पढाइमा प्रोत्साहन गर्न छात्रालाई साइकल- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

पढाइमा प्रोत्साहन गर्न छात्रालाई साइकल

अर्जुन राजवंशी

बिर्तामोड — वडाको अधिकांश भाग नदीले घेरिएको छ । वर्षको ५ महिना आवतजावतमा कठिनाइ भोग्नुपर्छ । सवारी साधन पाइँदैन । गौरीगन्ज गाउँपालिका–१ महाभाराका स्थानीयको दैनिकी कष्टकर छ ।

झापाको गौरीगन्ज–१ बाट नि:शुल्क साइकल प्राप्त गरेका कक्षा ११ मा अध्ययनरत छात्राहरू । तस्बिर : अर्जुन/कान्तिपुर

पूर्वाधार विकास पर्याप्त हुन नसकेको गौरीगन्ज–१ मा शिक्षा र स्वास्थ्यको अवस्था पनि कमजोर नै छ । नदी तर्न नसकेकै कारण धेरै बालबालिका स्कुल जानबाट वञ्चित छन् । जाँदै गरेका पनि बीचमै पढाइ छाड्न बाध्य हुन्छन् ।

आदिवासी समुदायको बाहुल्य रहेको यहाँ विविध समस्या देखाउँदै छोरीलाई स्कुल पठाउने चलन छैन । पठाइहाले पनि नजिकैको प्राथमिक या आधारभूत विद्यालयसम्म मात्र । टाढाको विद्यालयमा पढ्न नपठाउँदा वडाका छोरीहरूले माध्यमिक तहसम्मको शिक्षा पाउन नसकिरहेको अवस्था छ ।

वडाको उक्त समस्यालाई सम्बोधन गर्न गौरीगन्ज–१ नम्बर वडा कार्यालयले छोरी–बुहारीलाई निःशुल्क साइकल वितरण कार्यक्रम अघि बढाएको छ । वडाले गत वर्षदेखि साइकल वितरण सुरु गरेको हो ।

गत वर्ष कक्षा ११ मा अध्ययनरत वडाभित्रका सबै ३५ जना छात्रालाई साइकल वितरण गरिएको थियो । उक्त कार्यक्रमको प्रभावले यस वर्ष वडाका ४७ जना छात्राले कक्षा ११ अध्ययन गरिरहेका छन् । वडा कार्यालयले यस वर्ष पनि ४७ जना सबैलाई शुक्रबार साइकल वितरण गरेको वडाध्यक्ष कार्तिकलाल राजवंशीले जानकारी दिए ।

‘साइकल वितरण गर्न थालेपछि छोरी–बुहारीलाई क्याम्पस पढ्न पठाउनेको संख्या बढेको देखिन्छ,’ वडाध्यक्ष राजवंशीले भने, ‘साइकल पाएपछि छात्राहरूलाई पनि समयमै क्याम्पस पुग्न र घर फर्किन सहज भएको छ ।’ वडास्तरीय कार्यक्रमअन्तर्गत यस वर्ष ६० लाख रुपैयाँको साइकल वितरण गरेको उनले बताए ।

वडाले सामुदायिक विद्यालय अध्ययनरत छात्रालाई मात्र साइकल वितरण गरेको वडासचिव भोजराज अधिकारीले बताए । साइकलले छात्रालाई विद्यालय जान सहज हुनुका साथै बाटोमा सुरक्षाका हिसाबले पनि प्रभावकारी देखिएको अधिकारीले बताए । साइकलले विद्यालय जान/आउन सहज बनाउने विद्यार्थी सुमित्रा हस्दाले बताइन् । ‘एउटा साइकल नहुँदा मेरो पढाइ झन्डै रोकियो,’ उनले भनिन्, ‘वडा कार्यालयले साइकल दिन्छ भन्ने थाहा पाएपछि परिवारले मलाई पढ्न पठाएको हो,’ उनले भनिन् ।

साइकल वितरणले सामुदायिक विद्यालयमा विद्यार्थी कम हुने समस्यालाई पनि समाधान गर्ने बालकल्याण माविका प्रधानाध्यापक भीम कोइरालाले बताए । उनले गौरीगन्ज–१ ले जस्तै अन्य वडाले पनि छात्रालाई साइकल वितरण गरे विद्यालय आउने बालबालिका तथा छात्राको संख्यामा वृद्धि हुने विश्वास व्यक्त गरे ।

प्रकाशित : असार ११, २०७८ ११:२३
प्रतिक्रिया
पठाउनुहोस्

स्वास्थ्य सम्बन्धीको मौलिक हक कागजी खोस्टा बन्यो : सिटौला

अर्जुन राजवंशी

बिर्तामोड — नेपाली कांग्रेसका नेता कृष्णप्रसाद सिटौलाले संविधानमा उल्लेख गरिएको मौलिक हकअन्तर्गतको नागरिकको स्वास्थ्य सम्बन्धीको हक कागजी खोस्टा बनेको टिप्पणी गरेका छन् ।

झापाको भद्रपुरमा अक्सिजन कन्सन्ट्रेटर वितरण कार्यक्रमलाई सम्बोधन गर्दै कांग्रेस नेता कृष्णप्रसाद सिटौला । तस्बिर : अर्जुन/कान्तिपुर

उनले स्वास्थ्य नागरिकको जीवनसँग प्रत्यक्ष र महत्वपूर्ण विषय भएकाले संविधानमा मौलिक हक अन्तर्गत उल्लेख गरेको दाबी गरे । तर, सरकारले स्वास्थ्य संकटका बेला समेत नागरिकको स्वास्थ्यतर्फ ध्यान र चासो नदिँदा स्वास्थ्य सम्बन्धिको मौलिक हक संविधानमा कागजी खोस्टाको रुपमा मात्र उल्लेख हुन पुगेको धारणा राखे ।

मंगलबार गृहनगर झापाको भद्रपुरमा जिल्लाका १० वटा स्थानीय तहलाई अक्सिजन कन्सन्ट्रेटर वितरण गर्दै सिटौलाले सरकार नागरिकको स्वास्थ्य सेवामा काम गर्नबाट चुकेको दाबी गरे । ‘हामीले लामो छलफल र महत्वपूर्ण विषयको रुपमा स्वास्थ्यलाई संविधानको मौलिक हकअन्तर्गत लेख्यौं । तर, सरकारले आज संविधानको त्यो व्यवस्थालाई अलिकति पनि कार्यान्वयन गरेन’ उनले भने,‘नागरिक कोभिडले चरम स्वास्थ्य संकटमा परेको बेला समेत राज्यले यतातर्फ नजरअन्दाज गर्‍यो ।’

पूर्व मन्त्री समेत रहेका सिटौलाले जसको नेतृत्वमा सरकार भएपनि अब, गरिब विपन्न जनताले सहजै हासिल गर्न सक्नेगरी स्वास्थ्य सेवा प्रदान गर्न नसके वर्तमान व्यवस्था नै संकटमा पर्ने धारणा राखे । ‘लामो संघर्षबाट प्राप्त मुलुकको अहिलेको व्यवस्था गरिब जनताको लागि हो । त्यसैले जो नेता जुन पदमा पुगेपनि आम जनताले सहजरुपमा स्वास्थ्य सेवा प्राप्त गर्न सकेनन् भने यो व्यवस्थालाई टिकाउन सकिदैन’ उनले भने । उनले कोभिडले स्वास्थ्य क्षेत्रमा गर्नुपर्ने धेरै कामहरुबारे राम्रो ज्ञान दिएको बताए । ‘कोभिडले हामीलाई धेरै कुरा सिकाएको छ । अब, गाउँगाउँका स्वास्थ्य चौकीहरुको स्तरोन्नति नगरी नहुने अवस्थामा पुर्‍याएको छ’ नेता सिटौलाले भने,‘मुलुकको स्वास्थ्य क्षेत्रलाई मजबुद बनाउन सरकार मात्र होइन, हामी सबै लाग्न जरुरी छ ।’

कोभिडका गम्भीर विरामीलाई आवश्यक पर्ने अक्सिजन कन्सन्ट्रेटर मेसिन सिटौलाले गृहजिल्लाका ग्रामीण क्षेत्रका पालिकालाई वितरण गरेका छन् । जिल्ला स्वास्थ्य कार्यालयमार्फत अक्सिजन कन्सन्ट्रेटर वितरण गरिएको हो ।

सिटौलाले जिल्लाका कचनकवल, हल्दिबारी, बाह्रदशी, बुद्धशान्ति र झापा गाउँपालिका तथा बिर्तामोड, अर्जुनधारा, गौरादह, शिवसताक्षी नगरपालिकालाई एक/एक थान र भद्रपुर नगरपालिकालाई तीन थान अक्सिजन कन्सन्ट्रेटर मेसिन हस्तान्तरण गरेका हुन् । जिल्लामा कोभिड संक्रमित र मृत्यु दर अझै कम नभएकाले थप मानवीय क्षति हुन नदिन अक्सिजन मेसिन वितरण गरेको सिटौलाले बताए । नेपाल चिकित्सक संघसंगको सहकार्यमा सिटौलाले १२ वटा अक्सिजन कन्सन्ट्रेटर मेसिन र ५० थान पीपीई सेट गृहजिल्ला ल्याएका थिए ।

प्रकाशित : असार ८, २०७८ २०:४४
पूरा पढ्नुहोस्
प्रतिक्रिया
पठाउनुहोस्
×