माइबेनी हाइड्रोमा दुई महिनाअगावै व्यावसायिक उत्पादन- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

माइबेनी हाइड्रोमा दुई महिनाअगावै व्यावसायिक उत्पादन

विप्लव भट्टराई

इलाम — ऊर्जा डेभलपर्स ग्रुपको कम्पनी सामलिङ पावरद्वारा इलाममा निर्माण सम्पन्न ९ दशमलव ५१ मेगावाटको माईबेनी जलविद्युत् आयोजनाले व्यावसायिक उत्पादन थालेको छ । भदौ १८ देखि परीक्षण उत्पादन सुरु गरेको आयोजनाले गत असोज १ देखि व्यावसायिक उत्पादन सुरु गरेको हो । 

आयोजनाले नेपाल विद्युत् प्राधिकरणका प्रतिनिधिहरूको रोहवरमा विभिन्न चरणको परीक्षण सम्पन्न गरी विद्युत् खरिद–बिक्री सम्झौता (पीपीए) बमोजिम १५ दिन प्रधिकरणलाई निःशुल्क विद्युत् उपलब्ध गराएको थियो ।

माईखोलाको पानीलाई २ हजार ५ सय मिटरको सुरुङमार्फत ल्याएर माइबेनी नजिक पावर हाउस निर्माण गरिएको छ । सुरुङदेखि पावरहाउसम्मको हेड १ सय ४७ मिटर छ । आायेजना सम्पन्न गर्न २ अर्ब रुपैयाँ खर्च भएको कम्पनीको भनाइ छ ।

इलाम नगरपालिका र माइजोगमाई गाउँपालिकाबीचमा उक्त आयोजना निर्माण गरिएको हो । नेपाल सरकार ऊर्जा जलस्रोत तथा सिंचाइ मन्त्रालयबाट आयोजनाले २०७५ साल वैशाख ६ गते विद्युत् उत्पादनको अनुमति प्राप्त गरेको थियो । आउदो मंसिरदेखि मात्र व्यापारिक उत्पादन गर्ने सम्झौता भए पनि आयोजनाले लक्ष्यभन्दा दुई महिना अगावै काम सम्पन्न गरेको हो । सरकारसँग भएको खरिद बिक्री सम्झौताअनुसार सुक्खायाममा ८ रुपैयाँ ४० पैसा र बर्खायाममा प्रतियुनिट ४ रुपैयाँ ८० पैसामा प्राधिकरणले विद्युत् खरिद गर्नेछ । ‘आयोजनाले प्रभावित क्षेत्रका लागि सेयरसमेत निष्कासन गरिसकेको छ,’ प्रोजेक्ट मेनेजर राजेन्द्रराज भारतीले भने ।

माइबेनीको कुल १२ लाख ३० हजार कित्ता सधारण शेयर (आईपीओ) मध्ये आयोजना प्रभावित बासिन्दाप्रति लक्षित पाँच लाख कित्ता शेयरका लागि भदौ १८ गतेबाट असोज १ गतेसम्म सेयर लिएको छ । यस्तै, थप सात लाख तीस हजार कित्ता सेयर कम्पनीका कर्मचारी र सर्वसाधारणका लागि खुल्ला गर्ने उनले जानकारी दिए । लक्षित समयभन्दा २ महिनाअघि नै काम सकेर उत्पादन थालेकाले विभिन्न चरणमा रहेका अन्य आयोजनाबाट समेत समयमै विद्युत् उत्पादन गर्न थप हौसला थपिएको प्रोजेक्ट मेनेजर भारतीको भनाई छ । ऊर्जा डेभलपर्सकै अर्को सहायक कम्पनीमार्फत इलाममै निर्माण भइरहेको ६ दशमलव २ मेगावाटको तल्लो जोगमाई निर्माणको अन्तिम चरणमा पुगेको छ । आगामी महिनाबाट यसले पनि व्यापारिक उत्पादन सुरु गर्ने लक्ष्य रहेको कम्पनीले जानकारी दिएको छ ।

इलामको माई, जोगमाई र पुवामाईमा गरी १८ वटा विद्युत् आयोजना निर्माण भइसकेका छन् । जिल्लाको अहिले कुल विद्युत् उत्पादन क्षमता १ सय ४० मेगावाट पुगेको छ । केन्द्रीय प्रशारणमा यहाँ उत्पादित विद्युत् पुर्‍याउन कावेली करिडोरले सघाएको छ । राजदुवालीको सवस्टेसनमा यहाँ उत्पादित विद्युत् पुर्‍याइएको छ ।

इलामसहित पाँचथर र ताप्लेजुङमा निर्मित आयोजनाबाट उत्पादित विद्युत् कावेली करिडोरमार्फत केन्द्रीय राष्ट्रिय प्रसारण लाइनमा जोडिन्छ । २०५८ मा विद्युत् प्राधिकरण मातहतको पुवाखोला हाइड्रो पावर ६ दशमलव २ मेगावाटको विद्युत् उत्पादन थालेपछि जिल्लामा निजी क्षेत्रबाट यति धेरै आयोजना सम्पन्न भएका हुन् । रन अफ द रिभरको आधारमा यहाँ निर्मित आयोजनाले बर्खायाममा क्षमताअनुसार नै विद्युत् उत्पादन गरे पनि हिउँदयाममा न्यून मात्र विद्युत् उत्पादन गर्ने गरेका छन् ।

प्रकाशित : आश्विन ११, २०७८ ११:०४
प्रतिक्रिया
पठाउनुहोस्

कतै पानीमाथि, कतै फल्याक राखेर वारपार

बजार, विद्यालय र अस्पताल पुग्न जोखिम मोलेर नदी तर्नुपर्ने बाध्यता
अनिश तिवारी

सिन्धुपाल्चोक — घर पुग्ने हतारोमा देखिएकी हेलम्बु गाउँपालिका–७ महाकाल गाउँकी ६३ वर्षीया सुनमाया तामाङ गोरेखोला छेउ पुगेपछि एकाएक रोकिइन् । पक्की मोटरेबल पुलमाथि नै खोला बगिरहेकाले पार गर्न उनलाई सजिलै आँट आएन । चप्पल हातमा लिइन् अनि पुलको छेउको भाग समात्दै बिस्तारै तर्दै गर्दा उनी आत्तिइन् । ‘पुलभरि खोलाले ढुंगा, गेगर, सिसा थुपारेको छ, कतिखेर खोला बढेर बाढी आउने हो ठेगान छैन, यसरी ज्यान हत्केलामा राखेर यात्रा गर्नुपर्छ,’ उनले भनिन् ।

गत असार १ मा हेलम्बुको भेमेथाङ चौर सोहोरिएर आएको मेलम्ची बाढीले ह्योल्मोभूमिको चनौटे रातो मोटरेबल पुललगायत बजार क्षेत्रमा क्षति पुर्‍याएको थियो । त्यसयता यहाँ हिँडडुल गर्न यसैगरी जोखिम मोल्नुपरेको छ । तामाङ पनि बजार क्षेत्र र अस्पताल जान यसरी नै आउजाउ गरिरहेकी छन् । ‘अरू विकल्प नभएपछि यही पुल नतरी सुख छैन, तर्न यस्तो डर मर्नु छ,’ उनले भनिन् । हेलम्बु–७ का सुरेन्द्र पण्डितलाई विद्यालय छुट्टी हुनासाथ घर पुगिँदैन जस्तै लाग्छ ।

स्थानीय भुमेश्वरी माध्यमिक विद्यालयमा कक्षा ७ मा अध्ययनरत पण्डित गोरे खोलाको मोटरेबल पुल तर्न दाइदिदीको सहारा लिन्छन् । यही पुल पार गर्दै उनी दिनहुँ विद्यालय पुग्छन् र फर्कन्छन् । ‘बर्खामासको ठाडो खोला तर्न निकै गाह्रो हुन्छ, त्यसैले अरू कसैको साथ लिएर तर्ने गरेका छौं, एक्लै तर्दा खोलाले बगाउला जस्तो हुन्छ,’ उनले भने ।

असार १ र साउन १७ मा मेलम्ची खोलामा आएको बाढीको लेदोसहित छालले गोरे खोला तर्ने पुल पुरेको थियो । बाढीमा हेलम्बुका स्थानीय र मेलम्ची खानेपानी आयोजनाको कर्मचारी गरी पाँचले ज्यान गुमाएका थिए । उक्त बाढीमा बेपत्ता भएका २० जना अझै भेटिएका छैनन् । खोलाले पुरिएकाले पुलको सतह देख्न सकिँदैन । बाढी आउँदा यो खोला पार गर्न नसकिने गरी झनै ठूलो हुन्छ । पुल माथिबाट खोला बगेपछि स्थानीयलाई आवतजावतमा अप्ठ्यारो भएको छ ।

हेलम्बुको मुख्य बजारमध्ये चनौटेको रातो पुल बगाएपछि महाकाल हुँदै हेलम्बुको १, २ र ७ नम्बर पुग्न गोरे खोला नतरी अर्को विकल्प छैन । सवारी साधनलाई गुडाउनसमेत समस्या हुने गरेको चालकहरू बताउँछन् । ‘कतै खाल्डा छ कि भन्ने भयले सवारी चलाउनुपर्छ, दुर्घटना हुन सक्ने डर उत्तिकै छ,’ सवारी चालक सुमन लामाले भने ।

पानीलाई पुलमुनिबाट पठाउने गरी व्यवस्थापन गर्न जुटिरहेको गाउँपालिका अध्यक्ष निमाग्याल्जेन शेर्पाले बताए । ‘दीर्घकालीन व्यवस्थापनमा जुटेका छौं,’ उनले भने । मेलम्चीबाट हेलम्बुसम्मको बाढीले टुटेको सडक जोड्ने काम गर्न धमाधम सुरु गरिएको उनले बताए । हेलम्बुको चनौटे पुलमा रूखको खाँबो तेर्स्याएर फल्याकको साँघु हाल्न थालिएको छ ।

प्रकाशित : आश्विन ११, २०७८ ११:०३
पूरा पढ्नुहोस्
प्रतिक्रिया
पठाउनुहोस्
×