ताप्लेजुङको खाम्लुङमा घर मतान जल्दा २९ लाख क्षति

चैत्र १३, २०७७आनन्द गौतम

ताप्लेजुङ — मेरिङदेन गाउँपालिका ३ खाम्लुङको साक्फारामा शुक्रबार मध्यान्ह लागेको आगोले स्थानीय हरिप्रसाद पोखरेलको तीनतले घर, दुईतले मतान र कटेरो जलेको छ । आगो निभाउने क्रममा हरिका छोरा तिलप्रसाद घाइते भएका छन् । उनको कम्मरदेखि मुनीको भाग जलेको प्रहरीले जनाएको छ । उनको जिल्ला अस्पताल ताप्लेजुङमा उपचार भइरहेको छ ।

घरदेखि करिब आठ सय मिटर पश्चिम खेतमा झ्यास, पतकर जलाउने क्रममा हावाले उडाएको आगोले घर जलाएको हो । ‘त्यहीबेला ठूलो हावा चल्यो, हावाले आगोको लप्को उडाएर ल्याएर कटेरोमा टिपेछ,’ पोखरेलले भने, ‘कटेरोबाट सुरु भएको आगोले घर मतान सबै जलायो ।’ कटेरो र मतानको मुनी बाँधेका बस्तु फुकाउन र ओड्ने ओछ्याउने कपडासम्म निकाल्न भ्याएको पोखरेलले बताए ।