खोटाङका स्थानीय तहमा कार्यक्रम पारित
खोटाङ — जिल्लाका विभिन्न पालिकाहरूले नीति तथा कार्यक्रम पारित गरेका छन् । हलेसी तुवाचुङ नगरपालिकाले सञ्चारमाध्यममैत्री नीति तथा कार्यक्रम पारित गरेको छ ।
दिक्तेल रुपाकोट मझुवागढी नगरपालिकाले ८५ करोड ८ लाख ६२ हजार रुपैयाँको बजेट प्रस्तुत गरेको छ । सामाजिक विकासलाई प्राथमिकता दिँदै बजेट प्रस्तुत गरेको छ । सामाजिक विकासतर्फ ४० करोड ७६ लाख ३५ हजार रुपैयाँको बजेट प्रस्तुत गरेको छ । शिक्षामा ३० करोड ४३ करोड रुपैयाँ विनियोजन गरेको छ । स्वास्थ्यअन्तर्गत पोषणमा ६ करोड २६ लाख रुपैयाँ विनियोजन गरेको छ ।
साकेला गाउँपालिकामा बिहीबारको गाउँसभालाई कांग्रेसबाट विजयी गाउँपालिका उपाध्यक्ष सरिता खड्का, वडा १ बाँझेच्यानडाडाँका वडाध्यक्ष विजय गुरुङ र वडा ४ मात्तिमका वडाध्यक्ष कृष्णप्रसाद भट्टराईले गाउँसभा बहिष्कार गरेका थिए । बजेट विषयमा असहमति जनाउँदै गाउँसभा बहिस्कार गरेका हुन् ।
दिप्रुङ चुइचुम्मा गाउँपालिकाले ६२ करोड २८ लाख ३७ हजार ५ सय ९० रुपैयाँ बराबरको बजेट प्रस्तुत गरेको छ । यसमा आर्थिक विकासतर्फ ९ प्रतिशत, पूर्वाधारतर्फ २६ प्रतिशत, सुशासन तथा अन्तरसम्बन्धित क्षेत्रतर्फ १० प्रतिशत र सामाजिक विकासतर्फ ५५ प्रतिशत बजेट विनियोजन गरेको हो ।
खोटेहाङ गाउँपालिकाले ५१ करोड रुपैयाभन्दा बढीको बजेट पारित गरेको छ । जन्तेढुंगा गाउँपालिकाले ३९ करोड ९९ लाख ९३ हजार २ सय ७० रुपैयाँ बराबरको बजेट ल्याएको छ । यस्तै ऐंसेलुखर्क गाउँपालिकाले ४० करोड ३९ लाख ८५ हजार ६ सय ९० रुपैयाँको बजेट पारित गरेको छ । रावाबेसी गाउँपालिकाले ३६ करोड ४५ लाख, ३५ हजार रुपैयाँको बजेट ल्याएको छ । बराहापोखरी गाउँपालिकाले ३४ करोड ५७ लाख, २८ हजार ३ सय ९० रुपैयाँको बजेट पारित गरेको छ ।
जिल्लाका १० पालिकाहरूमध्ये नौवटाले नीति तथा कार्यक्रम प्रस्तुत गरेका छन् । केपिलासगढी गाउँपालिकाले भने असार १४ गते गाउँसभा गर्ने भएको छ । कोरोना कर्मचारीहरूलाई थला पारेपछि १० गतेभित्रको समयसीमामा गाउँसभा गर्न नसकेको हो ।