उर्लाबारीमा चक्कु प्रहार गरी किशोरको हत्या- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

उर्लाबारीमा चक्कु प्रहार गरी किशोरको हत्या

देवनारायण साह

मोरङ — उर्लाबारी नगरपालिका–८ थारु टोलमा सोमबार एक किशोरको चक्कु प्रहार गरी हत्या भएको छ । अर्का एक जना घाइते छन् । १७ वर्षीय अभिषेक चौधरीको चक्कु प्रहारबाट हत्या भएको हो ।

४ वटा मोटरसाइकलमा आएका उर्लाबारी–८ कदम टोलका ७/८ जनाको समूहले अपराह्न १२ बजेर १५ मिनेटतिर छिमेकी दाइ भुरन चौधरीको आँगनको ट्युबवेलमा पानी खाइरहेको बेला अभिषेक र उनका साथी सुशन धामीलाई चक्कु प्रहार गरी घाइते बनाएको उर्लाबारी–८ का वडा सदस्य लक्ष्मी ढुंगानाले बताए ।

‘मोटरसाइकलमा आएका केटाहरुले माछा मारेर घर आएपछि ट्युबवेलमा हातखुट्टा धोइ पानी खाइरहेको बेलामा जबर्जस्ती समातेर चौधरीको कोखालगायतको शरीरको विभिन्न भागमा चक्कु प्रहार गरी घाइते बनाका थिए,’ उनले भने, ‘घाइते अभिषेकलाई तत्काल उर्लाबारीको अरनिको अस्पताल लगिएको तर त्यहाँ उपचार सम्भव नभएपछि बिर्तामोडको बिएण्डसी अस्पताल रिफर गरिएको थियो ।’

बिएण्डसी अस्पताल लगेपछि चिकित्सकले अभिषेकलाई मृत घोषणा गरेको इलाका प्रहरी उर्लाबारीका प्रमुख प्रहरी निरीक्षक राजाराम खड्काले बताए ।

खड्काका अनुसार उनीहरुको चक्कु प्रहारले तिघ्रालगायत शरीरका विभिन्न भागमा चोट लागेका धामीको अरनिको अस्पतालमा उपचार भइरहेको छ ।

घटनामा संलग्न भएको आशंकामा कदम टोलका १८ वर्षीय निशान राई, राकेश कार्की र पवन कार्कीलाई नियन्त्रणमा लिएर अनुसन्धान भइरहेको उनले बताए । घटना के–कति कारणले भएको र कसको चक्कु प्रहारबाट अभिषेकको मृत्यु भएको लगायत विषयमा अनुसन्धानपछि मात्रै भन्न सकिने प्रहरी निरीक्षक खड्काले बताए ।

स्थानीय समेत रहेका वडा सदस्य ढुंगानाले दुई छिमेकी टोल थारु टोल र कदम टोलका किशोरहरुको सामूहिक झगडामा अभिषेकको ज्यान गएको बताए । ‘कदम टोलका केटाहरुले आइतबार पनि थारु टोलमा आएर झगडा गरेर गएका थिए,’ उनले भने, ‘मोटरसाइकलमा आएका केटाहरुले ट्युबवेलमा पानी खाइरहेका अभिषेकसँग एक शब्द पनि नबोली समातेर नजिकैको शौचालयको पर्खाल नजिक लगेर चक्कु प्रहार गरेर भागेका थिए ।’

जिल्ला प्रहरी कार्यालय मोरङका प्रमुख प्रहरी उपरीक्षक जनार्दन जिसीले दुई टोलका किशोरहरुले फुटबल खेल्ने क्रममा भएको विवादले घटना भएको प्रारम्भिक अनुसन्धानबाट देखिएको बताए । उनले जिल्ला प्रहरी कार्यालय र इलाका प्रहरी उर्लाबारीको संयुक्त टोलीले घटनाको अनुसन्धान गरिरहेकोले अनुसन्धानबाट थप कुरो खुल्ने बताए ।

प्रकाशित : श्रावण ११, २०७८ १९:०६
प्रतिक्रिया
पठाउनुहोस्

फेरि गाँज्यो कोरोनाले, तेस्रो लहरको जोखिम

भारतसँगको खुला आवागमनलाई तत्काल रोकेर व्यवस्थित गर्न विज्ञको सुझाव 
दैनिक संक्रमण बढिरहे पनि सर्वसाधारणले स्वास्थ्य सुरक्षा मापदण्ड अपनाइरहेका छैनन्
देवनारायण साह

विराटनगर — निषेधाज्ञा खुकुलो बनाएपछि प्रदेश १ मा पछिल्लो समय कोरोना संक्रमणको दर बढ्न थालेको छ । यस प्रदेशमा शनिबार २७ दशमलव ६८ प्रतिशत रहेको संक्रमण दर आइतबार बढेर २८ दशमलव ६१ पुगेको छ । 

विराटनगर-१७ स्थित अस्थायी प्रहरी पोस्ट मटेरुवा अगाडिबाटै निर्बाध भारत आवतजावत गर्नेको लर्को । तस्बिर : देवनारायण साह/कान्तिपुर

आइतबार १ हजार ५ सय ८५ जनाको पीसीआर परीक्षण गरिएकामा ४ सय ५७ र एन्टिजेन परीक्षण गरिएका ७ सय ६७ जनामध्ये २ सय १६ गरी कुल ६ सय ७३ जनामा कोरोना संक्रमण पुष्टि भएको छ । ९ संक्रमितको मृत्यु भएको सामाजिक विकास मन्त्रालयले जनाएको छ । यस्तै, प्रदेश १ मा शनिबार १ हजार ६ सय ६१ जनाको पीसीआर परीक्षण गरिएकामा तीन सय ३८ र २ हजार २ सय ८१ जनाको एन्टिजेन परीक्षण गरिएकामध्ये ७ सय ५३ गरी कुल १ हजार ९१ जनामा कोरोना संक्रमण पुष्टि भएको थियो । शनिबार नै ८ जना संक्रमितको मृत्यु भएको मन्त्रालयले जनाएको हो ।

प्रदेशमा शुक्रबार २४ दशमलव ३० प्रतिशतमा संक्रमण पुष्टि भएको थियो । ३ हजार चार सय ८६ जनाको कोरोना परीक्षण गर्दा आठ सय ४७ जनामा संक्रमण पुष्टि भएको थियो भने कोरोना संक्रमणले ८ जनाको मृत्यु भएको मन्त्रालयले जनाएको छ । बिहीबार २ हजार ६ सय ४ जनाको कोरोना परीक्षण गर्दा २९ दशमलव ८८ प्रतिशत अर्थात् सात सय ७८, बुधबार ३ हजार ८७ जनाको परीक्षण गर्दा ३० दशमलव ३९ प्रतिशत अर्थात् नौ सय ३८ र मंगलबार ३ हजार ६ सय ६० को परीक्षण गर्दा ३० दशमलव १९ प्रतिशत अर्थात् १ हजार एक सय ५ जनामा संक्रमण पुष्टि भएको मन्त्रालयले जनाएको छ ।

झापामा एक सय ७५, मोरङमा एक सय ८०, सुनसरीमा एक सय २१, इलाममा ११, उदयपुरमा ३२, संखुवासभामा १२, तेह्रथुममा २०, धनकुटामा १६, खोटाङमा १४, ताप्लेजुङमा ६, पाँचथरमा ३६, भोजपुरमा २५, ओखलढुंगामा १३ र प्रदेश १ बाहिरका ११ जनामा आइतबार संक्रमण पुष्टि भएको मन्त्रालयले जनाएको छ । प्रदेशमा हालसम्ममा पीसीआर परीक्षणमा ८१ हजार ३ सय ९३ र एन्टिजेन परीक्षणमा २६ हजार ६ सय ८ जनामा संक्रमण पुष्टि भएको मन्त्रालयले जनाएको छ । पीसीआर परीक्षणमा संक्रमण पुष्टि भएकामध्ये हाल ६ हजार दुई सय ६६ जना सक्रिय संक्रमित छन् । जसमा विभिन्न अस्पतालमा पाँच सय २६ र आइसोलेसन केन्द्रमा दुई सय ४५ जना उपचाररत रहेको मन्त्रालयले जनाएको छ ।

एन्टिजेन परीक्षणमा संक्रमण देखिएकाको उपचारको अवस्थाबारे मन्त्रालयले तथ्यांक सार्वजनिक गरेको छैन । यस प्रदेशमा आइतबार तीन सय ५२ जना संक्रमणमुक्त भएका छन् भने ५ महिला र ४ पुरुषको कोरोना संक्रमणले मृत्यु भएको मन्त्रालयले जनाएको छ । पछिल्लो समय दैनिक संक्रमण बढिरहे पनि सर्वसाधारणले स्वास्थ्य सुरक्षा मापदण्ड अपनाइरहेको भने देखिँदैन । कोरोना संक्रमण पुनः तीव्र गतिमा बढ्ने देखिएकाले सचेतता अपनाउनुको विकल्प नभएको चिकित्सकहरूको भनाइ छ । कोरोनाको तेस्रो लहरले संक्रमितको संख्या बढिरहेको भारतसँग पूर्व र पश्चिममा सिमाना जोडिएको यस प्रदेशस्थित सीमा नाकाहरूमा सर्वसाधारणले निस्फिक्री भारततर्फ आउजाउ गरिरहेकाले संक्रमणको जोखिम उच्च रहेको छ ।

यस प्रदेशमा संक्रमण बढिरहेका जिल्लाहरूमा जिल्ला प्रशासन कार्यालयहरूले विभिन्न सर्तसहितको निषेधाज्ञा साउन १५ गतेसम्मका लागि जारी गरेको छ । प्रदेशको राजधानी मोरङ जिल्ला प्रशासनले बिहान ५ बजेदेखि साँझ बजेसम्म मात्रै पूर्ण रूमा स्वास्थ्य सुरक्षा मापदण्ड अपनाएर बजार पसल सञ्चालन गर्न पाउने गरी साउन १४ मध्य रातिसम्मका लागि निषेधाज्ञा जारी गरेको छ । मोरङका प्रमुख जिल्ला अधिकारी कोषहरि निरौलाले संक्रमण बढिरहेकाले गुद्री बजार, साप्ताहिक हटिया, पार्टी प्यालेस, जिमखाना, खेलकुद गतिविधि, धार्मिक, सांस्कृतिक, मेला, सामूहिक भेला, सभा, गोष्ठी, शैक्षिक संस्था, विवाह, व्रतबन्ध र सीमानाका बन्द रहने व्यवस्था गरेको बताए ।

प्रजिअ निरौलाले सीमानाका बन्द रहने व्यवस्था गरे पनि सुरक्षाकर्मीहरूले तस्करीको लाइन चलाउन सहायक तथा चोर नाकाहरू खुला गरेकाले भारततर्फ आउने जानेको घुइँचो लाग्ने गरेको छ । विज्ञहरूले तेस्रो लहर कोरोनाको दोस्रो लहरभन्दा पनि खतरनाक हुने र बालबालिकाहरू बढी जोखिममा पर्ने भएकाले पूर्वतयारी गर्न सुझाव दिँदै आएका छन् ।

कोसी अस्पतालका प्रवक्ता डा. लक्ष्मीनारायण यादवले निषेधाज्ञा खुलेसँगै संक्रमणमा वृद्धि भइरहेकाले स्वास्थ्य सुरक्षा मापदण्ड पूर्णरूपमा पालना गर्नुको विकल्प नभएको बताए । उनले भारतमा कोरोनाको तेस्रो लहरका संक्रमित बढिरहेकाले नेपालमा पनि यसको जोखिम उच्च रहेको हुँदा सबैलाई सचेतता अपनाउन आग्रह गरे । उनले भारतबाट भइरहेको खुला अवागमनलाई तत्काल रोकेर व्यवस्थित अवागमन गराउनतिर सबैको ध्यानाकर्षण हुनु जरुरी रहेको बताए ।

सामाजिक विकास मन्त्री उषाकला राईले कोरोनाको तेस्रो लहर फैलिने जोखिम भएकाले सीमानाकामा भइरहेको आउजाउ तत्काल रोक्न सीसीएमसीको बैठकमा प्रस्ताव राख्ने र मुख्यमन्त्रीसँग पनि कुरा गर्ने बताइन् ।

‘तेस्रो चरणको कोरोना संक्रमणमा बालबालिकाहरू जोखिममा पर्ने विज्ञहरूको भनाइलाई गम्भीरतापूर्वक लिएर तयारी थालेका छौं,’ उनले भनिन्, ‘प्रदेश मातहतका अस्पतालहरूलाई कोरोनाको तेस्रो लहरका लागि तयारी अवस्थामा रहन निर्देशन दिनुका साथै आवश्यक छलफल गर्दै आएको छु ।’ स्थानीय तहहरूसँग पनि तेस्रो लहरका लागि आवश्यक तयारी गर्न लागिपरेको मन्त्री राईले बताइन् ।

प्रकाशित : श्रावण ११, २०७८ १२:४९
पूरा पढ्नुहोस्
प्रतिक्रिया
पठाउनुहोस्
×