आगलागी पीडित बारीमा रात बिताउन बाध्य- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

आगलागी पीडित बारीमा रात बिताउन बाध्य

चन्द्र कार्की

तेह्रथुम — साताअघि आगलागीमा घरबास गुमाएका फेदाप गाउँपालिका १ सिम्ले बयरबुङका ७ परिवारको बिचल्ली भएको छ । घरगोठ जलेपछि यी ७ घरका ३५ जना बढी सदस्य पाखोबारीमा रात बिताउन बाध्य छन् । पर्याप्त राहत नपाउँदा बिहान बेलुकको छाक टार्नसमेत समस्या भएको पीडितले गुनानो गरेका छन् । 

तेह्रथुमको फेदाप गाउँपालिका १ सिम्लेस्थित बयरवुङ बस्तीमा आगलागीमा परेका घरहरुमा स्थानीय । तस्बिर : चन्द्र कार्की/कान्तिपुर 

पीडितहरु अहिले गाउँपालिका र रेडक्रसले दिएको त्रिपाल टाँगेर बारीमा रात कटाइरहेका छन् । सबै सम्पत्ति खरानी भएपछि बारीको पाटामा बास भएको पीडित ५८ वर्षीय पूर्णबहादुर थापाले बताए । उनले भनेजस्तो सहयोग र राहत नजुट्दा बस्ने र खाने टुंगो नभएको दुखेसो पोखे ।

खानका लागि केही राहत जुटे पनि बासका लागि घर बनाउन कतैबाट सहयोग नजुटेको अर्का पीडित छविलाल थापाले बताए । ‘केही दिन पुग्ने खानेकुरा र ओड्ने, ओछ्याउने जुटेको छ’, पीडित शुक्रवहादुर माझीले भने ‘बास बस्ने घर बनाउने तर्फ कतैबाट पनि सहयोग जुटेको छैन ।’सहयोगीहरुले पनि खाद्यान्न र लत्ता कपडामात्र लिएर आउने गरेको उनले सुनाए ।

पीडित बीरबहादुर कार्कीले घर बनाउने कार्यमा सहयोग गर्न पीडितले सबैसँग आह्वान गरेका छन् । स्थानीयस्तरमा घर बनाउन चाहिने काठसमेत नभएको उनीहरुको भनाइ छ ।

आगलागीमा परी पूर्णबहादुर थापा, पदमबहादुर थापा, नरमाया भण्डारी, छविलाल थापा, तारावीर थापा, शुक्रबहादुर माझी र वीरबहादुर कार्कीसहित २१ जनाको घर जल्दा २ करोड रुपैयाँ बराबरको क्षति भएको गाउँपालिका उपाध्यक्ष गितादेवी थापाले जानकारी दिइन् । उनले पीडितको घर बनाउने गाउँपालिकाले सहयोग गर्ने आश्‍वासन दिइन् ।

गाउँको पुछारमा रहेको जंगलबाट सल्किएको आगो बस्तीमा पस्दा गाउँनै जलेको हो । जलेका २१ घर मध्ये ७ घरमा मानिस रहेको र बाँकी घरका गाउँले बसाइँ सरेर गएकाले क्षति कम भएको पीडितको भनाइ छ । आगलागीमा परी स्थानीय ७४ वर्षीया वृद्धा नरमाया भण्डारी हराइरहेकी छिन् । उनी आगो लागेको घरबाट भाग्न नसक्दा सोही आगोमा परी जलेको हुन सक्ने प्रहरीको अनुमान छ ।


प्रकाशित : चैत्र २१, २०७७ १५:५९
प्रतिक्रिया
पठाउनुहोस्

तेह्रथुमको सिद्धकाली माविमा आगलागी

चन्द्र कार्की

तेह्रथुम — तेह्रथुमको फेदाप गाउँपालिका–२ ओयाक्जुङमा रहेको सिद्धकाली माध्यमिक विद्यालयमा शनिबार बिहान आगलागी भएको छ ।

विद्यालयको प्राशसनिक भवनमा बिहान करीब ३ बजेतिर आगलागी सुरु भएको विद्यालयका प्रध्यानाध्यापक कुलप्रसाद दुलालले जानकारी दिए । आगलागीमा परी विद्यालयको प्रशासनिक भवनसहित अन्य भौतिक संरचना पूर्ण रुपमा जलेर नष्ट भएको छ । आगलागीमा १ करोडभन्दा बढीको क्षति भएको अनुमान गरिएको प्रधानाध्यापक दुलाले बताए ।

विद्युत सर्ट भएर आगलागी भएको हुन सक्ने विद्यालयले जनाएको छ । आगलागीमा परी विद्यालयका प्रशासनिक कागजात, पुराना शैक्षिक अभिलेख, शैक्षिक सामग्रीलगायत अन्य भौतिक सामग्री समेत जलेको छ । बिहान १० बजे शिक्षक, विद्यार्थी, स्थानीय अभिभावक र प्रहरी मिलेर आगो निभाइएको छ ।

प्रकाशित : फाल्गुन १५, २०७७ १०:४४
पूरा पढ्नुहोस्
प्रतिक्रिया
पठाउनुहोस्
×