ताप्लेजुङमा एमाले र माओवादीले कुर्सी, टेबल बाँडे- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

ताप्लेजुङमा एमाले र माओवादीले कुर्सी, टेबल बाँडे

आनन्द गौतम

ताप्लेजुङ — नेपाल कम्युनिष्ट पार्टी एमाले र माओवादी केन्द्रले कुर्सी र टेबल बाँडेका छन् । अदालतको निर्णयपछि मंगलबार अन्तिम बैठक गरेका दुई पार्टीले एकताका बेला संकलन गरे जसरी नै वितरण गरिएको माओवादी केन्द्रका कार्यालय सचिव सुरज ओझाले बताए । 

ओझाका अनुसार छुट्टै कार्यालय राख्ने भएको माओवादी केन्द्रले सोफासेट, तीनवटा दराज, टि टेबल र ५० वटा कुर्सी ल्याउने भएको छ । ‘हामीले पहिला त्यति नै लगेका थियौं, ती जस्तो अवस्थामा छन् त्यस्तै अवस्थामा ल्याउने भयौं,’ ओझाले भने, ‘बुधबार देखि नै पार्टी कार्यालय सञ्चालनमा ल्याउँछौं ।’ वीरेन्द्र चोकमा रहेको काजी गुरुङको घरमा कार्यालय राख्ने टुंगो भएको उनले जानकारी दिए । अन्तिम बैठक भावनात्मक भएको पनि उनले बताए । ‘यो बिचमा जति तितोमिठो भयो सबैले सम्मान पूर्वक लियौं भन्दै छुट्यौं,’ ओझाले भने ।

एमालेको भने दुईवटा पार्टी कार्यालय हुने भएको छ । माओवादीलाई बिदाई गरेपछि बलबहादुर साम्सोहाङ नेतृत्वले पुरानै कार्यालयमा एमालेको बोर्ड राख्ने भएको छ भने केपी शर्मा ओली समूहले नियुक्त गरेको भुपेन्द्र थेबे नेतृत्वको समूहले मंगलबार बिहानै बोर्ड राखेको छ । थेबेले आफू आधिकारिक रहेको पनि दाबी गरेका छन् ।

प्रकाशित : फाल्गुन २५, २०७७ १५:१२
प्रतिक्रिया
पठाउनुहोस्

चितवन निकुञ्जमा गैंडा र बाघ मृत फेला 

नारायण शर्मा

नवलपरासी — चितवन राष्ट्रिय निकुञ्जमा गैंडा र बाघ मृत अवस्थामा फेला परेका छन् । निकुञ्जको छुट्टाछुट्टै स्थानमा भाले गैंडा र लिंग पहिचान हुन नसकेको बाघ मृत अवस्थामा फेला परेको सूचना अधिकारी लोकेन्द्र अधिकारीले बताए । 

निकुञ्जको पश्चिम सेक्टर अन्तर्गत अमलटारी नजिक नारायणी नदीको कलकत्ता टापुमा अन्दाजी ३० वर्षको भाले गैंडा मृत अवस्थामा फेला परेको निकुञ्जले जनाएको छ । उक्त गैंडा जुधेर मृत्यु भएको अधिकारीले बताए ।

योसँगै एक वर्षको अवधिमा निकुञ्जमा २६ वटा गैंडाको मृत्यु भएको छ । तीमध्ये २२ वटा प्राकृतिक र ४ वटा चोरी सिकारीको कारण मृत्यु भएको अधिकारीले जानकारी दिए ।

त्यस्तै, निकुञ्जको सौराहा सेक्टरमा पर्ने चपरचुली खहरे खोला क्षेत्रमा अन्दाजी ४ वर्षको लिंग पहिचान हुन नसकेको पाटे बाघ मृत अवस्थामा फेला परेको छ । बाघको प्राकृतिक कारण मृत्यु भएको हुन सक्ने अधिकारीले बताए ।

प्रकाशित : फाल्गुन २५, २०७७ १४:१९
पूरा पढ्नुहोस्
प्रतिक्रिया
पठाउनुहोस्
×