प्रदेश १ को हिउँदे अधिवेशन सुरु, ‘अल्पमत’ मा परेका मुख्यमन्त्रीलाई नैतिकताको प्रश्न- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

प्रदेश १ को हिउँदे अधिवेशन सुरु, ‘अल्पमत’ मा परेका मुख्यमन्त्रीलाई नैतिकताको प्रश्न

राजीनामा दिन नयाँ सरकार गठनमा मार्ग प्रशस्त गर्न मुख्यमन्त्रीलाई विपक्षी दलको आग्रह
देवनारायण साह

मोरङ — शुक्रबारदेखि प्रदेश १ मा प्रदेशसभाको नवौं तथा हिउँदे अधिवेशन सुरु भएको छ । प्रदेश प्रमुखले पठाएको पत्र पढेर सुरु भएको प्रदेशसभा बैठकमा सभामुख प्रदीपकुमार भण्डारीले सरकार गठन भएको र एमाले विभाजन भएको पत्र पढेर सुनाएका थिए ।

सभामुख भण्डारीले प्रदेशसभाका सांसदले दल विभाजनसम्बन्धी अध्यादेशमा भएको व्यवस्थाअनुसार एमालेका १० सांसदले नेकपा (एकीकृत समाजवादी) मा गएको निर्वाचन आयोगको भदौ २५ गतेको निर्णय सुनाएका थिए । सभामुखले त्यसपछि दलका नेतालाई शुभकामनासहितको मन्तव्य राख्न समय दिएका थिए । बैठकमा उक्त निर्णयलाई आधार मानेर संवैधानिक व्यवस्थाअनुसार मुख्यमन्त्री भीमप्रसाद आचार्यले विश्वासको मत लिने प्रक्रिया सुरु नगरेकाले राजीनामा दिएर मार्ग प्रशस्त गर्न विपक्षी गठबन्धन दलका नेताहरूले आग्रह गरेका छन् ।

प्रमुख प्रतिपक्षी कांग्रेसका नेता राजीव कोइरालाले मुख्यमन्त्री आचार्य आफै‌ले संविधानसभा सदस्य भएर निर्माण गरेको संविधानको उल्लंघन नगर्ने विश्वास व्यक्त गरेका हुन् । उनले संविधान कार्यान्वयनका लागि मुख्यमन्त्री आचार्यले आवश्यक र उचित निर्णय लिने विश्वास व्यक्त गरे । एकीकृत समाजवादीका नेता राजेन्द्रकुमार राईले नवौं तथा हिउँदे अधिवेशन चाडपर्वका बेला दसैंमा सुरु गरेकोलाई षडयन्त्रको कडीका रूपमा चित्रण गरे । ‘यो अधिवेशनमा असंवैधानिक र अनैतिक तरिकाले गठन भएको सरकारको हैसियतको छिनोफानो हुनुपर्छ,’ उनले भने, ‘प्रदेशसभा बैठकमा सत्तारूढ दल अल्पमतमा रहेको र विपक्षी बहुमतमा रहेको अवस्थालाई कसैले नजरअन्दाज गर्न मिल्दैन ।’


प्रदेशसभाको शुक्रबारबाट सुरु भएको नवौं तथा हिउँदे अधिवेशनमा सहभागी प्रदेश सांसद । तस्बिर : देवनारायण साह/कान्तिपुर

नेता राईले आचार्य नेतृत्वको प्रदेश सरकारले संविधान मिच्न खोजिरहेको उनले आरोप लगाए । ‘कार्य व्यवस्था परामर्श समितिको बैठकमा सत्तारूढ दल एमालेतर्फबाट दसैं पछाडि विश्वासको मत लिने औपचारिक प्रस्ताव राखेकोबाट संविधान मिच्न खोजिरहेको प्रस्ट हुन्छ,’ उनले भने, ‘मुख्यमन्त्री आचार्यले असोज २४ गतेभित्र विश्वासको मत लिनुपर्छ र त्यस्तो नगरे प्रदेश प्रमुखलाई बहुमत सांसदको हस्ताक्षर बुझाएर नयाँ सरकार गठनको बाटोमा जान्छौं ।’ सरकारले नैतिकता नदेखाएको अवस्थामा सभामुख भण्डारीलाई संविधानको पक्षमा उभिन राईले आग्रह गरे ।

माओवादी केन्द्रका नेता इन्द्रबहादुर आङ्बोले संवैधानिक व्यवस्थाअनुसार मुख्यमन्त्री आचार्यले असोज २४ गतेभित्र विश्वासको मत लिनुपर्ने बताए । जनता समाजवादी पार्टीका नेता जयराम यादवले मुख्यमन्त्री आचार्यले सरकार जोगाउन धेरै खर्च गर्नुभन्दा बिदा लिनु नै उपयुक्त भएको बताए । एमालेका तर्फबाट पूर्वआन्तरिक मामिला तथा कानुनमन्त्री हिक्मत कार्कीले प्रदेश सरकारले संविधान र कानुनको पालना गर्दै सदनबाट विश्वासको मत लिने विश्वास व्यक्त गरे ।

मुख्यमन्त्री आचार्यलाई विश्वासको मत प्राप्त गर्न ४६ सांसद आवश्यक हुन्छ । ९२ सदस्यीय प्रदेशसभामा एमालेका ४१, कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्च र राप्रपाको १/१ जना प्रदेश सांसद छन् । एमालेका ४१ मध्ये एक जना प्रदेश सांसद गुलेफुन खातुन उच्च अदालत विराटनगरले किर्ते कागजात मुद्दामा दोषी ठहर गरेदेखि फरार छन् ।

प्रकाशित : आश्विन २३, २०७८ ०९:३२
प्रतिक्रिया
पठाउनुहोस्

रौतहटमा हतियारधारी समूहद्वारा लुटपाट

आमाछोरालाई आक्रमण गरी ३ लाख र ३ तोला सुन लुटियो
शिव पुरी

रौतहट — हतियारसहित आएको समूहले रौतहटको गरुडा नगरपालिका–७ पिपरिया टोलमा शनिबार बिहान १ बजे लुटपाट गरेका छन् । उनीहरुले घरका सदस्यमाथि आक्रमण गरी नगद तथा गरगहना लुटेर लगेको प्रहरीले जनाएको छ ।  

पिपरियाका रामईश्वर यादवको घरमा १०/११ जनाको समूहमा आएका हतियारधारी समूहले घरको भेन्टिलेटरको जाली फुटाई भित्र पसेर लुटेका हुन् । उक्त समूह भित्र प्रवेश गर्नासाथ ४५ वर्षीया चम्पादेवी र उनका छोरा २५ वर्षीय पवन यादवमाथि धारिलो हतियार प्रहार गरी घाइते बनाएको इलाका प्रहरी गरुडाका डीएसपीका श्रीराम भण्डारीले बताए । ‘हतियारधारी समूहको पहिचान गर्न विभिन्न स्थानमा टोली परिचालन गरेका छौँ,’ उनले भने, ‘चाँडै नै घटनामा संलग्नलाई पक्राउ गर्छौं।’

प्रहरीका अनुसार चम्पादेवीको टाउकोमा ३ वटा र छोरा पवनको ९ वटा टाँका लगाइएको छ । पवनलाई गहिरो चोट लागेकोले थप उपचारका लागि वीरगन्ज पठाइएको डीएसपी भण्डारीले बताए । घरधनी यादवले केही दिनअघि मात्र जग्गा बेचेर राखेको नगद ३ लाख रुपैयाँ र ३ तोला सुनसमेत डाँकाहरूले लुटेर लगेको प्रहरीसमक्ष बताएका छन् ।

घटनाबारे सूचना पाएलगत्तै इलाका प्रहरी चन्द्रनिगाहपुरबाट समेत टोली पठाइएको थियो । बिहान नै प्रहरीले केही स्थानमा सर्च गरेको छ । पर्व नजिकिँदै गर्दा लुटपाटका घटनाहरु हुने गरेको छ ।

प्रकाशित : आश्विन २३, २०७८ ०९:२५
पूरा पढ्नुहोस्
प्रतिक्रिया
पठाउनुहोस्
×