हिलाम्मे सडकमा एम्बुलेन्सलाई सास्ती- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

हिलाम्मे सडकमा एम्बुलेन्सलाई सास्ती

आनन्द गौतम

ताप्लेजुङ — बिरामी लिन मिक्वाखोला गाउँपालिका–२ खोक्लिङ जाँदै गरेको एम्बुलेन्स फुङलिङ नगरपालिका–३ सिम्लेको सितले भीरनजिकको बाटोमा अड्यो । जिल्ला अस्पतालको उक्त एम्बुलेन्स आधा घण्टासम्म प्रयास गर्दा पनि निकाल्न नसकेपछि भूपू सैनिक संस्थाको एम्बुलेन्स झिकाइयो ।

ताप्लेजुङको फुङलिङ–३ सितलेमा हिलोमा फसेको एम्बुलेन्स निकाल्ने प्रयास गरिँदै। तस्बिर : आनन्द/कान्तिपुर

त्यो एम्बुलेन्स पनि सितले भीरको बाटो हुँदै एक किलोमिटर अगाडि सिम्ले पुगेर रोकियो । त्यसपछि एम्बुलेन्स चालक योगेश भट्टराईले बिरामीका आफन्तलाई सडक बिग्रेका कारण आउन नसक्ने जानकारी गराए । बाटोमा फसेका दुवै एम्बुलेन्स निकाल्न सिम्ले अस्थायी प्रहरी चौकीका इन्चार्ज धनराज तुम्बापोसहितका प्रहरी टोली र स्थानीयले ठेल्ने, तान्ने गरे पनि बिरामीको उद्धार गर्न भने सकेनन् । पत्ती भाँचिएपछि दुवै एम्बुलेन्स ग्यारेजमा पुगे ।

यो ताप्लेजुङको निर्वाचन क्षेत्र क र ख जोड्ने एक मात्र सडक हो । उक्त सडक भएर आठराई त्रिवेणी, मिक्वाखोला, मैवाखोला र मेरिङदेन गाउँपालिकाका बासिन्दा सदरमुकाम फुङलिङ आउजाउ गर्छन् ।

लगातारको वर्षाका कारण अहिले जिल्लाका अधिकांश सडक अवरुद्ध भएका छन् । ‘ट्रक र ट्र्याक्टरको ठूला पांग्राले बाटोमा खाल्टो पारेको हुन्छ,’ एम्बुलेन्स चालक भट्टराईले भने, ‘साना पांग्राका एम्बुलेन्स त्यहीं फस्छन् ।’ छेउतिर बलगरे भीरमुनि र भित्तातिर बलगरे पहरामा ठोकिएर उछिट्टिने डर हुने उनले बताए ।

नजिक भए तान्न मेसिन वा ट्र्याक्टर नत्र मान्छे खोजेर निकाल्नुपर्ने अवस्था धेरै सडकमा भएको उनले बताए । अहिले त सडक माथिबाट खसेको पहिरोले पनि अधिकांश सडकको भित्ताको भाग पुरिएकाले यातायात चलाउनै कठिन हुने एम्बुलेन्स चालकको गुनासो छ । एक नगरपालिका र आठवटा गाउँपालिका भएको जिल्लामा ६१ वटा वडा छन् । यीमध्ये ५९ वटा वडामा सडक पुगेको छ । हिउँदमा सबै ठाउँमा यातायात पुग्छ । तर ट्र्याक खोल्ने, स्तरोन्नति नगर्ने प्रवृत्तिका कारण अधिकांश सडक बर्खामा बन्द हुन्छन् ।

गाउँको त के सदरमुकामकै सडक पनि बर्खामा अवरुद्ध हुने गरेको चालकहरू बताउँछन् । ‘अहिले त कोरोनाका कारण कम यातायात चलेको छ,’ ट्याक्सी काउन्टरका इन्चार्ज टिकेन्द्र नेपालीले भने, ‘संक्रमण नहुँदा पनि बर्खामा साह्रै कम यातायात चल्छ ।’ हिउँदमा दुई/तीन सय साना गाडी चल्ने जिल्लामा बर्खामा ५०/६० वटाभन्दा बढी नहुने उनले बताए । बर्खा लागेपछि साना सवारी तराईतिर झर्ने र घरमै थन्किने गरेका छन् । जिल्लामा भएका पनि ताप्लेजुङदेखि पाँचथर–इलाम–झापा चल्ने गरेको नेपाली बताउँछन् ।

फुङलिङ नगरपालिका प्रमुख छत्रपति प्याकुरेल ट्र्याक खोल्ने सडकहरू सकिँदै गएकाले अब स्तरोन्नतिमा लाग्ने बताउँछन् । भौगोलिक हिसाबले डोल्पा र हुम्लापछिको तेस्रो ठूलो जिल्लामा कालोपत्र सडक भने ५५ किलोमिटर मात्रै छ । त्यो पनि काबेलीदेखि सुकेटारसम्मको मेची राजमार्ग र केही शाखा सडकहरू मात्रै छन् ।

प्रकाशित : श्रावण ३, २०७८ ०८:५२
प्रतिक्रिया
पठाउनुहोस्

गाउँपालिकाहरूमा आँखा उपचार केन्द्र स्थापना

आनन्द गौतम

कुम्यायक, पाँचथर — पाँचथरको कुम्यायक गाउँपालिकाले आँखा उपचार केन्द्र स्थापना गर्ने भएको छ । गाउँपालिका अध्यक्ष जयबहादुर चेम्जोङको सल्लाहमा नेपाल नेत्रज्योति संघका आजीवन सदस्य रहेका प्रमुख प्रशासकीय अधिकृत गणेश अधिकारीले संघसँग समन्वय गरेर आँखा उपचार केन्द्र स्थापनाको गृहकार्य बढाएका हुन् ।

पाँचथरमा कार्यालय नभएकाले ताप्लेजुङ शाखाका सभापति मुक्तिराज पौडेल र गाउँपालिका अध्यक्ष चेम्जोङले आर्थिक वर्षदेखि सुरु गर्ने गरी असार २६ गते सम्झौता गरेका छन् ।

केन्द्र स्थापनाका लागि गाउँपालिकाले ७ लाख रुपैयाँ बजेट छुट्याएको छ । गाउँपालिकाले नेत्रज्योति संघलाई यो रकम एकमुष्ट र स्वास्थ्य पढेका दुई जना कर्मचारी छनोट गरेर दिने र संघले उपचार केन्द्र स्थापनादेखि उपकरण, कर्मचारीको तलबलगायतको व्यवस्थापन गर्ने सम्झौतामा उल्लेख छ । प्रशासकीय अधिकृत अधिकारीका अनुसार गाउँसभा सकिएकाले विविध खर्चबाट दिने गरी कार्यपालिका बैठकले आँखा उपचार केन्द्र राख्ने निर्णय गरेको हो ।

ताप्लेजुङको आठराई त्रिवेणी र मेरिङदेन गाउँपालिकाले पनि संयुक्त बजेट व्यवस्था गरी दोभान बजारमा उपचार केन्द्र राख्ने निर्णय गरेका छन् । दुवै गाउँपालिकाको केन्द्र पर्ने भएकाले दोभानमा राख्ने निर्णय गरिएको केन्द्रका लागि चार/चार लाख रुपैयाँ विनियोजन गरेका छन् । कर्मचारी छनोट गरी तालिमका लागि नेत्रज्योति संघलाई जिम्मा दिएका छन् । डिचेन डोङगला आँखा उपचार केन्द्र ताप्लेजुङका इन्चार्ज काजी गुरुङका अनुसार जनशक्ति दक्ष भइसकेको छ । साउनदेखि केन्द्र सञ्चालनमा आउने छ । कार्यालय व्यवस्थापन र उपकरण खरिदको काम भइसकेको गुरुङले बताए । दुवै गाउँपालिकासँगको समन्वयमा साउन पहिलो सातादेखि सुरु गर्ने तयारी छ ।

कोरोना संक्रमणपछि स्थानीय तह स्वास्थ्य संस्थालाई व्यवस्थित बनाउने र अरू थप गर्ने क्रममा लागेका छन् । प्रदेशमा अनुरोध गरेर आयुर्वेद केन्द्र ल्याएर सञ्चालन गरेको उनले सुनाए । आयुर्वेद केन्द्रका लागि जनशक्ति प्रदेशले दिएको छ भने व्यवस्थापन गाउँपालिकाले गरेको छ । गाउँपालिकामा डाक्टर राख्ने चाहना अझै पूरा नभएको उनले सुनाए । तर बर्थिङ सेन्टरसहितको स्वास्थ्यचौकी छ । २५ किलोमिटर दूरीमा सदरमुकाम फिदिम रहेकाले बिरामी अलि सिकिस्त भए तत्काल फिदिम लैजाने गरी व्यवस्थापन गरिएको उनले बताए । धरानबाट ९२ किलोमिटर दूरी भएकाले विभिन्न किसिमका डाक्टर झिकाएर शिविर सञ्चालनका लागि पनि गाउँपालिकाले बजेट छुट्याएको छ ।

सिरिजंगा गाउँपालिका अध्यक्ष टीका गुरुङ दरबन्दी भएर पनि सरकारले डाक्टर नपठाएपछि गाउँपालिकाले नै डाक्टर राखेको बताउँछन् । महिलालाई सुत्केरी गराउन आठ/नौ घण्टा लाग्ने सदरमुकाम फुङलिङ, पाँचथरको फिदिम लानुपर्ने र पोस्टमार्टमका लागि पनि सदरमुकाम नै पुर्‍याउनुपर्ने भएकाले डाक्टरका लागि बजेट छुट्याएको उनले बताए । यस गाउँपालिकाले त डाक्टर पढ्नेका लागि वार्षिक १३ लाख रुपैयाँ सहयोग गर्ने गरी बजेट विनियोजन गरेको छ । अहिले हरेक गाउँपालिका स्वास्थ्यचौकीमा डाक्टर र स्टाफ नर्स तथा आयुर्वेद, आँखा उपचार केन्द्र स्थापनामा लागेको जिल्ला स्वास्थ्य कार्यालयबाट अवकाश भएका पूर्वजनस्वास्थ्य अधिकृत डिल्ली पौडेल बताउँछन् ।

प्रकाशित : असार २९, २०७८ १०:३१
पूरा पढ्नुहोस्
प्रतिक्रिया
पठाउनुहोस्
×