मोरङ कारागार फेरि अशान्त

काठमाडौंको डिल्लीबजार कारागारमा रहँदा गिरीलाई विभागले भदौ १७ मा मोरङ पठाउने निर्णय गरेको थियो । विभागले उनलाई एक महिना पहिला मोरङ ल्याएको थियो । कैदीबन्दीको आन्दोलनपछि स्थानीय प्रशासनले प्रवेश गराउन नसकेपछि गिरीलाई सप्तरी कारागार पठाइएको थियो । उनलाई पछिल्लो पटक सप्तरीबाट मोरङ ल्याउने कारागार विभागको निर्णय बाहिरिएलगत्तै मोरङ कारागार अशान्त छ ।

कारागारका निमित्त प्रमुख रामप्रसाद पोखरेलका अनुसार गिरीलाई ल्याउने र नल्याउने भन्ने नाममा कारागारभित्र र बाहिर आन्दोलन हुँदा आसपासको वातावरण अशान्त हुँदै गएको हो । उनले भने, ‘गिरीलाई सप्तरीबाट मोरङ ल्याउनुपर्छ भन्ने आधिकारिक जानकारी आएको छैन ।’ गिरीलाई दुई महिना अगाडि मोरङ सरुवा गरेको कारागार व्यवस्थापन विभागको निर्णय बाहिर आउनासाथ कारागारका कैदीबन्दी आन्दोलनमा उत्रिए । विराटनगरको देवकोटा चोकका गिरी यसअघि मोरङमै रहँदा कारागारका चौकीदार थिए । त्यसवेला उनले कैदीबन्दीलाई यातना दिएको र भित्रबाटै असुली र फिरौती धन्दा चलाएको भन्दै कारागार विभागले २०७४ चैतमा डिल्लीबजार कारागार सरुवा गरेको थियो ।

कांग्रेसनिकट गिरीलाई गृहमन्त्री बालकृष्ण खाँणको पहलमा मोरङ पठाइएको स्रोतको दाबी छ । उनलाई कारागारका चौकीदार बनाउने प्रशासनको तयारी थियो । गिरीलाई मोरङ ल्याउने तयारीका लागि कारागार प्रशासनले त्यसबेलाका चौकीदार गिरीविरोधी नवीन राईलाई झुम्का कारागार सुरुवा गरिएको थियो ।