इटहरी उपमहानगरको बजेट २ अर्ब १७ करोड- प्रदेश १ - कान्तिपुर समाचार

इटहरी उपमहानगरको बजेट २ अर्ब १७ करोड

सुम्निमा चाम्लिङ

इटहरी — इटहरी उपमहानगरपालिकाले आगामी आर्थिक वर्ष २०७८/०७९ को लागि अनुमानित बजेट सार्वजनिक गरेको छ । उपमेयर लक्ष्मी गौतमले बिहीबार सम्पन्न नवौं नगरसभामा आगामी आवका लागि २ अर्ब १७ करोड ४५ लाख रुपैयाँको बजेट प्रस्तुत गरेकी हुन् ।

उपमहानगरले गत आवमा १ अर्ब ७८ करोडको बजेट प्रस्तुत गरेको थियो । यो चालु वर्षको तुलनामा ३९ करोड ४५ लाख रुपैयाँले बढी हो ।

आगामी आर्थिक वर्षका लागि संघीय समानिकरण अनुदान ३३ करोड ६५ लाख, संघीय ससर्त अनुदान ४३ करोड ७० लाख, संघीय समपुरक अनुदान २ करोड २९ लाख, संघीय विशेष अनुदान ३ करोड ४२ लाख, प्रदेश समानिकरण अनुदान १ करोड ९९ लाख, प्रदेश ससर्त अनुदान १ करोड ६७ लाख रुपैया विनियोजन गरेको छ ।

यस्तै, प्रदेश समपुरक अनुदान १ करोड, संघीय राजस्व बाँडफाँड १५ करोड १६ लाख, प्रदेश राजस्व बाँडफाँड (सवारी कर) २ करोड ३७ लाख, प्रदेश राजस्व बाँडफाँड मालपोत रजिष्ट्रेशन ३२ करोड आन्तरिक स्रोतबाट ४१ करोड, मर्मत संभार कोषबाट १ करोड २० लाख, धरौटी खाता सापटी ४ करोड, ऋण प्राप्त गर्ने ५ करोड नगद मौज्दात परिवर्तनबाट २९ करोड नगद मौज्दातबाट आय गर्ने उपमहनगरले लक्ष्य राखेको छ ।

उपमहानगरले शित भण्डारसहितको आधुनिक कृषि बजारको निर्माण कार्य चालु वर्षबाट सुरु गर्ने लक्ष्य राखेको छ । जसका लागि ५ करोड ५८ लाख रकम विनियोजन गरिएको छ । कोरोना महामारीको रोकथाम तथा नियन्त्रण र उपचारका लागि भने बजेटले खासै चासो देखाएको छैन । चालु वर्षमा समेत भौतिक निर्माण मर्मत तथा सुधारलाई अघि बढाइने उपमेयर गौतमले बताइन् ।

आगामी आर्थिक वर्षमा कृषि तथा पशु विकास कार्यक्रमका लागि २ करोड ५० लाख र शिक्षा क्षेत्रका लागि २ करोड रकम विनियोजन गरिएको छ ।

प्रकाशित : असार १०, २०७८ २१:५९
प्रतिक्रिया
पठाउनुहोस्

बलात्कारको आरोपमा भारतीय युवा पक्राउ

प्रतीक्षा काफ्ले

कास्की — बालिकालाई जबरजस्ती करणी गरेको आरोपमा कास्की प्रहरीले भारतीय युवालाई पक्राउ गरेको छ ।

विभिन्न प्रलोभन देखाएर करणी गरेका भारतको बिहार प्रदेश पश्चिमी चम्पारण जिल्ला फतुछापर ब्रिति टोलको ७ नम्बर वडा स्थायी घर भई हाल पोखरा महानगरपालिका–९ शान्तिवन बस्ने २७ वर्षीय इन्द्रजितकुमार शर्मालाई बुधबार पक्राउ गरिएको जिल्ला प्रहरी प्रवक्ता डीएसपी सुवास हमालले जानकारी दिए । हमालका अनुसार शर्मालाई बिहीबार जिल्ला अदालतमा जबरजस्ती करणीसम्बन्धी मुद्दा दर्ता गरिएको छ ।

अदालतले उनलाई १० दिनको म्याद थप गरेको छ । शर्माले जबरजस्ती करणी गरी गोप्य रुपमा भिडियो बनाई उक्त भिडियो र फोटो ती बालिकाकै नामको नक्कली फेसबुक आईडी बनाई अश्लील फोटोसमेत राखिदिएको पीडितले प्रहरीमा बयान दिएकी छन् ।

यसैबीच लागूऔषधसहित कास्की प्रहरीले तीन जनालाई पक्राउ गरेको छ । पोखरा महानगर–१० बुद्धचोकस्थित लागूऔषधको कारोबार भएको सूचनाको आधारमा प्रहरीले जाँच गर्ने क्रममा पक्राउ गरेको जनाएको छ । पक्राउ पर्नेमा गोरखाको आरुघाट गापाका लेखबहादुर गुरुङ, स्याङ्जाको बिरुवा गापाका दिपेन्द्र विक र स्याङ्जाको पुतलीबजार नपाका सुजन गुरुङ रहेका छन् ।

तीनै जनालाई बुद्धचोकबाट पक्राउ गरिएको जिल्ला प्रहरी प्रवक्ता डीएसपी सुवास हमालले जानकारी दिए ।

प्रकाशित : असार १०, २०७८ २१:४९
पूरा पढ्नुहोस्
प्रतिक्रिया
पठाउनुहोस्
×