१७ सय ७३ घरमा क्षति- प्रदेश १ - कान्तिपुर समाचार

१७ सय ७३ घरमा क्षति

बेमौसमी झरीले पुर्‍याएको हानिको यकिन विवरण अझै आएन
लक्ष्मी गौतम

पाँचथर — जिल्ला विपद् व्यवस्थापन समितिले गरेको अध्ययनबाट कात्तिक १ देखि ३ सम्मको बेमौसमी झरीले जिल्लाका १ हजार ७ सय ७३ घरमा क्षति पुगेको देखिएको छ । समितिले बाढीपहिरो प्रभावित स्थानीय तहसँगको समन्वयमा क्षतिको विवरण संकलन गरेको हो ।

जिल्ला प्रशासन कार्यालयका अनुसार जिल्लाका ७ वटा स्थानीय तहमा बाढीपहिरोका कारण १ हजार ७ सय ७३ घरमा क्षति पुगेको हो । जसमध्ये ३ सय ४४ घरका १ हजार ५ सय सर्वसाधारण विस्थापित भएका छन् भने ३७ घरपरिवार अझै जोखिमयुक्त घरमा बसिरहेका छन् । यस्तै १ हजार ३ सय ९२ वटा घरमा आंशिक क्षति पुगेको छ ।

बाढीपहिरोले पुर्‍याएको क्षतिको विवरण यकिन गरिएसँगै स्थानीय तह र नेपाल रेडक्रस सोसाइटीले विस्थापित र प्रभावित परिवारलाई प्रारम्भिक चरणको राहत दिन थालेको प्रमुख जिल्ला अधिकारी सुरेश न्यौपानेले बताए । उनका अनुसार पहिरोका कारण प्राकृतिक नाकाबन्दीमा परेको मिक्लाजुङ–७ लेकगाउँका २६ घरपरिवारलाई पनि शुक्रबार रेडक्रस र गाउँपालिकाले राहत पुर्‍याएका छन् ।

पालिकाले खाद्यान्न र रेडक्रसले गैरखाद्य गरी तत्कालका लागि राहत उपलब्ध गराइएको प्रजिअ न्यौपानेले बताए । मृतक परिवारका हकमा भने राहत रकम उपलब्ध गराउन केही साता लाग्ने बताइएको छ । बाढीपहिरोमा परी जिल्लाभर ३१ जनाले ज्यान गुमाएका थिए भने ३ जना बेपत्ता छन् । बेपत्ताका परिवारलाई पनि मृतकलाई सरह राहत उपलव्ध गराउने बताइएको छ । यसअघि सरकारले ज्यान गुमाएका सदस्यको हकमा प्रतिव्यक्ति २ लाखका दरले र एउटै परिवारका २ जनाभन्दा धेरैको ज्यान गएको भए प्रतिव्यक्ति थप एक लाखका दरले राहत दिने निर्णय गरेको थियो ।

३ हजार १ सय बढी हेक्टरमा क्षति

बेमौसमी झरीका कारण पाँचथरका ७ पालिकामा धान, कोदो, तरकारी, अलैंची, फलफूल र दाल बाली गरी ३ हजार १ सय हेक्टर क्षेत्रफलमा लगाइएको बालीमा क्षति पुगेको तथ्यांक संकलन भएको छ । कृषि ज्ञान केन्द्र पाँचथरका अनुसार सबैभन्दा धेरै क्षति धान बालीमा भएको छ । २ हजार ३ सय २२ हेक्टरमा लगाएर पाक्नै लागेको धानमा क्षति पुगेको ज्ञान केन्द्र प्रमुख सागर विष्टले बताए ।

उनका अनुसार २ सय ९६ हेक्टरमा लगाइएको कोदो, २ सय २० हेक्टरमा लगाइएको तरकारी र १ सय २८ हेक्टरको अलैंची, १० हेक्टरको फलफूल र ३ हेक्टर क्षेत्रफलको दाल बालीमा क्षति पुगे पनि परिमाण भने अझै यकिन भएको छैन । ज्ञान केन्द्रकै सेवा क्षेत्रमा पर्ने छिमेकी जिल्ला ताप्लेजुङका ९ वटा स्थानीय तहमा २ सय ८८ हेक्टरको धान र २९ हेक्टरको कोदो बालीमा क्षति पुगेको तथ्यांक छ ।

‘यत्ति धेरै क्षेत्रफलको बाली नष्ट भए पनि कति परिमाणमा अन्न गुमाइयो भन्ने तथ्यांक संकलन भइरहेको छ । स्थानीय तहका कृषि विकास शाखासँग समन्वय गरेर कात्तिकभित्रमा क्षतिको विवरण यकिन गर्छौं,’ विष्टले भने ।

प्रकाशित : कार्तिक २७, २०७८ ०९:३४
प्रतिक्रिया
पठाउनुहोस्

उच्चस्तरीय राजनीतिक समिति अवैधानिक : नेम्वाङ 

लक्ष्मी गौतम

पाँचथर — एमाले नेता सुवास नेम्वाङले सत्तारुढ गठबन्धनले गठन गरेको उच्चस्तरीय राजनीतिक समिति अवैधानिक रहेको टिप्पणी गरेका छन् ।

एमाले फिदिम नगर कमिटीको अधिवेशन उद्घाटन सत्रलाई सम्बोधन गर्दै नेम्वाङले संविधान र संसद् रहेसम्म यस्ता समिति आवश्यक नपर्ने बताए । सत्तारुढ गठबन्धन र पार्टीभित्रको खटपटी व्यवस्थापन गर्न मात्रै यस्तो संयन्त्र बनाइएको उनको भनाइ थियो । ‘संघीय लोकतान्त्रिक गणतन्त्रमा नेपालको संविधान २०७२ सर्वोच्च हो, त्यसपछि संसद्, कार्यकारी प्रधानमन्त्री र सरकारले विधि सम्मत निर्णय गरेर अगाडी बढाइएका कामलाई गति दिन तिनका अंगहरुले सहयोग गर्नुपर्छ, यस्तो अवस्थामा किन चाहियो उच्च स्तरीय संयन्त्र ?,’ उनको प्रश्न थियो ।

सत्तारुढ गठबन्धनलाई ‘दूषित गठबन्धन’ को संज्ञा दिँदै नेम्वाङले ८८ दिनसम्म सरकार विस्तार गर्न नसकेको देउवा सरकारले बजेट होलिडे भन्दै विश्व सामु नेपाललाई लज्जास्पद तुल्याएको टिप्पणी पनि गरे । वर्तमान सरकारले देश र जनताका पक्षमा सिन्को भाँच्न नसक्ने दाबी गर्दै आगामी चुनावमा उसका कमजोर कामहरुलाई नै एजेण्डा बनाएर जनता माझ जाने उनको भनाइ थियो ।

सोही कार्यक्रममा बोल्दै नेता नेम्वाङले माधवकुमार नेपाल नेतृत्वको नेकपा एकीकृत समाजवादी विधिवत रुपमा जन्मिन बाँकी रहेको दाबी पनि गरे ।

एमालेले कारबाही गरेका सांसदहरुका विषयमा आफूहरुले अदालतमा दर्ता गराएको मुद्दा फैसला हुन बाँकी रहनुका साथै पहिले पार्टी फुटाउन हस्ताक्षर गरेका सांसद र केन्द्रीय सदस्य अहिले सबै त्यो पार्टीमा नरहेकाले पनि अवैधानिक हो भन्ने आधार पर्याप्त रहेको उनको दाबी थियो ।

प्रकाशित : कार्तिक २४, २०७८ १७:११
पूरा पढ्नुहोस्
प्रतिक्रिया
पठाउनुहोस्
×