हेलचेक्‍य्राइँ बढेपछि थप कडाइ

त्यसमध्ये एक जनालाई मिसन अस्पताल ओखलढुंगाको आइसोलेसनमा राखेर उपचार भइरहेको छ । कन्ट्याक्ट ट्रेसिङमा रहेकाको परीक्षण गरिएको छैन । कोभिडको दोस्रो चरण सुरु भएपछि हालसम्म जिल्लाबाट कसैको पनि पीसीआर परीक्षण गरिएको छैन । पीसीआरका लागि धरान वा काभ्रे पुर्‍याउनुपर्ने बाध्यता छ । ‘केही लक्षण देखिएका र कन्ट्याक्ट ट्रेसिङमा परेकाको स्वाब संकलन गरी पीसीआरका लागि पठाउने तयारी भइरहेको छ ।’

जिल्ला स्वास्थ्य कार्यालय प्रमुख सुमन तिवारीले भने, ‘तर कहाँ लैजाने भन्ने टुंगो भइसकेको छैन ।’ जिल्लाका विभिन्न स्थानीय तहहरूले आंशिक रूपमा निषेधाज्ञा जारी गरेका छन् । मानेभन्ज्याङ, चम्पादेवी, मोलुङ, लिखु गाउँपालिका र सिद्धिचरण नगरपालिकालगायतले अत्यावश्यकीय सेवाबाहेकका काम बन्द गरेका छन् । सहायक प्रमुख जिल्ला अधिकारी मनिता कार्कीले भनिन्, ‘स्थानीय तहहरूलाई बाहिरी जिल्लाबाट आउनेलाई विशेष निगरानी गरी क्वारेन्टाइन लगायतमा राख्नका लागि सुझाव दिएका छौँ ।’

हालसम्म जिल्ला अस्पतालमा ६ शय्या र मिसन अस्पतालमा ६ शय्या गरि जम्मा १२ शय्याको मात्र आइसोलेसन तयारी अवस्थामा छन् । संक्रमितको संख्या बढ्दै गएमा कसरी उपचार गर्ने भन्ने विषयमा आवश्यक तयारी ढिलाइ भएको सरोकारवालाको भनाइ छ । स्थानीयले पीसीआर परीक्षण गर्ने मेसिन जिल्लामै उपलब्ध हुनुपर्ने माग गरेका छन् । यहाँका व्यवसायीले सरकारी तवरबाट नसक्ने भएमा निजी रूपमा शुल्क तोकेर पीसीआर मेसिन सञ्चालन गर्न अनुमति दिनुपर्ने बताएका छन् । गतसाल पनि स्थानीय तहले मिलेर जिल्लामा एउटा पीसीआर मेसिन खरिद गर्ने निर्णय गरेका थिए । कतिपयले बजेटसमेत विनियोजन गरेका थिए । तर संक्रमण दर घट्दै गएपछि सो बजेट अन्य शीर्षकमै खर्च गरिएको थियो ।

निषेधाज्ञामा थप कडाइ

कोरोना संक्रमण बढ्दै गएपछि उदयपुरमा निषेधाज्ञालाई थप कडा पारिएको छ । जिल्ला कोभिड–१९ संकट व्यवस्थापन केन्द्रको बैठकले निषेधाज्ञालाई कडाइ गर्ने निर्णय गरेको हो । संक्रमण समुदायमै फैलिएपछि शुक्रबारदेखि ३१ गतेसम्म सबै प्रकारका सवारीसाधनलाई पूर्णरूपले रोक लगाउने निर्णय गरिएको केन्द्रका अध्यक्षसमेत रहेका प्रमुख जिल्ला अधिकारी तुलसीराम सेढाईंले बताए । अत्यावश्यक कामबाहेक सर्वसाधारणलाई जिल्लाबाहिर आउजाउमा समेत रोक लगाइएको सेढाईंले बताए ।

यसअघि बिहान १० बजेदेखि ३ बजेसम्म प्रमुख व्यापारिक केन्द्र सञ्चालन गर्न दिने निर्णयलाई परिमार्जन गर्दै सबै बजारलाई बिहान ६ देखि १० बजेसम्म मात्र सञ्चालन गर्न दिइने भएको छ । अत्यावश्यक वा विशेष काम औषधि, खाद्यवस्तु तथा अत्यावश्यक वस्तु वा सेवा खरिद बिक्रीबाहेक सामान्यतः कसैलाई पनि घरबाहिर ननिस्कन र निस्कनै पर्ने अवस्था भए सामाजिक दूरी, स्वास्थ्य सुरक्षा मापदण्ड अवलम्बन गर्न आग्रह गरिएको छ ।

बैठकले राष्ट्रिय जनगणना २०७८ का सबै गतिविधि र राष्ट्रिय परिचयपत्रको जिल्लास्तरीय अभियान अर्को सूचना जारी नभएसम्मका लागि रोक लगाउने निर्णय भएको सेढार्इंले बताए । साथै, उनले स्वास्थ्योपचारबाहेक अन्यत्र प्रयोग भइरहेका अक्सिजन सिलिन्डरहरू तीन दिनभित्र अक्सिजन उद्योग वा जिल्ला अस्पतालमा बुझाउन अनुरोध गरिएको पनि बताए । भारत तथा अन्य जिल्लाबाट प्रवेश गरी उदयपुरमा बसोबास गर्ने व्यक्तिको हकमा स्थानीय तहको अनुगमनमा अनिवार्य रूपमा १० दिन होमआइसोलेसनमा बस्ने निर्णय भएको छ । विवाहका लागि बेहुलाबेहुलीसहित दुईवटा सवारीसाधनमा ५/५ जनाका दरले ब्यानर राखेर आउजाउ गर्न दिने निर्णय भएको प्रजिअ सेढाईंले बताए ।

कोरोना संक्रमितको संख्या थपिँदै गएपछि इलाममा सजगता अपनाइएको छ । जिल्लामा बुधबार साँझसम्म ९९ जना सक्रिय संक्रमित पुगेका छन् । पछिल्लोपटक कोराना संक्रमणवाट जिल्लामा ४ जनाको निधन भइसकेको छ । संक्रमण बढेसँगै सदरमुकाम क्षेत्रमा बुधबारदेखि आवतजावत बन्द गरिएको छ । कोभिड–१९ संकट व्यवस्थापन समितिले संक्रमण नियन्त्रणका लागि वैशाखसम्मका लागि आवतजावत बन्द गर्ने निर्णय गरेको हो । बन्दको समयमा खाद्यान्न र औषधि खरिदसहित अत्यावश्यक कामका लागि भने प्रतिबन्ध लगाइएको छैन । त्यस्तै इलाम नगरपालिका ५ बिब्ल्याँटे बजारमा लामो दूरीका सवारी पार्किङ बन्द गरिएको छ । इलाम उद्योग वाणिज्य संघ, सूर्योदय उद्योग वाणिज्य संघ, पूर्वेली जिप तथा ट्याक्सी यातायात सेवाले पनि एक साताका लागि व्यवसाय बन्द गर्न आग्रह गरेका छन् ।

इलाम नगरपालिकाले बजार तथा राजमार्ग क्षेत्रमा किटनाशक औषधि छर्कन सुरु गरेको छ । दमकल पुग्ने सबै क्षेत्रमा ७ दिनसम्म लगातार औषधि छर्कने नगर प्रमुख महेश बस्नेतले जानकारी दिए । यता पशुपतिनगरमा २० जना अट्ने होल्डिङ सेन्टर स्थापना गरिएको छ । जिल्लाका सबै स्थानीय तहमा आइसोलेसन र क्वारेन्टाइनको स्थापना गर्न कोभिड–१९ संकट व्यवस्थापन समितिले निर्देशन दिइसकेको छ ।

विराटनगरमा ७ संक्रमितको निधन

मोरङ– विराटनगरमा एकै दिन ७ कोरोना संक्रमितको मृत्यु भएको छ । कोसी अस्पतालको कोभिड–१९ उपचार केन्द्रमा ४, नोवेल अस्पतालमा २ र न्युरो अस्पतालमा एक जनाको मृत्यु भएको हो ।

कोभिड–१९ उपचार केन्द्रमा विराटनगर १० का ५७ वर्षीय, विराटनगर १३ का ५० वर्षीय, जहदा गाउँपालिका ५ का २५ वर्षीय र सुनसरीको कोसी गाउँपालिका ४ का ६५ वर्षीयको बिहीबार मृत्यु भएको छ । उपचार केन्द्रका संयोजक बैजनाथ साहका अनुसार स्वास्थ्य अवस्था गम्भीर रहेका चारै जनाको उपचारका क्रममा मृत्यु भएको हो । नोवेल अस्पतालमा विराटनगर ५ की ३७ वर्षीया र विराटनगर १९ का ६४ वर्षीयको उपचारको क्रममा मृत्यु भएको अस्पतालका प्रबन्धक नारायण दाहालले बताए । न्युरो अस्पतालमा रंगेली नगरपालिका ३ का २६ वर्षीयको मृत्यु भएको छ । अस्पतालमा १७ दिनदेखि उपचाररत उनमा बुधबार कोरोना संक्रमण पुष्टि भएको र बिहीबार उपचारको क्रममा मृत्यु भएको अस्पतालका भारत श्रेष्ठले बताए ।

बीपीमा ३ को मृत्यु

सुनसरी– धरानस्थित बीपी कोइराला स्वास्थ्य विज्ञान प्रतिष्ठानको कोभिड अस्पतालमा बिहीबार तीन जना कोरोना संक्रमितको मृत्यु भएको छ । मोरङको मिक्लाजुङ–२ का ७५ वर्षीय, धरान–२ की ५३ वर्षीया र सिराहाको गोलबजार–६ का २९ वर्षीयको मृत्यु भएको प्रतिष्ठानले जनाएको छ ।