प्रशासनमा भीड बढेपछि टोकन सेवा

भीड व्यवस्थित गर्दै पहिले आउने सेवाग्राहीलाई पहिल्यै सेवा दिने उद्देश्यले टोकनका आधामा सेवा दिन थालिएको प्रशासन कार्यालयका कर्मचारीहरूले जनाएका छन् ।

दसैं-तिहार बिदा हुनुभन्दा महिनौं अघिदेखि कोरोना भाइरस संक्रमणको त्रासले प्रायः सुनसान रहेको उक्त कार्यालयमा अहिले दैनिक १ सयको हाराहारीमा नागरिकता र ४० को हाराहारीमा राहदानी बनाउन आउनेहरू छन् । यसवाहेक अन्य सबैखाले सेवा लिन आउनेहरूको संख्या पनि पछिल्लो समय अत्याधीक बढेपछि टोकन सेवा सुरु गरिएको बताइएको छ ।

प्रमुख जिल्ला अधिकारी सुरेश न्यौपानेका अनुसार हरेक दिन सेवाग्राहीको संख्या ४ सय नाघेको छ । भीड व्यवस्थित गर्नका लागि टोकनका आधारमा सेवा दिन थालिएको प्रजिअ न्यौपानेले बताए ।

उनका अनुसार सेवा लिन आउने नागरिकलाई कार्यालयले प्रवेश गर्नासाथ टोकन उपलब्ध गराएर सोही नम्बरका आधारमा काम सकेर पठाउने व्यवस्था मिलाइएको छ ।

सेवाग्राहीको चाप थेग्नै नसक्ने अवस्थामा पुगेपछि सबै फाँटका कर्मचारीलाई नागरिकता र राहदानी फाँटमै केन्द्रित गरेको पनि प्रजिअ न्यौपानेले बताए । कार्यालयले कोरोना संक्रमण जोखिमलाई मध्यनजर गर्दै सेवाग्राहीलाई मास्क अनिवार्य लगाउन भने पनि भौतिक दूरी भने कायम गराउन सकेको छैन ।