कोसीमा ‘कोरोना जोखिम भत्ता’ विवाद- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

कोसीमा ‘कोरोना जोखिम भत्ता’ विवाद

संक्रमितको उपचारमा अप्रत्यक्ष संलग्नलाई सूचीमा नपारिएको भन्दै विरोध 
जितेन्द्र साह

विराटनगर — संक्रमितको उपचारमा प्रत्यक्ष संलग्नले मात्र कोराना जोखिम भत्ता पाउने भएपछि विराटनगरस्थित कोसी अस्पतालको अन्य संवेदनशील विभाग र इकाइमा खटिने कर्मचारीहरूले विरोध गरेका छन् ।

विराटनगरस्थित कोसी अस्पतालको बहिरंग विभाग पुर्जी काउन्टरअगाडि सेवाग्राहीको भीड । तस्बिर : जितेन्द्र/कान्तिपुर

विवाद चुलिने देखेपछि अस्पताल व्यवस्थापनले भत्ताको सिफारिस सूचीलाई नै गोप्य राखेको छ । योबारेमा कसैले खुलेर बोलेका छैनन् ।

सिफारिसमा सूचीकृत कर्मचारीलाई २४ घण्टे सेवा प्रदायक मानेर तलबको ५० प्रतिशत भत्ता दिइन्छ, जसमा १५ प्रतिशत कर काटिन्छ । स्वास्थ्य तथा जनसंख्या मन्त्रालयले अस्पताललाई ५ जेठ र २३ जेठमा पठाएको पत्रमा कोभिड–१९ संक्रमितको प्रत्यक्ष उपचारमा संलग्नले मात्र उक्त जोखिम भत्ता पाउने आशय व्यक्त गरिएको छ ।

उक्त पत्रअनुसार कोभिडका बिरामीको उपचारमा खटिएका विभिन्न विभागका १ सय १९ कर्मचारीको ६ महिनाको विवरण मन्त्रालयलाई पठाइएको अस्पताल प्रशासनका नासु जनार्दन पौडेलले बताए । तर जोखिम मोलेर काम गरे पनि भत्ताका लागि सिफारिस नभएको भन्दै बिमा काउन्टर, सामाजिक सेवा इकाइ, आकस्मिक कक्ष, ओपीडीको पुर्जी काउन्टर, भीडमा उभेर बिरामीको नाम बोलाउने र प्रसूतिलगायतको विभागमा कार्यरत कर्मचारीहरूले विरोध जनाएका छन् ।

अस्पतालको निर्णय मान्य नहुने उनीहरूले भनिरहेका छन् । संक्रमणको प्रत्यक्ष वा अप्रत्यक्ष जोखिममा रहेका स्वास्थ्यकर्मी एवं अन्य कर्मचारीसहित ४ सय ६८ जनाले गत वर्ष उक्त भत्ता पाएको अस्पतालको लेखा शाखाले जनाएको छ । यसपालि भने दैनिक दायित्व निर्वाह गर्ने क्रममा आफ्ना तीन सहयोगी संक्रमित भए पनि उनीहरूको भत्तामा नाम नपरेको सामाजिक सेवा इकाइका एक वरिष्ठ कर्मचारीले बताए । ‘आर्थिक सहयोगका लागि सिफारिस गर्ने क्रममा बिरामीसँग कुरा गर्दा र उनीहरूका कागजात छुँदा हामी संक्रमित भएका हौं,’ एक कर्मचारीले भने । सामाजिक इकाइका कर्मचारीहरू लगायत अस्पतालका सबैले गत वर्ष जोखिम भत्ता पाएका थिए ।

असन्तुष्ट पक्षका अनुसार यस पटक अस्पतालका अधिकारीहरूले आफ्ना र निकट कर्मचारीको मात्र नाम सिफारिस गरेका छन् । संक्रमित पुष्टि भएकालाई मात्र उपचार गरिने हुनाले कोरोना वार्ड वा कोरोना अस्पतालमा कार्यरतले सम्पूर्ण सावधानी एवं सुविधाका साथ काम गर्ने हुनाले उनीहरू कमै जोखिममा हुने गरेको ओपीडीका एक कर्मचारीले बताए । उनले आफूहरू सबै खाले बिरामीको हुलमा रहेर काम गर्नुपर्ने हुनाले हरेक दिन संक्रमणको जोखिममा हुने गरेको बताए ।

‘ओपीडीमा ओइरिने भीडमा को पोजिटिभ र को नेगेटिभ भन्ने थाहा हुन्न,’ अर्का एक कर्मचारीले भने, ‘कोरोनाको शंका गरिएका बिरामीलाई यहींबाट फिवर क्लिनिकमा पठाउने हो, संक्रमण पुष्टि भएका जटिल बिरामी मात्र कोरोना वार्ड वा अस्पतालमा भर्ना हुन्छन्, बाँकी त होम आइसोलेसनमै बस्छन् । सुरुवातमा बिरामीको सामना गर्ने ओपीडीमा कार्यरत सबैभन्दा बढी समस्यामा हुन्छन् ।’ यस अस्पतालस्थित बिमा एवं ओपीडीका अधिकांश कर्मचारी संक्रमित भइसकेका छन् । ‘झ्यालमा उभेका बिरामीसँग नजिकबाटै कुरा गर्नुपर्छ, कतिपय खोकी र हाँच्छु गरिरहेका हुन्छन्, कतिखेर र कोबाट संक्रमित हुने हो भन्ने नै थाहा हुन्न,’ बिमा काउन्टरका एक कर्मचारीले भने ।

अस्पतालको उपल्ला अधिकारी भने कर्मचारीको आरोप निराधार रहेको बताएका छन् । सबै कर्मचारीले कोरोना भत्ताको माग गरे पनि भूमिका हेरेर नाम सिफारिस गरिएको अस्पतालका मेडिकल सुपरिन्टेन्डेन्ट (मेसु) डा. चुमनलाल दासले बताए । ‘कार्य मूल्यांकनका आधारमा बिनाविभेद भत्ताका लागि सूची तयार पारिएको हो,’ उनले भने, ‘पहिले पनि नाम पठाइकाले भत्ता पाउन बाँकी छ, सिफारिस हुनेबित्तिकै पाउँछन् भन्ने पनि छैन ।’

संक्रमितको उपचारमा प्रत्यक्ष संलग्नको मात्र नाम कोरोना भत्ताका लागि सिफारिस गर्ने नीतिअनुरूप सरकारले परिपत्र गरेको हुनाले विवाद सिर्जना भएको अस्पताल विकास समितिका नासु नवराज लुइँटेलले बताए ।

प्रकाशित : असार ३, २०७८ ११:३६
प्रतिक्रिया
पठाउनुहोस्

खेलमै केन्द्रित हुँदै डेनमार्क

डेनमार्कका प्रशिक्षक कास्पर हिजुलमन्ड भन्छन्- ‘हामी एकपल्ट फेरि मैदानमा फर्कन तयार छौं । शनिबार हामीले सक्दो खेलेका थियौं । अब बिहीबार हामीले डेनमार्क कस्तो टिम हो, यसले कस्तो खेल्छ र कस्तो संघर्ष गर्छ, त्यो देखाउने छौं ।’
एएफपी

कोपनहेगन — डेनमार्कका लागि फेरि एकपल्ट युरोपेली च्याम्पियनसिपमा आफ्नो ध्यान केन्द्रित हुने समय आएको छ । फिनल्यान्डविरुद्धको खेलमा क्रिस्टियन एरिक्सन अचेत भएर ढलेको ५ दिनपछि बिहीबार डेनमार्क फेरि एकपल्ट मैदानमा फर्कंदै छ ।

बेल्जियमविरुद्धको खेलअघि अभ्यासका क्रममा डेनिस खेलाडी । तस्बिर : रोयटर्स

समूह ‘बी’ मा यसपल्ट उसको प्रतिद्वन्द्वी हुने शीर्ष वरीयताको बेल्जियम । शनिबारको घटनापछि टिमका लागि खेल्नु भावनात्मक पक्कै हुनेछ । पछिल्ला यी दिन पक्कै पनि डेनमार्कका खेलाडीले कसरी सामान्य हुने भनेर प्रयास गरेकै हुनुपर्छ ।

एरिक्सन स्वस्थ्य हुनेतर्फ अग्रसर छन् । उनले आफ्ना साथीलाई युरो २०२० मा ध्यान केन्द्रित गर्न भनेका छन् । डेनमार्कका प्रशिक्षक कास्पर हिजुलमन्ड मान्छन्, आफ्ना खेलाडी अगाडि बढ्ने प्रयासमा छन् । उनले भनेका छन्, ‘हामी एकपल्ट फेरि मैदानमा फर्कन तयार छौं । शनिबार हामीले सक्दो खेलेका थियौं । अब बिहीबार हामीले डेनमार्क कस्तो टिम हो, यसले कस्तो खेल्छ र कस्तो संघर्ष गर्छ, त्यो देखाउने छौं ।’

पार्केन स्टेडियममा हुने खेलमा २५ हजार दर्शकलाई प्रवेश अवसर दिइनेछ । जबकि फिनल्यान्डविरुद्धको खेलमा दर्शक संख्या १५ हजारमात्र थियो । यी दर्शकले पक्कै पनि आफ्नो टिम र खेलाडीको उच्च समर्थन गर्नेछन्, किनभने डेनमार्क पूरा देशले उनीहरूलाई नायक मानेको छ । एरिक्सन ढलेपछि जसरी खेलाडीले मानवीय पर्खाल बनाएर इन्टर मिलान खेलाडीलाई गरेको सीपीआरलाई सार्वजनिक गर्न दिएको थिएन, त्यसबाट सबै प्रभावित भएका छन् ।

डेनमार्कका प्रशिक्षक कास्पर हिजुलमन्ड । तस्बिर : एपी

डेनमार्कका समर्थकले पनि खेलको दसौं मिनेटमा उभिएर एरिक्सनलाई सम्मान गर्ने निर्णय गरेका छन्, किनभने एरिक्सनको जर्सी नम्बर १० हो । त्यतिबेला उनको नाम रंगशालामा गुन्जने पक्का छ । हिजलमुन्डले भनेका छन्, ‘खेल पक्कै पनि भावनात्मक हुनेछ, तर हामी यसका लागि तयार हुने प्रयासमा छौं । हामी चाहन्छौं, सबै खेलाडीले राम्रो खेलोस् ।’ डेनमार्कलाई लिएर एउटै समस्या के भने पहिलो गुमाएको छ । ठीक यही बेला प्रतियोगिताकै एक उच्च टिमको सामना गर्दै छ ।

बेल्जियमले रुसलाई आफ्नो पहिलो खेलमा रुसलाई सजिलै तीन गोलले हराएको थियो । त्यसमाथि बेल्जियमका प्रमुख खेलाडी केभिन डी ब्रुयने पनि टिममा फर्कंदैछन् । उनले पछिल्ला दिन टिमका अभ्यासमा पूर्ण रूपमा सहभागी भइसकेका छन् । सम्भवतः बेल्जियमका लागि एक्सेल विटसेल पनि मैदानमा फर्कने लगभग तयजस्तै छ । बेल्जियमका अर्का प्रमुख खेलाडी रोमेलु लुकाकुका लागि यो खेल आफैंमा अनौठो हुनेछ, किनभने एरिक्सन उनका इन्टरका साथी खेलाडी हुन् ।

रुसविरुद्धको खेलअगाडि लुकाकुले आफू रोएको बताएका थिए, एरिक्सनले बेहोरेको घटनालाई लिएर सम्झेर । त्यसमा उनले दुई गोल गरे । भनेका थिए, ‘क्रिस्टियन, बलियो हुनु । हामी तिमीलाई माया गर्छौं ।’ अब यिनै लुकाकुको काम हुनेछ, डेनमार्कको बाटोमा समस्या तेर्साउने । बेल्जियमका मिडफिल्डर नासेर चाडली डेनमार्कले यो विषम परिस्थितिमा कसरी खेल्नेछ भनेर आफूले अनुमानसमेत गर्न नसकेको बताउँछन् । झन्छन्, यो खेल दुवै टिमका लागि सजिलो हुने छैन ।

युक्रेनविरुद्ध ऊत्तरी मेसेडोनिया

बुखारेस्ट– युरो २०२० को समूह ‘सी’ को खेलमा युत्रेनले बिहीबार उत्तरी मेसेडोनियाको सामना गर्दै छ । दुवै टिमलाई एउटै चिन्ताले सताएको छ, यसमा पराजित रहे प्रतियोगिताबाट बाहिरिने सम्भावन रहन्छ । दुवै टिम आफ्नो पहिलो खेलमा फराजित रहेका थिए । युत्रेन नेरल्यान्ड्सको हातबाट हारेको थियो भने उत्तर मेसेडोनिया अस्ट्रियासँग । त्यसैले दुवै टिम एक आपसको सामना गर्दा एउटै उद्देश्यमा हुनेछ, स्पष्ट जित । अरू केही होइन ।

नेदरल्यान्ड्सविरुद्ध अस्ट्रिया

एम्स्ट्रडम– यो खेल भने समूह ‘सी’ को त्यस्तो खेल हो, जहाँ दुवै टिमले आ–आफ्नो पहिलो खेलमा पहिलो जित जित निकालेको छ । त्यसैले जतिबेला नेदरल्यान्ड्स र अस्ट्रियाको आमनेसामने गर्नेछन्, तिनको उद्देश्य समान हुनेछ, जितको क्रमलाई कायम राख्ने ।

नेदरल्यान्ड्स सात वर्षपछि कुनै ठूलो प्रतियोगिता खेलिरहेको छ, त्यसैले डच टिम चाहन्छन्, आफ्नो गर्विलो इतिहासअनुसार प्रदर्शन खेलन सकोस् । डच टिमको उद्देश्य यस खेल जितेर समूहमा शीर्ष भएर अगाडि बढ्ने हुनेछ ।

प्रकाशित : असार ३, २०७८ ११:१६
पूरा पढ्नुहोस्
प्रतिक्रिया
पठाउनुहोस्
×