २०६९ सालमा उनले कर्तव्य ज्यान मुद्दामा सफाइ पाएर जेलमुक्त भएका थिए ।

काठमाडौं उपत्यका खानेपानी लिमिटेडका लेखा सहायक अच्युतप्रसाद रेग्मीलाई बन्धक बनाएर रकम मागेको आरोपमा गिरीसहित चार जनालाई प्रहरीले पक्राउ गरेको थियो । गिरीले आफ्नी प्रेमिकालाई प्रयोग गरेर रेग्मीलाई सानेपास्थित आफ्नो डेरामा बन्धक बनाएर १० लाख रुपैयाँ फिरौती मागेका थिए । यही प्रकरणमा गिरी उनी अहिले जेलमा छन् । गैरकानुनी रूपमा सम्पत्ति आर्जन गरेको अभियोगमा सम्पत्ति शुद्धिकरण अनुसन्धान विभागले पनि गिरीमाथि विशेष अदालतमा मुद्दा चलाएको छ ।

चौकीदार बन्न मरिहत्ते

कारागार व्यवस्थापन विभागका अनुसार कारागारमा कानुनी रुपमै चौकीदार चयन हँुदै आएको छ । चौकीदारसहित नाइके र भाइ नाइकेको पनि व्यवस्था हुन्छ । कैदीबन्दीको व्यवस्थापन, औषधि उपचार, खाद्यान्न आपूर्ति लगायतमा चौकीदारको ठूलो भूमिका हुन्छ । चौकीदारले जेलभित्र पसल चलाउने, मेस चलाउने, खाद्यान्न आपूर्ति गराउने जिम्मा पाउँछन् । चौकीदार हुनेले लाखांै आम्दानी गर्दै आएका छन । त्यसकालागि चौकीदार बन्न जेलभित्रका कैदीबन्दीबीच प्रतिस्पर्धा नै हुने स्रोतको भनाई छ ।

त्यतिमात्र होइन । चौकीदार दिनभरि बाहिर स्वतन्त्र रुपमा हिँडडुल गर्ने पाउँछन् । साँझसम्ममा कारागार प्रवेश गरिसक्ने पर्ने दिनभरि जहाँपनि जान मिल्ने र दिनभरिमा गृह नगरमा अरू काम गर्न पाइने भएकोले पनि गिरी मोरङ कारागार आउन खोज्छन् ।

यसअघि गिरी मोरङ कारागारको चौकीदार रहँदा दिनभरि हिँडडुल गरी ठेक्कापट्टा चलाउनेदेखि कारागारभित्र कैदीबन्दीलाइ यतना दिने, फिरौती र असुली धन्दामा सञ्चालन गरेको पुष्टि भएपछि गिरीलाई २०७४ चैतमा डिल्लीबजार कारागार सरुवा गरिएको थियो ।

प्रकाशित : मंसिर ९, २०७८ १३:४२
प्रतिक्रिया
पठाउनुहोस्

३० जिल्लामा चुनिए कांग्रेस सभापति : देउवा पक्ष १६, पौडेल समूह १४ 

कान्तिपुर संवाददाता

काठमाडौँ — कांग्रेसको १४ औँ महाधिवेशनअन्तर्गत ३० जिल्लाको अधिवेशन सकिएको छ । ती जिल्लामा सभापतिसहित जिल्ला कार्यसमिति र केन्द्रीय महाधिवेशन प्रतिनिधिहरूको टुंगो लागिसकेको छ ।  केन्द्रीय निर्वाचन समितिका अनुसार दोस्रो चरणमा १६ जिल्लाको अधिवेशन भएको हो । १४ हिमाली जिल्लाको अधिवेशन त्यसअघि नै भइसकेको थियो ।

३० जिल्लाको परिणाम आउँदा सभापति शेरबहादुर देउवा पक्ष बलियो देखिएको छ । देउवा पक्षले १६ जिल्लामा सभापति जितेको छ । त्यस्तै, १४ जिल्लामा वरिष्ठ नेता रामचन्द्र पौडेल समूहका नेताहरू जिल्ला सभापतिमा चुनिएका छन् । केन्द्रीय निर्वाचन समितिका सचिव जगन्नाथ श्रेष्ठले पछिल्लो पटक ओखलढुंगा सभापतिमा तेजेन्द्र खनाल, रुकुम पश्चिम सभापतिमा प्रेमप्रकाश वली, डोटी सभापतिमा नरेन्द्रबहादुर सिंह, डोल्पा सभापतिमा दीपेन्द्रबहादुर शाही, जुम्ला सभापति कर्णबहादुर शाही र जाजरकोट सभापतिमा बेदराज सिंह निर्वाचित भएको जानकारी दिए । त्यस्तै, तेह्रथुम सभापतिमा अर्जुनबहादुर तुम्बाहाङ्फे र रोल्पा सभापतिमा किशोर आचार्य निर्वाचित भएका छन् ।

त्यस्तै, भोजपुरमा विनोद बान्तावा, डडेलधुरामा भीमबहादुर साउद, पाँचथरमा रुपनारायण जवेगु, प्यूठानमा विष्णुकुमार गिरी, अर्घाखाँचीमा केशव श्रेष्ठ, सल्यानमा केसबहादुर बिष्ट, लमजुङमा टकराज गुरुङ र बैतडीमा चतुरबहादुर चन्द जिल्ला सभापतिमा निर्वाचित भएका छन् ।

कांग्रेसले सोमबारदेखि क्षेत्रीय अधिवेशन र एकमात्र निर्वाचन क्षेत्र भएका जिल्लाको अधिवेशन गरिरहेको छ । जसअन्तर्गत एक मात्र निर्वाचन क्षेत्र भएका ३५ जिल्लामध्ये ३२ जिल्लाको अधिवेशन भएको सचिव श्रेष्ठले जानकारी दिए । तीमध्ये खोटाङ, सोलुखुम्बु र पर्वतको नतिजा आउनेक्रममा छ । दार्चुला, धनकुटा र रसुवामा अधिवेशन हुन बाँकी छ ।

दुई वा सोभन्दा धेरै निर्वाचन क्षेत्र भएका जिल्लामा भने शुक्रबार जिल्ला अधिवेशन हुदैछ । समितिले अहिलेसम्म दुई वा सोभन्दा धेरै निर्वाचन क्षेत्र भएका ३१ जिल्लामा क्षेत्रीय अधिवेशन सकिएको जनाएको छ । यीबाहेक बर्दिया, बाँके, सप्तरी, सिन्धुपाल्चोक, सिरहा, धनुषा, महोत्तरी, सर्लाही, रौतहट, बारा र पर्सामा विभिन्न तहको अधिवेशन हुने क्रममा छन् ।

संस्थापन पक्ष अर्थात् देउवानिकट सभापतिहरू

डोटी – नरेन्द्रबहादुर सिंह

डोल्पा– दीपेन्द्रबहादुर शाही

जुम्ला – कर्णबहादुर शाही

जाजरकोट – बेदराज सिंह

ओखलढुंगा– तेजेन्द्र खनाल

लमजुङ – टकराज गुरुङ

डडेलधुरा – भीमबहादुर साउद

पाँचथर – रुपनारायण जवेगु

सल्यान – केसबहादुर बिष्ट

मनाङ – शंकर गुरुङ

बझाङ – खडक बोहरा

हुम्ला – मोहनविक्रम सिंह

ताप्लेजुङ – गजेन्द्र तुम्याहाङ

रामेछाप – कान्छाराम तामाङ

मुगु – ऐनबहादुर शाही

म्याग्दी – खमबीर गर्बुजा

पौडेल समूहनिकट सभापतिहरू

रोल्पा –किशोर आचार्य

रुकुम पश्चिम– प्रेमप्रकाश वली

तेह्रथुम–अर्जुनबहादुर तुम्बाहाङ्फे

भोजपुर – विनोद बान्तावा

प्यूठान – विष्णुकुमार गिरी

अर्घाखाँची – केशव श्रेष्ठ

बैतडी – चतुरबहादुर चन्द

रुकुमपूर्व – केशरमान रोका

मुस्ताङ – रोमी गौचन थकाली

संखुवासभा – दीपक खड्का

गोरखा – नन्दप्रसाद न्यौपाने

दोलखा – बर्मा लामा

कालीकोट – अम्मबहादुर शाही

बाजुरा – रामसिंह रावल

प्रकाशित : मंसिर ९, २०७८ १३:३३
पूरा पढ्नुहोस्
प्रतिक्रिया
पठाउनुहोस्
×