वन क्षेत्रमा फेरि खन्‍न थालियो खेल मैदान- प्रदेश १ - कान्तिपुर समाचार

वन क्षेत्रमा फेरि खन्‍न थालियो खेल मैदान

डम्बरसिं राई

खोटाङ — ऐतिहासिक हलेसीगढी क्षेत्र र त्यहाँको सरकारी वनक्षेत्रमा फेरि मंगलबारदेखि खेल मैदान खन्न थालिएको छ । हलेसी गढी क्षेत्र र त्यहाँस्थित सरकारी वन गैरकानुनी रुपमा एक्साभेटर लगाएर खनिएको भन्दै असार १८ गते अख्तियारमा उजुरीपछि खेल मैदान खन्न बन्द गरिएको थियो ।

हलेसी तुवाचुङ नगरपालिकाका बैशाख १९ गतेको बैठकले उक्त क्षेत्रमा खेल मैदान बनाउने निर्णय गरेको थियो । त्यसै आधारमा हलेसी तुवाचुङ नगरपालिका–५ का विक्रम राई अध्यक्ष रहेको खेल मैदान निर्माण उपभोक्ता समिति गठन गरी आइतबारदेखि एक्साभेटरले भत्काउन थालिएको थियो । हलेसी तुवाचुङ नगरपालिका–५ दुर्छिमका वडाअध्यक्ष रमेश तिवारीको नेतृत्वमा दुर्छिम तालतेमाका भूपेन्द्र राई लगायतको पटक–पटकको छलफलपछि अहिले स्थानीयलाई अगाडि लगाएर खन्न थालिएको हो ।

वडाअध्यक्ष तिवारीले भने आफू त्यसमा संलग्न नगरहेको बताए । भूपेन्द्र राईले भने अख्तियारमा उजुरीपछि नगरपालिकाको बजेट रोक्का भएको र स्थानीय आफ्नै खर्चमा खेल मैदान खनिरहेको बताएका छन् ।

हलेसी तुवाचुङ नगरपालिका–५ साविक दुर्छिम गाविस–१ कित्ता नम्बर १७ को ५४ रोपनी १४ आना एक पैसा एक दाम क्षेत्रफलको सरकारी वनमा भएको विनास बारे जिल्लास्थित प्रमुख जिल्ला अधिकारी र डिभिजन वन कार्यालय खोटाङमा पटक–पटक अनुरोध गर्दा समेत बेवास्ता गरिएको स्थानीय तथा साविक दुर्छिम गाविसका पूर्व अध्यक्ष कुबेर राईले बताए ।

प्रमुख जिल्ला अधिकारी मित्रलाल शर्माले भने समुदाय नै लागेर खेल मैदान खन्न थालिएकाले आफूले केही गर्न नसक्ने बताए ।

स्थानीयले करिब एक सयभन्दा बढी रुख काटिएको, ऐतिहासिक हलेसीगढीको पुरातात्विक महत्व हराउने, पर्यटकीय आकर्षणमा हराउने, वन विनाशले वातावरण प्रदूषण हुने गरी हलेसीगढी क्षेत्रको सरकारी वन एक्साभेटरले भत्काउन थालिएकाले यसमा संलग्नलाई कारबाही हुनु पर्ने भन्दै अख्तियार आयोगमा गत असार १४ गते उजुरी दिएका थिए ।

उजुरीमा हलेसी तुवाचुङ नगरपालिका प्रमुख इवन राई, हलेसी तुवाचुङ नगरपालिका–५ दुर्छिमका वडाअध्यक्ष रमेश तिवारी र खेल मैदान निर्माण उपभोक्ता समिति अध्यक्ष विक्रम राईलाई विपक्षी बनाएर उजुरी दिइएको थियो ।

हिन्दू, बौद्ध र किरातको त्रिधार्मिकस्थल अन्तर्गत किरात धर्मालम्बीहरुको क्षेत्र भएकाले यसको संरक्षण गर्नु पर्ने स्थानीयको माग छ । यसक्षेत्रमा साकेलाथान, तीनचुला र किरात ज्ञानकेन्द्र बनाइनु पर्ने उनीहरुको भनाइ छ ।

प्रकाशित : असार २२, २०७८ १८:२८
प्रतिक्रिया
पठाउनुहोस्

प्रदेश १ सभाको गतिरोध अन्त्य 

सभामुख भण्डारीद्वारा मर्यादित भाषा प्रयोग गर्न प्रदेशसभा सदस्यहरुलाई सचेत गराइयो
देवनारायण साह

मोरङ — प्रदेश १ का भौतिक पूर्वाधार विकासमन्त्री अम्बिरबाबु गुरुङले दिएको अभिव्यक्ति रेकर्डबाट हटाउने सहमतिपछि प्रदेश सभामा कायम ८ दिनदेखिको गतिरोध अन्त्य भएको छ । 

गतिरोध अन्त्य भएसँगै विनियोजन विधेयकअन्तर्गतको सामाजिक विकास क्षेत्रको विषयगत छलफल मंगलबारबाट सुरु भएको हो । मुख्यमन्त्री शेरधन राई र माओवादी केन्द्र संसदीय दलका नेता इन्द्रबहादुर आङ्बोबीच भएको सहमतिका आधारमा सभामुख प्रदीपकुमार भण्डारीले बैठक सुरु गर्दै मन्त्री गुरुङले दिएको अभिव्यक्ति रेकर्डबाट हटाउन प्रदेश सभा सचिवालयलाई निर्देशन दिएका थिए ।

‘भौतिक पूर्वाधार विकास मन्त्रालयसँग सम्बन्धित विनियोजन शीर्षकमाथिको छलफलका क्रममा माननीय मन्त्री गुरुङले असार १३ गते जवाफ दिँदा सभामुखले रुलिङ गरेको पछाडिको अभिव्यक्त खण्डलाई अभिलेखबाट हटाउन सचिवालयलाई निर्देशन दिन्छु,’ उनले भने, ‘सबै माननीय सदस्य तथा पदाधिकारीलाई प्रदेश सभामा मर्यादित भाषा प्रयोग गरी सभाको गरिमालाई कायम राख्न समेत सचेत गराउँदछु ।’

नयाँ आर्थिक वर्ष २०७८/७९ को बजेटको भौतिक पूर्वाधार क्षेत्रको विषयगत छलफलमा उठेका प्रश्नहरुको जवाफ दिने क्रममा मन्त्री गुरुङले सदनमा दिएको अभिव्यक्तिप्रति आपत्ति जनाउँदै माओवादी केन्द्रले प्रदेश सभा बैठक अवरुद्ध गर्दै आएको थियो ।

माओवादी केन्द्रका प्रदेश सभा सदस्य मोहनकुमार खड्काले विनियोजन विधेयकको भौतिक पूर्वाधार विषयको छलफलमा भाग लिँदै मन्त्री गुरुङलाई दलाल, कमिसन खानेलगायतको आरोप लगाउँदै आलोचना गरेका थिए । प्रदेश सभा सदस्य खड्काले लगाएको आरोपको खण्डन गर्दै मन्त्री गुरुङले दिएको जवाफप्रति असन्तुष्टि जनाउँदै माओवादी केन्द्रले सदन अवरुद्ध गर्दै आएको थियो ।

माओवादी केन्द्रका प्रदेश सभा सदस्यहरुले मन्त्री गुरुङले सदनमा आत्मालोचनासहित माफी माग्नु पर्ने, सदनको रेकर्डबाट उनको भनाइ हटाउनु पर्ने र सत्तारुढ दलले बजेट संशोधन गर्न लागेको विषयमा सदनमा प्रस्ट पार्नुपर्ने माग गर्दै आएका थिए । सदन अवरुद्ध हुँदा विनियोजन विधेयकको विषयगत क्षेत्रका छलफल रोकिएको थियो ।

प्रकाशित : असार २२, २०७८ १७:३८
पूरा पढ्नुहोस्
प्रतिक्रिया
पठाउनुहोस्
×