मोरङमा संक्रमण र मृत्युदर घट्दो क्रममा- प्रदेश १ - कान्तिपुर समाचार

मोरङमा संक्रमण र मृत्युदर घट्दो क्रममा

विनोद भण्डारी

विराटनगर — कोरोना संक्रमितको उपचार गर्ने विराटनगरका दुई ठूला निजी शिक्षण अस्पतालमा सातादेखि संक्रमितको भर्ना हुने संख्या उल्लेख्य मात्रामा घटेको छ ।

मृत्युदर पनि घटेको छ । नोबेल र विराट शिक्षण अस्पताल दुवैमा साताअघिसम्म दैनिक सयभन्दा बढी संक्रमित भर्ना हुन्थे भने दैनिक सरदर ६ जनाको मृत्यु हुने गरेको थियो । सातायता दुवै अस्पतालमा दैनिक सरदर बढीमा ३० जना भर्ना हुने र मृत्यु हुनेको संख्या पनि आधाले घटेको अस्पतालको तथ्यांक छ । दुवै अस्पतालमा यस वर्ष बुधबारसम्ममा १ हजार ५ सय ९२ जना संक्रमित भर्ना भएकामा १ हजार २ सय २६ जना संक्रमित निको भएर घर फर्केका छन् । २ सय ३४ जनाले ज्यान गुमाएका छन् ।

कोरोना संक्रमितको उपचारका लागि नोबेलले १७ वटा भेन्टिलेटर, ६३ वटा आईसीयूसहित तीन सय बेडको व्यवस्था गरेको छ । दुई साताअघिसम्म अस्पतालमा दैनिक कम्तीमा ६० जना भर्ना हुने गरेकोमा सातायता भर्ना हुनेक्रम निकै घटेको अस्पतालका प्रबन्धक नारायण दाहालले बताए । साताअघिसम्म भेन्टिलेटर, आईसीयू भरिएर अक्सिजन वार्डमा २ सय ६५ जनासम्म संक्रमितको उपचार हुँदै आएको थियो । त्यसबेला दैनिक सरदर ६ जनासम्मको मृत्यु भएको थियो । कोरोनाको दोस्रो चरणमा बुधबारसम्म नोबेलमा ८ सय ७३ जना संक्रमित भर्ना भए । ६ सय ५५ जना निको भएका छन् । १ सय ५७ को मृत्यु भएको छ । दाहालका अनुसार दुई साता पहिलासम्म दैनिक सरदर ५–६ जना निको भएर जान्थे । अहिले डिस्चार्ज हुनेको संख्या दैनिक सरदर २५–३० जना छ । नोबेलमा संक्रमितको उपचारमा संलग्न डा. मुक्ति आचार्यका अनुसार गत र यस वर्ष उपचारका लागि आएका संक्रमितमा भिन्नता पाइएको छ । ‘गत वर्ष सामान्य अवस्थामा आएका संक्रमित उपचारपछि चाँडै घर जान सक्ने अवस्थाका थिए । कोभिडबाट गत वर्ष दीर्घ रोगी बढी प्रभावित थिए,’ आचार्यले भने, ‘यस पटक हेर्दा सामान्य देखिने तर निमोनियाले ग्रस्त भइसकेको पाइएको छ, निको भएर कोभिड नेगेटिभ पुष्टि भए पनि पोस्ट कोभिड केयरको आवश्यकता पर्दा डिस्चार्ज गर्न गाह्रो हुने अवस्था छ ।’

विराट अस्पतालमा पनि पछिल्लो सातादेखि दैनिक सरदर १० जनामात्र संक्रमित भर्ना हुँदै आएका छन् । साताअघि दैनिक सरदर ४० जनासम्म संक्रमित भर्ना हुन्थे । अस्पताल तथ्यांक शाखा प्रमुख निरज श्रेष्ठका अनुसार त्यस बेला मृत्यु हुनेको संख्या साढे नौ प्रतिशतसम्म थियो । पछिल्लो साता दुई प्रतिशतमा झरेको छ । साता पहिला उक्त अस्पतालका ६३ वटा आईसीयू र भेन्टिलेटरसहित २ सय ३५ वटा बेड भरिएका थिए । अस्पतालमा बुधबारसम्ममा ७ सय १९ जना संक्रमित भर्ना भएकामा ५ सय ७१ डिस्चार्ज भएका छन् । विराटमा कोरोनाबाट ज्यान गुमाउनेको संख्या ७७ जना पुगेको छ ।

महानगरमा बुधबारसम्म १ सय २४ जनाले ज्यान गुमाएका छन् । दैनिक ३–४ जनाले ज्यान गुमाइरहेका छन् । कोसी कोभिड अस्पतालका २१ वटा आईसीयू भरिएका छन् । १ सय १० बेड भएको उक्त कोभिड अस्पतालमा बिहीबारसम्म ८० जना भर्ना छन् । कोसी अस्पतालका २५ वटै आईसीयू बेड भरिएका छन् । बिहीबारसम्ममा ६१ जना बिरामी भर्ना छन् । महानगरमा दैनिक अढाई सयको एन्टिजेन र पीसीआर परीक्षण हुने गरेको छ ।

प्रकाशित : जेष्ठ २८, २०७८ ०७:३७
प्रतिक्रिया
पठाउनुहोस्

कोरोनाले दुई दिनमा परिवारका तीनको मृत्यु

विनोद भण्डारी

विराटनगर — कोरोना संक्रमणका कारण ३६ घण्टाको अन्तरालमा विराटनगर–१ मा एकै परिवारका तीन जनाको मृत्यु भएको छ । ८१ वर्षीया आमा, ६२ वर्षीय छोरा र ५६ वर्षीया बुहारीको मृत्यु भएको हो । हजुरआमा र आमाबुबा गुमाएका दिवस ढुंगाना अहिले कोसीको कोभिड अस्पतालमा उपचाररत छन् । 

उनीसहित परिवारका चार जनामा संक्रमण देखिएपछि सबैलाई साताअघि कोभिड अस्पताल भर्ना गरिएको थियो । वडाध्यक्ष उद्धव अर्यालका अनुसार गत शुक्रबार बुबा विदुरको निधन भयो । आफू पनि संक्रमित भएर अस्पताल भर्ना भएका कारण दिवसले दागबत्ती दिन पनि पाएनन् ।

नेपाली सेनासहित आफन्तको सहभागितामा विदुरको अन्त्येष्टि गरेर मलामी घर आइपुगेको केही समयपछि शनिबार साँझ दिवसकी हजुरआमा नारायणीदेवीको निधन भएको खबर अस्पतालबाट आयो । त्यसको ५ घण्टापछि आमा इन्दिराको निधन भएको हो । दिवसका आफन्त अरुण न्यौपानेले भने ‘साँझ झपक्क भएकाले फुपू दिदी (नारायणी) को शनिबार साँझ अन्त्येष्टि गर्न सकिएन । राति १ बजे दिवसकी आमा ५६ वर्षीया इन्दिराको पनि निधनको खबर आयो ।’

सासू–बुहारी दुवैको अन्त्येष्टि आइतबार बिहान एकसाथ गरिएको न्यौपानेले बताए । विदुरलाई उनका भाइ विक्रमले दागबत्ती दिएको चौबीस घण्टा नबित्दै उनले आमा र भाउजूलाई पनि दागबत्ती दिनुपर्‍यो । उनका अनुसार अहिले दिवसको स्वास्थ्यमा सुधार भइरहेको छ । उनकी पत्नी र बालबच्चालाई इटहरीस्थित ससुरालीमा राखिएको छ ।

विराटनगरको महालक्ष्मी ज्वेलर्सका सञ्चालक विमल वेगवानीले पनि कोरोना संक्रमणको दोस्रो लहरमा चौबीस घण्टाको अवधिमा पत्नी र छोरा गुमाए । उनकी ६१ वर्षीया पत्नी नीलमदेवीको वैशाख २९ मा निधन भयो । भोलिपल्ट ४३ वर्षीय छोरा दिलीपको पनि संक्रमणकै कारण ज्यान गएको थियो ।

विराटनगर–२ तीनपैनीका गौरव र सौरभ निरौलाले पनि यसपालिको संक्रमणमा १० दिनको फरकमा आमाबुबा दुवै गुमाए । बुबा गोविन्द निरौला बितेको १० औं दिनमा आमा मीनाको पनि कोरोनाकै कारण मृत्यु भएको वडाध्यक्ष कुमार पोखरेलले बताए । मोरङको बेलबारी–९ डाँगीहाटमा कोरोना संक्रमित आमाछोरीको चौबीस घण्टाको फरकमा मृत्यु भएको छ । स्थानीय सुजय गौतमका अनुसार अघिल्लो दिन छोरी संगीताको मृत्यु भएको थियो । त्यसको भोलिपल्ट आमा रीता दर्जीको मृत्यु भयो । उनका अनुसार रीताका पतिको पनि गत वर्ष कोरोनाकै कारण मृत्यु भएको थियो ।

पथरी शनिश्चरेमा दुई परिवारले दुवैजना अभिभावक गुमाएका छन् । नगर स्वास्थ्य संयोजक मुरारी आचार्यका अनुसार वडा–१ का एनबी सुब्बा र उनकी पत्नी धनमायाको चौबीस घण्टाको बीचमा संक्रमणका कारण मृत्यु भएको छ । वडा–४ का दिनेश गजमेरको मृत्यु भएको ६ दिनपछि उनका पिता गणेशको पनि कोरोनाकै कारण मृत्यु भएको थियो ।

उर्लाबारी गाविस छँदा उपाध्यक्ष रहेका कुमार धिमाल र उनका छोरा तेजबहादुरले पनि कोरोना संक्रमणकै कारण साताअघि ज्यान गुमाएको नगर प्रमुख खड्ग फागोले बताए । कुमारको निधन भएको पाँच दिनपछि छोरा तेजबहादुरको मृत्यु भएको थियो ।

प्रकाशित : जेष्ठ १९, २०७८ १०:००
पूरा पढ्नुहोस्
प्रतिक्रिया
पठाउनुहोस्
×