आगलागीपीडितलाई बाढीको पनि चिन्ता- प्रदेश १ - कान्तिपुर समाचार

आगलागीपीडितलाई बाढीको पनि चिन्ता

भीरको फेदमा रहेको दोभान बजार बाढीसँगै आगलागीको जोखिममा
आनन्द गौतम

ताप्लेजुङ — मेरिङदेन गाउँपालिका ३ दोभान बजारकी कल्पना तामाङलाई आगलागीपछि घर ठड्याउँदै गर्दा बर्खा कसरी काट्नुहोला भन्ने चिन्ता थियो । आगलागीको एक महिनापछि घर बनाउन थालेकी उनले सकेसम्म खोलाले असर नपुर्‍याउने गरी डिल उठाएर घर बनाइन् ।

दर्कने पानी परेर खोलो सुसाउन थालेपछि मन झसंग हुने गरेको छ । आगोको पीडाबाट तंग्रिन नपाउँदै बाढीको चिन्ताले पिरोल्ने गरेको हो । प्रदिप पोख्रेलको अवस्था पनि यस्तै छ । गत फागुन १८ गते बिहान लागेको आगोमा सारा सम्पत्ति गुमाएका उनले ऋण खोजेर टहरो ठड्याएका छन् । व्यापार गर्ने उद्देश्यले आगलागी भएकै ठाउँमा घर बनाएका उनलाई पनि वर्षे झरीले तर्साउने गरेको छ ।

फुङलिङ सदरमुकामदेखि १७ किलोमिटर दूरीमा रहेको दोभान बजार तमोर र मैवा नदीको बीचमा छ । यो ताप्लेजुङको निर्वाचन क्षेत्र १ र २ जोड्ने एक मात्र मुख्य बजार हो । यहाँ सदरमुकाम फुङलिङको जत्तिकै व्यापार हुने गरेको छ । नौवटा स्थानीय तह रहेको जिल्लाका आठराई त्रिवेणी, मेरिङदेन, मिक्वाखोला र मैवाखोला गाउँपालिकाको मुख्य व्यापारिक केन्द्र हो । फुङलिङ नगरपालिकाको १, २ र ३ नम्बर वडाका बासिन्दा पनि कारोबारका लागि यही पुग्छन् । तर यो बजार बाढी र आगलागीको जोखिममा छ । भीरको फेदमा रहेको बजारमा गत फागुन १८ गते आगलागी हुँदा ५० वटा घर जले । ४० करोड ५ लाख रुपैयाँ बराबरको क्षति भयो । २०७२ साल जेठमा आएको बाढीले बजारको तल्लो भाग बगाएर लग्यो । यहाँको चर्चित कान्छी रिसोर्टलगायत महँगा संरचना बगाइदियो । बजारका बासिन्दा फुङलिङ नगरपालिका तरेर कैयौं रात बिताए ।

बाढीपछि मैवाखोलालाई रोक्न तारजाली लगाएर सामान्य प्रयास गरिएको छ । ‘माथिबाट बाढी उर्लेर आएमा नभत्काउला भन्न सकिँदैन,’ मेरिङदेन गाउँपालिकाका प्रवक्ता सूर्यप्रसाद बराइली भन्छन्, ‘गाउँपालिकाको सानो बजेटले पार लाग्दैन, प्रदेश र केन्द्रसँग अनुरोधचाहिँ गरिरहेका छौं ।’ यहाँ जलउत्पन्न प्रकोप कार्यालयले तारजाली लगाउने ढुंगा भर्ने काम गर्दै आएको छ । यो नदी जलजले क्षेत्र भएर आउने गरेको छ ।

तमोर नदी तर्ने मोटरेबल पुल यहाँमात्रै भएकाले हरेक गाउँपालिका जाने सडक यहींबाट छुट्टिन्छ । खोलो उर्लेर आए मैवा मात्रै नभएर तमोरको पनि जोखिम छ । तर तमोरको तुलनामा मैवाखोलाको जोखिम बढी रहेको स्थानीय भोला पौडेल बताउँछन् ।

पीडिततलाई २१ लाख मेरिङदेन गाउँपालिका ३ दोभान बजारका अग्निपीडितलाई २१ लाख रुपैयाँ सहयोग गरिएको छ । ताप्लेजुङमा जन्मेर काठमाडौं बस्दै आएकाहरूले संकलन गरेको २१ लाख ४ हजार रुपैयाँ हस्तान्तरण गरिएको हो । संकलित रकम अग्निपीडितका सामुन्ने पूर्वमन्त्री योगेशकुमार भट्टराईले मेरिङदेन गाउँपालिका अध्यक्ष गणेश चोङवाङलाई प्रदान गरे ।

भट्टराईको संयोजकत्वमा ‘दोभान बजार अग्निपीडित सहयोग समन्वय समिति गठन गरिएको थियो । सहयोग अभियानमा दोभान एकता समाज काठमाडौं, ओलाङचुङ समाज कल्याण परिवार, ताप्लेजुङ गुरुङ समाज काठमाडौं, अमर सेनेहाङ अमेरिका, मिस

मंगोल सिभिरा लामा, दावा शेर्पा र राजु साँबा इजरायललगायतले सहयोग गरेको सरोकार केन्द्रका अध्यक्ष चित्रगुप्त साँवा बताउँछन् ।

प्रतिनिधिसभामा ताप्लेजुङबाट निर्वाचित भट्टराईले यसअघि व्यक्तिगत रूपमा ५ लाख रुपैयाँ प्रदान गरेका थिए । प्राप्त रकम क्षतिको वर्गीकरणका आधारमा पीडितलाई तत्कालै प्रदान गरिने गाउँपालिका अध्यक्ष चोङवाङले बताए । दोभानमा गत फागुन १८ गते बिहान आगलागी भएको थियो । आगलागीबाट ५० घर जलेको थियो भने ४० करोड ५ लाख रुपैयाँ बराबरको क्षति भएको थियो ।

प्रकाशित : असार २४, २०७८ ०९:५३
प्रतिक्रिया
पठाउनुहोस्

आरोप–प्रत्यारोपमा जनप्रतिनिधि

कान्तिपुर संवाददाता

धनुषा — सर्वोच्च अदालतको आदेशपछि पुनः जिम्मेवारी सम्हालेका सम्सी गाउँपालिकाका अध्यक्ष शेष फारुकले गाउँपालिकाका उपाध्यक्षले आफूविरुद्ध षड्यन्त्र गरेको आरोप लगाएका छन् । सर्वोच्चको आदेशपछि गाउँपालिकामा शक्ति प्रदर्शन गर्दै फारुकले गाउँपालिका उपाध्यक्ष नागिनादेवी यादवले माओवादी केन्द्रका नेताहरूसँग मिलेर आफूविरुद्ध षड्यन्त्र गरिरहेको बताएका हुन् । 

सम्सी गाउँपालिकाका अध्यक्ष शेष फारुक

फारुकले गाउँपालिकामा अध्यक्ष पदमा निर्वाचित भएपछि ३ वर्षसम्म कुनै पनि विकास निर्माणको काम गर्न नदिएर माओवादीका नेताहरूले अवरोध गरेको र नेताहरूलाई छोडेर विकास निर्माणको काम सुरु गर्दा जालझेल गरी पदमुक्त गर्न खोजेको आरोप लगाए । बाँकी रहेको एक वर्षमै जनतालाई महसुस हुने गरी काम गर्ने उनी बताउँछन् ।

गत शुक्रबार सर्वोच्चको आदेशपछि आइतबार पदभार सम्हालेका अध्यक्ष फारुकले आफूलाई असफल बनाउन स्थानीय नेताहरूले चलखेल गरेको आरोप लगाए । ‘माओवादी कार्यकर्ता थिएँ, माओवादी नै रहनेछु,’ उनले भने, ‘मलाई माओवादी पार्टीले कारबाही गरेको होइन । सम्सी गाउँपालिकाकै नेताहरू मलाई असफल बनाउन चलखेल गरेका छन् ।’

सम्सीको विकास हुन नदिन र निर्वाचित जनप्रतिनिधिलाई असफल बनाउने खेलविरुद्ध स्थानीयको सहयोग आवश्यक रहेको उनले बताए । काम गर्न खोज्दा नगरसभाविरुद्ध अदालतमा मुद्दा हाल्न लगाउने, वडालाई दिएको बजेट खर्च नगर्ने र पदच्युत गर्न चलखेल गर्ने जस्ता काम भएको फारुकको भनाइ छ । उनले आम नागरिकको मद्दतले सम्सीको विकास गरी फेरि पनि चुनाव जितेर देखाउने चेतावनीसमेत दिए । फारुकको विजयी उत्सवमा वडाध्यक्षहरू, कार्यपालिका सदस्य, विभिन्न पार्टीका नेता तथा कार्यकर्ता सहभागी थिए ।

अध्यक्ष फारुकलाई पदमुक्त गर्ने निर्वाचन आयोगको निर्णय कार्यान्वयन नगरी नियमित काम गर्न शुक्रबार सर्वोच्चले अन्तरिम आदेश दिएको थियो । अध्यक्ष फारुकले पदबाट राजीनामा नदिएको, अर्को दलको सदस्यता नलिएको एवं आफैं वा निजसमेत संलग्न भई अर्को दल गठन गरेको यकिन अवस्था नदेखिएको सर्वोच्चको अन्तरिम आदेशमा उल्लेख गरिएको छ ।

प्रकाशित : असार २४, २०७८ ०९:१९
पूरा पढ्नुहोस्
प्रतिक्रिया
पठाउनुहोस्
×