धनकुटाको चुलिवनको डढेलो नियन्त्रण हुन सकेन

धनकुटा–८ को टेकुनाला क्षेत्रको जंगलबाट सल्किएको आगो ७ नं. वडाको मगर बस्ती, कालिकास्थान र लाफा चोक आसपासका बस्ती छेउबाट अन्यत्र सल्किएको छ । प्रमुख जिल्ला अधिकारी वासुदेव दाहालले धनकुटा बजारबाट करिब एक किलोमिटर नजिक रहेको डढेलो आइतबार पनि नियन्त्रणमा आउन नसकेको बताए ।

त्यस क्षेत्रका बस्ती जोगाउन पाँच वटा दमकलले प्रयास गरेका थिए । नेपाली सेना, सशस्त्र प्रहरी र नेपाल प्रहरीका अग्नि नियन्त्रकहरू उक्त स्थानमा खटिएका छन् । डढेलोले धनबहादुर पौडेल र इन्द्रबहादुर रसाइलीको दुई घर गोठ जलेर पूर्ण रूपमा क्षति पुगेको प्रहरीले जनाएको छ ।