धरानमा तिहार पछि मात्र विद्यालय खुल्ने- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

धरानमा तिहार पछि मात्र विद्यालय खुल्ने

प्रदीप मेन्याङ्बो

सुनसरी — कोरोनाको उच्च जोखिम रहेकाले धरान उपमहानगरपालिका क्षेत्रमा दसैं तिहारपछि मात्र विद्यालय खोल्ने नगर कार्यपालिकाको बैठकले निर्णय गरेको छ । 

उपमहानगरपालिकाले असोज ४ गतेदेखि विद्यालय खोल्ने तयारी गरेको थियो । तर बिहीबार बसेको नगर कार्यपालिका बैठकमा वडाध्यक्षहरुले कोरोनाको उच्च जोखिम भएको र बालबालिकालाई कोरोना विरुद्धको खोप पनि नलगाइएकाले हतार गर्न नहुने अडान लिएपछि तिहार पछि मात्र विद्यालय खोल्ने निर्णय गरिएको हो ।

उपमहानगरपालिकाका वरिष्ठ प्रशासकीय अधिकृत गणेशप्रसाद खतिवडाले सरकारको स्वास्थ्य मन्त्रालयले कोरोनाको उच्च जोखिम अझै रहेको जनाउँदै स्कुल खोलीहाल्ने हतार नगर्न विज्ञप्ति जारी गरेको, संक्रामक रोग विशेषज्ञहरुले पनि बालबालिकालाई खोप नलगाइएको अवस्थामा झन् संक्रमण फैलन सक्ने चेतावनी दिएको र संक्रमण पूर्ण रुपमा अन्त्य नभएकाले दसैं-तिहार पछि मात्र खोल्ने निर्णय कार्यपालिका बैठकले गरेको बताए ।

नगर कार्यपालिका प्रवक्ता रहेका वडा नं २० का अध्यक्ष मणिराम राईले चाडपर्वहरु पनि नजिकिएको र बिदा हुने बेलामा बालबालिकालाई पनि संक्रमण हुनसक्ने देखिएकाले दसैं तिहारपछि मात्र विद्यालय खोल्ने निर्णय गरिएको बताए ।

उनले भने, ‘स्वास्थ्य मापदण्ड भए पनि विद्यालयमा बालबालिकाहरु एकैठाउँ रहने र खेल्ने, पढ्ने भएकाले कोरोना संक्रमणको दर नघटेसम्म विद्यालय खोल्न उचित नदेखिएको अधिकांश वडाध्यक्षहरुले अडान लिएपछि दसैं तिहार पछि मात्र स्कुल खोल्ने निर्णय भएको छ ।’

धरानमा अझै पनि दैनिक ३० देखि ५० जना कोरोना संक्रमित थपिरहेका छन् ।

प्रकाशित : भाद्र ३१, २०७८ १६:३२
प्रतिक्रिया
पठाउनुहोस्

मध्यपुरमा तिहार पछि मात्रै विद्यालय सञ्चालन : नगर प्रमुख श्रेष्ठ

रासस

भक्तपुर — मध्यपुरथिमि नगरपालिकाका प्रमुख मदनसुन्दर श्रेष्ठले सनकको भरमा हतारिएर विद्यालय सञ्चालन नगर्न प्याब्सनलाई आग्रह गरेका छन् । 

बिहीबार निजी तथा आवासीय विद्यालय संगठन (प्याब्सन) मध्यपुर नगर समितिको दोस्रो अधिवेशनको उद्घाटन गर्दै उनले अरु जिल्लामा विद्यालय खालियो भन्दै हतारिएर विद्यालय खोले पछुताउनु पर्ने बताएका हुन् ।

१८ वर्ष माथि उमेरकाले कोभिड विरुद्धको भ्याक्सिन लगाए पनि १८ वर्ष मुनिका बालबालिकामा तेस्रो लहरको कोभिडको जोखिम कायमै रहेको भन्दै उनले मध्यपुरथिमि नगरपालिकाले उपत्यकाका १८ वटा नगरपालिका भन्दा पछि मात्रै विद्यालय खोल्ने अनुमति दिने बताए ।

दसैंमा घर गएर आउनेहरुले थप कोभिडको जोखिम बढाउने भन्दै उनले दसैं पछाडि विद्यालय सञ्चालनका लागि पूर्वाधारको तयारी गर्ने र कोभिड महामारीको अवस्था हेरेर मात्रै तिहार पछि विद्यालयमा भौतिक उपस्थितिमा पठनपाठन सञ्चालन गर्ने उनको भनाइ थियो ।

नगर प्रमुख श्रेष्ठले भने, 'सनकको भरमा विद्यालय सञ्चालन गर्दा कोभिडका कारण एउटा विद्यार्थीको मात्रै ज्यान गयो भने के हुन्छ ? त्यसैले भौतिक रुपमा विद्यालय सञ्चालन गरेपछि कुनै पनि विद्यार्थीको भौतिक क्षति नहुने गरि विद्यालय सञ्चालन गर्नुपर्छ अहिले विद्यालय खोल्न हतार नगरौं ।'

कार्यक्रममा प्याब्सनका केन्द्रीय उपाध्यक्ष दीपिका थापा रिमालले कोभिडका कारण विद्यालय चल्नै नसक्ने गरी नाजुक अवस्थामा पुगेको भन्दै अनलाइन कक्षा प्रभावकारी नभएकाले भौतिक रुपमानै विद्यालय सञ्चालन गर्न नगरपालिकाले अनुमति दिनुपर्नेमा जोड दिइन् । उनले विद्यालय सञ्चालनमा मापदण्ड निर्धारण गर्ने र हरेक साता अनुगमन गर्दै मापदण्ड पुरा नगर्नेलाई कारबाही गर्ने नीति लिएर पनि दसैं अगाडि विद्यालय सञ्चालन गर्न पाउनु पर्ने बताइन् ।

प्याब्सन केन्द्रीय सचिव भुवनलाल श्रेष्ठले कोभिडका कारण विद्यालय सञ्चालक निकै पीडामा परेको भन्दै असोज १ गतेदेखि अन्त जस्तै यहाँ पनि विद्यालय सञ्चालन गर्ने व्यवस्था गर्नुपर्नेमा जोड दिए ।

उनले बजारदेखि बस, रेष्टुरेष्ट जताततै भीड गर्न हुने तर विद्यालय सञ्चालन गर्ने कुरा आउँदा हुँदैन भन्ने प्रवृत्तिनै गलत भएको भन्दै दसैंमा शिक्षक/कर्मचारीलाई तलब खुवाउन सक्ने अवस्थासमेत नभएको बताए ।

अधिवेशनले निलेश आचार्यको अध्यक्षतामा नयाँ कार्यसमिति सर्वसम्मत चयन गरेको छ । उपाध्यक्षमा शंकरकर्ण कायस्थ, सचिवमा रत्नमान शंखदेव, कोषाध्यक्षमा सुमन बस्नेत र सदस्यहरुमा आशाहरि प्रजापति, बुद्ध बााडे, मनोज दिक्षित आचार्य, कृष्णहरि धवा श्रेष्ठ र अनिता श्रेष्ठलाई चयन गरेको छ ।

प्रकाशित : भाद्र ३१, २०७८ १६:२६
पूरा पढ्नुहोस्
प्रतिक्रिया
पठाउनुहोस्
×