विवाद भएपछि ओखलढुंगामा कांग्रेसको मतदान रोकियो
काठमाडौँ — कांग्रेसको १४ औँ महाधिवेशन अन्तर्गत ओखलढुंगामा दुई पक्षबीच विवाद भएपछि मतदान रोकिएको छ । निर्वाचन समितिले छापेको मतपत्रकै आकार, रङ र एकपक्षीय उम्मेदवारको नाममा रेजा लगाएको मतपत्र फेला परेपछि दुई पक्षबीच विवाद भएको हो ।
ओखलढुंगामा जिल्ला सभापतिका लागि तेजन खनाल र बालकृष्ण दाहाल प्यानलसहित प्रतिस्पर्धामा छन् । खनाल सभापति शेरबहादुर देउवानिकट उम्मेदवार हुन् भने दाहाल वरिष्ठ नेता रामचन्द्र पौडेल निकट हुन् ।
खनाल पक्षले निर्वाचन समितिले प्रयाेग गरेकै आकारको मतपत्रमा रेजा लगाएकाे मतपत्र बाँडेको हो । विवादपछि उत्पन्न तनावपूर्ण अवस्थाका कारण मतदान रोकिएको नेपाल प्रेस युनियनका नेता खिला कार्कीले जानकारी दिए । उनका अनुसार उम्मेदवारहरुले अर्को मतपत्र छपाई गरेपछि मात्रै मतदानमा जान सकिने शर्त अघि सारेका छन् । निर्वाचन अधिकृत उज्वलराम श्रेष्ठ भने त्यसबारे बोल्न चाहेनन् ।
प्रकाशित : मंसिर ७, २०७८ १३:०८