सरकारी कार्यालयमै थन्किन्छन् सवारीसाधन

खास गरी चोरीका सवारी, लागूपदार्थ ओसारपसारमा प्रयोग गरिएका, विभिन्न आपराधिक गतिविधिमा प्रयोग गरिएका र दुर्घटनामा संलग्न सवारीहरू अदालतले दसी प्रमाणका रूपमा नियन्त्रणमा लिएको हो । ‘गाडी लिलाम गर्न मुद्दाको फैसला नै पर्खनुपर्ने बाध्यता हुन्छ,’ पाण्डेले भने, ‘जसका कारण गाडी कवाडी बन्ने गर्छन् ।’

उनका अनुसार कतिपय गाडी प्रहरीबाट अदालतमा पेस गर्दा नै कवाडी बनिसकेको पनि पाइएको छ । अदालतमा हाल दर्ता हुनै नसक्ने स्थितिका केही गाडीसमेत छन् । गत वर्ष अदालतले राम्रो कन्डिसनका २६ थान बाइक लिलामीका लागि दुई पटकसम्म सूचना प्रकाशित गर्‍यो । तर, दुवै पटक बाइक बिकेन । यस पटक पुनः २१ वटा बाइक लिलामीका लागि छनोट गरी प्रक्रियासमेत सुरु गरिसकिएको छ ।

‘महिना दिनभित्र लिलामी गर्छौं,’ पाण्डेले भने । डिभिजन वन कार्यालय झापामा पनि सवारीको हविगत उस्तै छ । कार्यालयले विभिन्न समयमा बरामद गरेका ती सवारी बेलामा लिलामी गर्न नसक्दा त्यसै कवाड भएका हुन् । खासगरी काठ तस्करीमा प्रयोग भएका सवारीहरू लामो समयदेखि कार्यालयमा थन्किएका हुन् ।

डिभिजन वन कार्यालय र सबडिभिजन वन कार्यालय सुरुंगामा थन्किएका गाडी समयमै लिलाम–बिक्री नगरिँदा कामै नलाग्ने अवस्थामा पुगेका हुन् । ट्रक, पिकअप, ट्र्याक्टरलगायत गाडी वन कार्यालय परिसरमै झारजंगलले ढाकेको छ । डिभिजन वन कार्यालय झापामा १२ र सबडिभिजन वन कार्यालय सुरुंगामा २५ गरी ३७ वटा गाडी वर्षौंदेखि कार्यालय परिसरमै थन्किएको डिभिजन वन कार्यालयका सहायक वन अधिकृत तथा सूचना अधिकारी ओमनाथ भट्टराईले जनाए । ‘झन्झटिलो प्रक्रियाका कारण हालसम्म यी सवारीको लिलाम बिक्री गर्न सकिएको छैन,’ भट्टराईले भने । गाडीका पार्टपुर्जा खिया लाग्न थालेको छ । कतिपयको पार्टपुर्जा चोरिएको छ ।

अदालत र वनमा मात्रै होइन सडक, प्रहरी, भन्सार, सिँचाइ, नगरपालिका आदि अधिकांश सरकारी कार्यालयको अवस्था उही छ । प्रायःजसो प्रहरी कार्यालयहरूमा सवारी वर्षौंदेखि थन्किएको पाइएको छ । वडा प्रहरीदेखि जिल्ला प्रहरी कार्यालयसम्म थोत्रा सवारी अलपत्र अवस्थामा देख्न सकिन्छ । जिल्ला प्रहरी कार्यालय परिसरमा करिब सय बढी सवारी थन्किएका छन् ।

मोटरसाइकलदेखि बस र ट्रकसम्म थन्किएर बसेका छन् । प्रहरीका अनुसार चोरीका, विभिन्न आपराधिक गतिविधिमा प्रयोग गरिएका, दुर्घटनामा संलग्न, नक्कली नम्बर प्लेट लगाएर चलाइएका, भारतीय नम्बर प्लेटमा नेपाली नम्बर लगाएर चलाइएका गाडीहरू कार्यालय परिसरमा थन्किएका हुन् ।

‘विभिन्न मुद्दाका धेरै गाडीहरू छन्,’ झापाका प्रहरी प्रवक्ता डीएसपी राकेश थापाले भने, ‘सबै लिलामी गर्नुपर्ने नहुन पनि सक्छन् ।’ उनका अनुसार लिलामी गर्नुपर्ने गाडीहरू भन्सार बुझाइन्छ । तर, यी सवारी किन कार्यालयमै अलपत्र छन् भन्नेबारे कार्यालयसँग यकिन जानकारी र तथ्यांक पनि छैन ।

मेची भन्सार कार्यालयमा सबभन्दा बढी सवारी थन्किएका छन् । तीन वर्षदेखि लिलाम बिक्री हुन नपाएका कारण ती सवारी कार्यालय परिसरमा थन्किएका हुन् । भन्सारमा हाल करिब डेढ करोड मूल्य बराबरका १ सय ३६ थान सवारी लिलाम बिक्रीको पर्खाइमा छन् ।

भन्सार प्रमुख ध्रुवराज विश्वकर्माले करिब तीन वर्षदेखि लिलाम हुन नपाएका ती सवारीको लिलामी प्रक्रिया सुरु भइसकेको जनाए । ‘सबै प्रक्रिया पूरा गरेर लिलामीको प्रक्रियामा थियौं, निषेधाज्ञाले थोरै समस्या भइदियो,’ उनले भने, ‘अब चाँडै लिलामीको सूचना प्रकाशित गर्छौं ।’

यसअघि भन्सारले ढिलो लिलामी गरेका कारण करोडौंका सवारी कवाडीको भाउमा बिक्री गर्नुपरेको थियो । बरामद गर्दा नयाँ रहेका सवारी पनि लिलाम गर्ने बेलामा कवाडीमा परिणत हुने गरेका उदाहरण धेरै छन् ।