जनरल वार्डमा चाप घट्दो- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

जनरल वार्डमा चाप घट्दो

महानगरमा अहिले पनि दैनिक सरदर ३–४ जनाको मृत्यु
विनोद भण्डारी

विराटनगर — कोरोना संक्रमितको उपचार गर्ने यहाँका नोबेल र विराट शिक्षण अस्पतालमा अक्सिजनसहितको जनरल वार्ड सातादेखि आधाभन्दा बढी खाली छन् । तर दुवै अस्पतालका आईसीयू र भेन्टिलेटर भने बिरामीले भरिएका छन् ।

नयाँ संक्रमित भर्ना हुने दर झन्डै साठी प्रतिशतले घटेको छ । भर्ना भएका संक्रमितमा कोरोना नेगेटिभ देखिए पनि पोस्ट कोभिड केयरको आवश्यकता परेकाले आईसीयू र भेन्टिलेटर खाली हुन नसकेको उपचारमा संलग्न मुक्ति आचार्यको भनाइ छ । साताअघि सय जनाको पीसीआर परीक्षण गर्दा झन्डै ७० जनामा कोरोना पुष्टि हुने गरेको थियो । अस्पतालमा भर्नादर बढेको थियो । महानगर कोभिड शाखा प्रमुख हैदर अलीका अनुसार अहिले सयमा २० जनामा संक्रमण पुष्टि हुने गरेकाले पनि संक्रमितको संख्या घटेको हो ।

महानगरले अहिले पनि दैनिक सरदर अढाई सयको एन्टिजेन र पीसीआर परीक्षण गर्दै आएको छ । अलीका अनुसार महानगरमा अहिले पनि दैनिक सरदर ३–४ जनाको मृत्यु हुँदै आएको छ । नोबेल शिक्षण अस्पतालले कोरोना संक्रमितको उपचारका लागि १७ वटा भेन्टिलेटर, ६३ वटा आईसीयू र अक्सिजनसहितको २ सय २० वटा जनरल वार्डको व्यवस्था गरेको छ । १७ वटै भेन्टिलेटर र ६३ वटै आईसीयू भरिएका छन् । अस्पतालका प्रबन्धक नारायण दाहालका अनुसार अक्सिजनसहितका १ सय ३० वटा जनरल वार्ड सातादेखि खाली छन् ।

विराट शिक्षण अस्पतालमा अक्सिजनसहितका जनरल वार्ड आधाभन्दा बढी खाली छन् । तर अस्पतालका आईसीयू र भेन्टिलेटर सबै भरिएका छन् । अस्पतालले संक्रमितको उपचारका लागि आईसीयू ४३ र भेन्टिलेटर १७ वटा व्यवस्था गरेको छ । सबै भरिएका छन् । अस्पतालको तथ्यांक शाखाका नीरज श्रेष्ठका अनुसार जनरल वार्ड १ सय ७५ मध्ये आइतबार ७१ वटामा संक्रमित उपचाररत छन् ।

कोसी कोभिड अस्पतालका २१ वटा आईसीयू अहिले पनि भरिएका छन् । १ सय १० बेड भएको अस्पतालमा ८० जना भर्ना छन् । कोसी अञ्चल अस्पतालका २५ वटै आईसीयू बेड भरिएका छन् । ७२ वटा अक्सिजनसहितका जनरल वार्डमध्ये ६१ मा संक्रमित उपचाररत छन् । महानगरमा आइतबारसम्ममा १ सय ३१ जनाले ज्यान गुमाएका छन् ।

प्रकाशित : जेष्ठ ३१, २०७८ १२:५९
प्रतिक्रिया
पठाउनुहोस्

मोरङमा संक्रमण र मृत्युदर घट्दो क्रममा

विनोद भण्डारी

विराटनगर — कोरोना संक्रमितको उपचार गर्ने विराटनगरका दुई ठूला निजी शिक्षण अस्पतालमा सातादेखि संक्रमितको भर्ना हुने संख्या उल्लेख्य मात्रामा घटेको छ ।

मृत्युदर पनि घटेको छ । नोबेल र विराट शिक्षण अस्पताल दुवैमा साताअघिसम्म दैनिक सयभन्दा बढी संक्रमित भर्ना हुन्थे भने दैनिक सरदर ६ जनाको मृत्यु हुने गरेको थियो । सातायता दुवै अस्पतालमा दैनिक सरदर बढीमा ३० जना भर्ना हुने र मृत्यु हुनेको संख्या पनि आधाले घटेको अस्पतालको तथ्यांक छ । दुवै अस्पतालमा यस वर्ष बुधबारसम्ममा १ हजार ५ सय ९२ जना संक्रमित भर्ना भएकामा १ हजार २ सय २६ जना संक्रमित निको भएर घर फर्केका छन् । २ सय ३४ जनाले ज्यान गुमाएका छन् ।

कोरोना संक्रमितको उपचारका लागि नोबेलले १७ वटा भेन्टिलेटर, ६३ वटा आईसीयूसहित तीन सय बेडको व्यवस्था गरेको छ । दुई साताअघिसम्म अस्पतालमा दैनिक कम्तीमा ६० जना भर्ना हुने गरेकोमा सातायता भर्ना हुनेक्रम निकै घटेको अस्पतालका प्रबन्धक नारायण दाहालले बताए । साताअघिसम्म भेन्टिलेटर, आईसीयू भरिएर अक्सिजन वार्डमा २ सय ६५ जनासम्म संक्रमितको उपचार हुँदै आएको थियो । त्यसबेला दैनिक सरदर ६ जनासम्मको मृत्यु भएको थियो । कोरोनाको दोस्रो चरणमा बुधबारसम्म नोबेलमा ८ सय ७३ जना संक्रमित भर्ना भए । ६ सय ५५ जना निको भएका छन् । १ सय ५७ को मृत्यु भएको छ । दाहालका अनुसार दुई साता पहिलासम्म दैनिक सरदर ५–६ जना निको भएर जान्थे । अहिले डिस्चार्ज हुनेको संख्या दैनिक सरदर २५–३० जना छ । नोबेलमा संक्रमितको उपचारमा संलग्न डा. मुक्ति आचार्यका अनुसार गत र यस वर्ष उपचारका लागि आएका संक्रमितमा भिन्नता पाइएको छ । ‘गत वर्ष सामान्य अवस्थामा आएका संक्रमित उपचारपछि चाँडै घर जान सक्ने अवस्थाका थिए । कोभिडबाट गत वर्ष दीर्घ रोगी बढी प्रभावित थिए,’ आचार्यले भने, ‘यस पटक हेर्दा सामान्य देखिने तर निमोनियाले ग्रस्त भइसकेको पाइएको छ, निको भएर कोभिड नेगेटिभ पुष्टि भए पनि पोस्ट कोभिड केयरको आवश्यकता पर्दा डिस्चार्ज गर्न गाह्रो हुने अवस्था छ ।’

विराट अस्पतालमा पनि पछिल्लो सातादेखि दैनिक सरदर १० जनामात्र संक्रमित भर्ना हुँदै आएका छन् । साताअघि दैनिक सरदर ४० जनासम्म संक्रमित भर्ना हुन्थे । अस्पताल तथ्यांक शाखा प्रमुख निरज श्रेष्ठका अनुसार त्यस बेला मृत्यु हुनेको संख्या साढे नौ प्रतिशतसम्म थियो । पछिल्लो साता दुई प्रतिशतमा झरेको छ । साता पहिला उक्त अस्पतालका ६३ वटा आईसीयू र भेन्टिलेटरसहित २ सय ३५ वटा बेड भरिएका थिए । अस्पतालमा बुधबारसम्ममा ७ सय १९ जना संक्रमित भर्ना भएकामा ५ सय ७१ डिस्चार्ज भएका छन् । विराटमा कोरोनाबाट ज्यान गुमाउनेको संख्या ७७ जना पुगेको छ ।

महानगरमा बुधबारसम्म १ सय २४ जनाले ज्यान गुमाएका छन् । दैनिक ३–४ जनाले ज्यान गुमाइरहेका छन् । कोसी कोभिड अस्पतालका २१ वटा आईसीयू भरिएका छन् । १ सय १० बेड भएको उक्त कोभिड अस्पतालमा बिहीबारसम्म ८० जना भर्ना छन् । कोसी अस्पतालका २५ वटै आईसीयू बेड भरिएका छन् । बिहीबारसम्ममा ६१ जना बिरामी भर्ना छन् । महानगरमा दैनिक अढाई सयको एन्टिजेन र पीसीआर परीक्षण हुने गरेको छ ।

प्रकाशित : जेष्ठ २८, २०७८ ०७:३७
पूरा पढ्नुहोस्
प्रतिक्रिया
पठाउनुहोस्
×