जिल्ला प्रशासन धनकुटा र पाख्रिबास नगरपालिका घेराउ- प्रदेश १ - कान्तिपुर समाचार

जिल्ला प्रशासन धनकुटा र पाख्रिबास नगरपालिका घेराउ

रमेशचन्द्र अधिकारी

धनकुटा — धनकुटाको पाख्रीबास नगरपालिकाको नगरसभामा भएको घटनालाई लिएर जिल्लामा दिनहुँ प्रदर्शन हुँदै आएको छ । सत्ता पक्ष एमाले र विपक्षी गठबन्धन नारा जुलुससहित प्रदर्शनमा उत्रिएका हुन् ।

नगरपालिकामा क्षति पुर्‍याएका १५ जनालाई पक्राउ गर्न दबाब दिन एमालेले प्रदर्शन गर्दै आएको छ । यस्तै, अर्को पक्षले पक्राउ गरिएकालाई रिहाईको माग राख्दै प्रदर्शन गरेका हुन् । असार १० गते नगरसभाका क्रममा पाख्रीबास नगरपालिकामा एक समूहले तोडफोड र क्षति पुर्‍याएको घटनाले पछिल्लो एक सातादेखि दिनहुँ पाख्रीबास र सदरमुकाम धनकुटामा प्रदर्शन हुँदै आएको छ ।

नगरपालिकाले वडागत बजेट विनियोजन गर्दा विभेद गरेको भन्दै कांग्रेस, नेकपा (माओवादी केन्द्र), जनता समाजवादी र एमाले (माधव नेपाल समूह) ले नगरसभा चलिरहेको स्थानमा तोडफोड गरी क्षति पुर्‍याएको नगरपालिकाको भनाइ छ । संलग्नलाई पक्राउ गर्न १५ जना विरुद्ध प्रहरीमा अभद्र व्यवहारसम्बन्धी मुद्दा दर्ता गरेको नगरप्रमुख बिर्खबहादुर राईले बताए । यसक्रममा १५ मध्येका पाख्रीबास नगरपालिका ४ का वडाध्यक्ष सोभित निरौलाले प्रहरीमा आफै उपस्थित भएर पक्राउ दिएका थिए । उनी एमाले नेपाल पक्षका हुन् ।

दुवै समूहले आलोपालो रुपमा जिल्ला प्रशासन कार्यालय घेराउ र प्रदर्शन गर्दै आएका छन् । मंगलबार र बुधबार दुवै समूहबाट चार वटा प्रदर्शन गरिएको छ ।

पाख्रीबास नगरपालिका घेराउ र कार्यालय परिसरमा प्रदर्शन गरेका हुन् । पक्राउ गरिएका वडाध्यक्ष निरौलाको शीघ्र रिहाइ गरिनु पर्ने र समग्न अन्यको कारबाही फिर्ता गरिनु पर्ने माग राख्दै आन्दोलनमा उत्रिएका गठबन्धन दलमध्ये कांग्रेस जिल्ला सचिव विजयसन्तोषी राईले बताए । घटनापछिको परिस्थिति न्युनिकरण गर्नुको सट्टा सत्ताको आडमा बढावा दिएको उनको भनाइ छ । उक्त समूहले बुधबार जिल्ला प्रशासन घेराउ र नारा जुलुस प्रदर्शन गरेको छ । त्यसअघि पाख्रीबास बजारमा मसाल जुलुस र प्रदर्शन गरेको जनाएको छ । यस्तै, एमालेको युवा संघले पनि मंगलबार जिल्ला प्रशासनमा घटनामा संलग्नलाई कारबाही गरिनु पर्ने दबाब दिन प्रदर्शन गरेको छ ।

प्रमुख जिल्ला अधिकारी कृष्णप्रसाद पन्थलाई भेटेर सम्लग्नलाई तत्काल पक्राउ गर्न दबाब दिएको युवा संघका जिल्ला इन्चार्ज बलदेव राईले बताए । प्रशासनले पक्राउ नगरे आफूहरु आफै अघि सरेर संलग्नको खोजी गर्ने उनले चेतावनी दिए ।

सीडीओ मौन

दिनहुँ प्रमुख जिल्ला प्रशासन कार्यालय घेराउ र कार्यालय परिसरमा प्रदर्शन हुँदै आएको छ । पाख्रीबास घटनामा हुने गरेका प्रदर्शनबाट कार्यालयको दैनिकी प्रभावित बनेको छ । यस्तो परिस्थितिमा घटनाबारे आफू केही प्रतिक्रिया नदिने प्रमुख जिल्ला अधिकारी कृष्णप्रसाद पन्थले बताए । ‘घटनाबारे म केही बोल्दिनँ’, उनले भने, ‘जे सोध्नु छ, प्रहरीलाई सोध्नु ।’ जिल्ला प्रशासन कार्यालयमा भएको घटनाबारे प्रहरी भन्दा प्रजिअ स्वयंले अवस्थाबारे सञ्चारकर्मीलाई प्रतिक्रिया दिनु पर्नेमा उनले घटनाबारे समाचार लागि केही नबोल्ने कान्तिपुरलाई बताए ।

घटनालाई लिएर यस अघिका प्रमुख जिल्ला अधिकारी बासुदेव दाहाल गृह मन्त्रालयमा तानिएका छन् । यसै साता आएका प्रजिअ पन्थलाई घटनाबाट उब्जिएको परिस्थिति व्यहोर्नु पर्ने अवस्था आएको जनाइएको छ । एक पक्षले पक्राउ गर्न र अर्कोले रिहाई गर्न दबाब दिने गरेपछि भर्खरै सरुवा भइ आएका प्रजिअ पन्थले घटनाबारे आधिकारीक प्रतिक्रिया नदिने अवस्थामा पुगेका छन् ।

प्रकाशित : असार २३, २०७८ १८:२४
प्रतिक्रिया
पठाउनुहोस्

पाख्रिबास नगरपालिकाका वडाध्यक्ष प्रहरीको सम्पर्कमा

रमेशचन्द्र अधिकारी

धनकुटा — पाख्रिबास नगरपालिका–४ का वडाध्यक्ष सोभित निरौला प्रहरीको सम्पर्कमा आएका छन् । पाख्रिबास नगरसभाका क्रममा भएको तोडफोडको घटनामा मुख्य दोषी भएको जनाउँदै नगरपालिकाले अभद्र व्यवहारको आरोपमा प्रहरीमा किटानी जाहेरी दिइएको थियो ।

पाख्रिबास नगरपालिकामा गत असार १० गते आयोजित नगरसभाका क्रममा बजेट सिलिङमा असन्तुष्ट व्यक्तिहरुले कार्यक्रमस्थलमा विरोध र तोडफोड गरेको प्रहरीले जनाएको छ । उक्त घटनामा संलग्न १५ जनाविरुद्ध प्रहरीमा अभद्र व्यवहारको आरोपमा उजुरी दर्ता गरिएको जिल्ला प्रहरी प्रमुख एसपी नकुल पोखरेलले जानकारी दिए । केही दिन सम्पर्क बाहिर रहेका वडाध्यक्ष निरौलाले बिहीबार प्रहरीमा आफै गिरफ्तारी दिएका हुन् ।

कार्यालयको झ्यालका सीसा फुटेको, ५५ वटा कुर्सी तोडफोड गरी पाँच लाख बढीको क्षति भएको नगरप्रमुख बिर्खबहादुर राईले बताए । नगरपालिकाका सबै पदाधिकारी एमालेका हुन् । वडाध्यक्ष निरौला मात्र माधव नेपाल समूहमा रहेका छन् । फरक समूहमा रहेकोले आफूलाई बजेटमा विभेद गरेकोले विरोध गर्दा फसाइएको उनको प्रतिक्रिया छ । प्रहरीले जिल्ला प्रशासन कार्यालयमा मुद्दा छानबिनको लागि अघि सारिने जनाएको छ ।

घटनालाई लिएर एमाले, कांग्रेसलगायत विभिन्न गठबन्धनबीच आरोप–प्रत्यारोप चुलिएको छ । नेकपा एमाले पक्षका मेयर बिर्खबहादुर राईले प्रहरी प्रशासनलाई दबाब दिएर विपक्षी गठबन्धनका नेता कार्यकर्तालाई झूटा मुद्दा दर्ता गरेको गठबन्धन पक्षको आरोप छ । कांग्रेस, नेकपा माओवादी, नेकपा एमाले (माधव नेपाल समूह) का १५ जनाविरुद्ध अभद्र व्यवहारमा प्रहरीमा उजुरी परेको जनाइएको छ । झूटा मुद्दा खारेजीको माग गर्दै विरोधमा उत्रिएको कांग्रेस जिल्ला सचिव विजयसन्तोषी राईले बताए ।

घटनामा शान्ति सुरक्षा कायम गर्न नसकेको जनाउँदै प्रजिअ दाहालको आकस्मिक सरुवा गरिएको छ । उनी गृह मन्त्रालयमा तानिएका छन् । घटनामा प्रहरी पठाउन नगरप्रमुखले प्रजिअलाई भनेपनि अटेर गरेको भन्दै दुवैबीच भनाभन भएको जनाइएको छ ।

प्रकाशित : असार १८, २०७८ १८:४५
पूरा पढ्नुहोस्
प्रतिक्रिया
पठाउनुहोस्
×