उदयपुरमा भीरबाट लडेर एकको मृत्यु
उदयपुर — उदयपुरको कटारी नगरपालिका–११ हर्देनी भीरमाथि टिकटक बनाउने क्रममा लडेर शुक्रबार एक युवकको मृत्यु भएको छ ।
भीरबाट लडेर सुनसरीको धरान–५ का १८ वर्षीय सुभाष परियारको मृत्यु भएको हो । धरानबाट ओखलढुङगाको लागि जाँदै गरेको ना १ च ३३७० नम्बरको सुमो हर्देनी भीरमाथि सडकमा बिग्रिएको थियो । सुमो बिग्रिएको मौका छोपी सोही सुमोमा यात्रा गरिरहेका परियार सुमोबाट ओर्लिएर टिकटक बनाउने क्रममा भीरबाट लडेर गम्भीर घाइते भएका थिए ।
गम्भीर घाइते परियारको उपचारका लागि कटारी अस्पताल लैजाने क्रममा दिउँसो बाटोमा नै मृत्यु भएको जिल्ला प्रहरी कार्यालय उदयपुरले जनाएको छ । घटनास्थलमा प्रहरी टोलीबाट थप अनुसन्धान भइरहेको इलाक प्रहरी कार्यालय कटारीले जनाएको छ ।
प्रकाशित : वैशाख २४, २०७८ १७:५१प्रतिक्रिया