तेस्रोलिंगीलाई ‘अन्य’ मा गणना- प्रदेश १ - कान्तिपुर समाचार

तेस्रोलिंगीलाई ‘अन्य’ मा गणना

विप्लव भट्टराई

इलाम — यसअघि यकिन तथ्यांक नआउँदा तेस्रोलिंगी यस पटक अन्य लिंगी समुदायमा परेको सरोकारवालाले बताएका छन् । २०६८ सालको जनगणनमा पहिलोपल्ट ‘तेस्रोलिंगी’ को पनि गणना गरिएको थियो ।

तर सामाजिक, पारिवारिकलगायत कारणले यस्ता व्यक्तिहरू खुल्न नसक्दा यकिन संख्या सार्वजनिक हुन नसकेको उनीहरूको भनाइ छ ।

यस पटकको जनगणना प्रश्नावलीमा नै लिंगको महलमा महिला, पुरुष र तेस्रो लिंगीको सट्टा अन्य लिंगी उल्लेख गरिएकाले आधिकारिक तथ्यांक आउने विश्वास गरिएको छ । अन्य लिंगीयअन्तर्गत महिला समलिंगी, पुरुष समलिंगी, द्विलिंगी, तेस्रोलिंगी र अन्तरलिंगी समेटिनेछन् । ‘विगतका जनगणनामा आधिकारिक तथ्यांक नआएकै कारण सार्वजनिकसमेत हुन सकेन,’ यौनिक तथा अल्पसंख्यक समुदायको अधिकारको क्षेत्रमा कार्यरत ब्लुडाइमन सोसाइटीकी गौरी नेपालीले भनिन्, ‘यो पटक आधिकारिक तथ्यांक आउनेमा आशावादी छौं ।’ आधिकारिक तथ्यांककै अभावमा संविधानले दिएका हकअधिकारबाट वञ्चित हुनुपरेको उनीहरू बताउँछन् ।

नेपालको कुल जनसंख्याको ८ देखि १० प्रतिशत यौनिक तथा लैंगिक अल्पसंख्यक रहेको अनुमान गरिएको नेपालीको भनाइ छ । राष्ट्रिय जनगणना २०७८ कोरोनाका कारण बुधबारदेखि मात्र सुरु भएर मंसिर ९ गतेसम्म सम्पन्न गर्ने लक्ष्य राखिएको जिल्ला जनगणना अधिकारी खगेन्द्र कार्कीले जानकारी दिए ।

यस पटकको जनगणनाले वडा तहसम्मको बेग्लाबेग्लै तथ्यांक दिने गरी व्यवस्थापन गरिएको छ । विगतका जनगणनामा जनसंख्याको मात्र तथ्यांक लिने गरिएकोमा यस पटक आर्थिक र सामाजिक तथ्यांकसमेत आउने गरी प्रश्नावली तयार गरिएको छ ।

प्रकाशित : आश्विन ३, २०७८ ०९:०२
प्रतिक्रिया
पठाउनुहोस्

एन्फालाई वाग्मती प्रदेशबाट एक करोड

कान्तिपुर संवाददाता

मकवानपुर — वाग्मती प्रदेश सरकारले अखिल नेपाल फुटबल संघ (एन्फा) लाई चालु आर्थिक वर्ष २०७८/०७९ मा दुई प्रतियोगिताका लागि एक करोड रुपैयाँ उपलब्ध गराउने भएको छ । प्रदेश सरकारले एन्फालाई सहिद स्मारक ‘ए’ डिभिजन लिग र प्रदेश लिग आयोजनाका लागि १ करोड उपलब्ध गराउने भएको हो । 

‘ए’ डिभिजन लिग कात्तिक २९ देखि काठमाडौंमा हुँदै छ । प्रदेश लिगको मिति भने तोकिएको छैन । वाग्मती प्रदेशका सामाजिक विकासमन्त्री विजय सुवेदीको उपस्थितिमा एन्फा अध्यक्ष कर्माछिरिङ शेर्पा र प्रदेश खेलकुद विकास परिषद्का सदस्यसचिव सूर्यलाल भण्डारीले सम्झौतापत्रमा हस्ताक्षर गरेका छन् । सम्झौताअनुसार एन्फालाई पहिलो चरणमा ५० लाख रुपैयाँ उपलब्ध गराइने छ । उक्त रकम ‘ए’ लिगको हरेक खेलमा जित हासिल गर्ने टिमलाई ‘म्याच मनी’ स्वरूप ५० हजार रुपैयाँका दरले प्रदान गरिनेछ । खेल बराबरी भए उक्त रकम आधा बाँडिने सम्झौतामा उल्लेख छ ।

प्रदेशले लिगमा ९१ खेलका लागि ४५ लाख ५० हजार, उदीयमान खेलाडी (राइजिङ प्लेयर) का लागि १ लाख र प्रतियोगितामा अफिसियल खर्चका लागि ३ लाख ५० हजार रुपैयाँ प्रदान गरिने परिषद्का सदस्यसचिव भण्डारीले जानकारी दिए । प्रदेश सरकारले चालु आर्थिक वर्षको नीति तथा कार्यक्रम र बजेटमा यस योजना समावेश गरेको थियो । सदस्यसचिव भण्डारीले म्याच मनीका कारण लिगको दौरानमा हुनसक्ने म्याच फिक्सिङ घटना घट्ने दाबी गरे । ‘खेल जित्ने क्लबलाई पहिलोपल्ट खेलैपिच्छे नगद व्यवस्था गरेका छौं । जसले गर्दा खेल भावनाअनुसार खेलाडी र क्लबहरूलाई अगाडि बढ्न पक्कै सहयोग पुग्नेछ,’ उनले भने ।

एन्फा अध्यक्ष शेर्पाले यस सम्झौताले क्लबहरूलाई खेलप्रति अझै लगाव बढ्ने दाबी गरे । ‘प्रत्येक खेलमा पुरस्कार भएपछि प्रतियोगिता झनै प्रतिस्पर्धात्मक हुनेछ । क्लबले पनि खेल जित्नका सोहीअनुसार तयारी र रणनीति गर्नेछ,’ उनले थपे । एन्फासँग सहकार्यमा प्रत्येक वर्ष प्रदेश लिग सञ्चालन गरिनेसमेत सदस्यसचिव भण्डारीले बताए । ‘ए’ डिभिजन लिग र मोफसलको प्रतियोगिता हेरेर हामी प्रदेश लिग मिति तय गर्नेछौं । त्यसका लागि हामीले खेलको ढाँचा र सहभागी टोली कसरी टुंगो लागाउने विषयमा आन्तरिक तयारी गरिरहेका छौं,’ उनले भने । उनले प्रदेश लिगका लागि एन्फाले सम्पूर्ण प्राविधिक सहयोग उपलब्ध गराउने गरी सम्झौता भएको जानकारी दिए ।(


प्रकाशित : आश्विन ३, २०७८ ०८:५९
पूरा पढ्नुहोस्
प्रतिक्रिया
पठाउनुहोस्
×