कोरोना संक्रमणबाट धरानका उद्योगी रोशन सोनीको निधन
धरान — धरानका उद्योगपति रोशन सोनीको कोरोना संक्रमणबाट निधन भएको छ । सुनसरी उद्योग वाणिज्य संघका सल्लाहकारसमेत रहेका धरान–३ निवासी सोनीको विराट मेडिकल शिक्षण अस्पताल विराटनगरमा उपचारको क्रममा शुक्रबार राति १०:४५ बजे निधन भएको सुनसरी उद्योग वाणिज्य संघका अध्यक्ष गिरिधारी सापकोटाले बताए ।
पारिवारिक स्रोतका अनुसार सोनी पछिल्लो समय आन्द्रामा समस्या भएर उपचारका लागि भारतको दिल्ली गएका थिए । दिल्लीमा अप्रेसन गरेर उनी घर फर्किएका थिए । सोही क्रममा पीसीआर जाँच गर्दा उनलाई कोरोना संक्रमण पुष्टि भएको थियो । त्यसपछि उनलाई उपचारका लागि एक साताअघि मोरङको विराट मेडिकल शिक्षण अस्पताल लगिएको थियो ।
सोनीले धरानको तीनकुनेमा सूर्य कत्था उद्योग र टरपेन्टाइन खोटोको उद्योग र पेट्रोल पम्पसमेत सञ्चालन गर्दै आएका थिए । उनको शवलाई विराटनगरस्थित सिंगिया खोलामा नै अन्त्येष्टि गरिने धरानका व्यवसायी कृष्ण पाठकले जानकारी दिए ।
प्रकाशित : वैशाख २५, २०७८ ०९:२८