भारतबाट सीधै घर- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

भारतबाट सीधै घर

कान्तिपुर संवाददाता

मोरङ — विराटनगर रानी नाकास्थित हेल्थ डेस्कमा भारतबाट आएका विद्यार्थीलगायतलाई एन्टिजेन परीक्षण गरेर नेपाल प्रवेश गर्न दिइने गरिएको छ । 

एन्टिजेन परीक्षणमा कोरोना पोजिटिभ आएपछि हेल्थ डेस्कले सम्बन्धित स्थानीय तहलाई संक्रमित जिम्मा लगाउने नीति लिएको छ । तर स्थानीय तहले भने संक्रमितलाई जिम्मा लिन नआउँदा व्यवस्थापनमा निकै चुनौती भएको हेल्थ डेस्क प्रमुख डा. कमलकिशोर यादवले गुनासो पोखे । स्थानीय तहले जिम्मा लिन नआउँदा संक्रमितलाई नोबेल अस्पतालमा सञ्चालित आइसोलेसनमा भर्ना गरिरहेको उनले बताए ।

तीव्र गतिमा संक्रमण बढिरहेको भारतबाट फर्केका नेपालीलाई स्थानीय तहले क्वारेन्टाइनमा राख्न नसकेकाले संक्रमण फैलिएको चिकित्सकको भनाइ छ । पालिकामा अहिले क्वारेन्टाइन र आइसोलेसन नभएकाले संक्रमितलाई ल्याएर व्यवस्थापन गर्न नसकिएको सुन्दर हरैंचाका नगर प्रमुख शिवप्र्रसाद ढकालले बताए ।

कोसी अस्पताल प्रमुख डा. चुमनलाल दासले प्रदेश १ मा भारतबाट फर्केका नेपालीलाई क्वारेन्टाइनमा नराखेकाले संक्रमितको संख्या ह्वात्तै बढेको बताए । ‘अझै पनि भारतबाट आएकाहरू सोझै घर जाने गरेका छन्, उनीहरूलाई अझै क्वारेन्टाइनमा राख्ने तयारी नहुनु दुर्भाग्य हो,’ उनले भने, ‘यसको मूल्य अबको एक हप्तामै अवस्था भयावह भएपछि चुकाउनु पर्नेछ ।’

दोस्रो चरणको संक्रमण नियन्त्रण तथा रोकथाममा स्थानीय तहले प्रभावकारी भूमिका निर्वाह गर्न नसकेकाले संक्रमण दर बढ्दै गएको दासले बताए । ‘स्थानीय तहले अझै क्वारेन्टाइनको व्यवस्था नगरेकाले समुदाय स्तरमा संक्रमण फैलिँदै गएको छ,’ उनले भने, ‘संक्रमितको कन्ट्याक्ट ट्रेसिङ अझै हुन नसक्नु स्थानीय तहको अर्को ठूलो कमजोरी हो ।’

होमआइसोलेसनमा बसेका संक्रमितहरूलाई पनि स्थानीय तहहरूले बेवास्ता गरेकाले धमाधम मृत्यु भइरहेको छ । प्रदेश १ स्थित १४ जिल्लामा १ सय ३७ स्थानीय तह छन् । जसमध्ये सोलुखुम्बुबाहेक १४ जिल्लामा संक्रमण फैलिएको छ ।

प्रकाशित : वैशाख २३, २०७८ ११:०५
प्रतिक्रिया
पठाउनुहोस्

संखुवासभामा व्यवसाय वैशाख मसान्तसम्म बन्द

कान्तिपुर संवाददाता

संखुवासभा — सदरमुकामका पसल व्यवसाय बुधबारबाट पूर्णरूपमा बन्द गरिएको छ । कोरोना संक्रमणको जोखिम बढेपछि संखुवासभा उद्योग वाणिज्य संघले वैशाख २२ देखि ३१ सम्म खाँदबारी र आसपासका बजार क्षेत्रमा भएका पसल व्यवसाय बन्द गरेको हो । 

संघले औषधि पसल भने २४ घण्टा सञ्चालन गरिने जनाएको छ । खाद्यान्न पसलहरू बिहान ६ देखि ९ र बेलुकी ४ देखि ६ बजेसम्म स्वास्थ्य मापदण्ड अपनाएर सञ्चालन गर्ने र साप्ताहिक हाटबजारमा आउने सागसब्जीलाई बजार घुमाएर बिक्री गर्नुपर्ने संघले जनाएको छ ।

त्यस्तै, खाँदबारी नगरपालिकाले नगरक्षेत्रभित्र लाग्ने साप्ताहिक हाटबजार पूर्णरूपमा बन्द गरेको छ । शुक्रबार, शनिबार र बुधबार लाग्ने साप्ताहिक हाटबजारमा भीडभाड धेरै भएको भन्दै नगरपालिकाले बन्द गरेको हो ।

खाँदबारीमा अटेरीपनका कारण कोरोनाको जोखिम बढ्दो छ । पसल व्यवसाय बन्द भए पनि यातायात भने निर्बाध रूपमा सञ्चालनमा छन् । सहरका विभिन्न स्थानबाट घर फर्किनेहरू बढेका छन् । जिल्ला प्रशासन कार्यालयले अहिले नै निषेधाज्ञा लगाउने केही तयारी नभएको जनाएको छ । संखुवासभामा चैत १९ यता ६६ जना संक्रमित भइसकेका छन् ।

प्रकाशित : वैशाख २३, २०७८ ११:०३
पूरा पढ्नुहोस्
प्रतिक्रिया
पठाउनुहोस्
×