तरकारीमा रोकिएन विषादी- प्रदेश १ - कान्तिपुर समाचार

तरकारीमा रोकिएन विषादी

कान्तिपुर संवाददाता

धनकुटा — तरकारी बालीमा मानव स्वास्थ्यका लागि अत्यन्त घातक हुने विषादी प्रयोग गर्ने गरे पनि त्यसको नियन्त्रणका लागि विनियोजित लाखौं बजेट औपचारिक गोष्ठीमै सकिने गरेको छ । तरकारी खेतीका लागि अग्रणी धनकुटामा अघिल्ला वर्षहरूमा देखिएको समस्या न्यूनीकरण नभएको उपभोक्ताको गुनासो छ ।

तरकारी किसानले कीटनाशक र रोगनाशक गरी दुई प्रकारका विषादी प्रयोग गर्दै आएका छन् । तर विषादीको प्रयोग घटाउन र भरसक प्रयोग नै नगर्न उल्लेख्य बजेट रहे पनि अत्यधिक मात्रामा विषादी प्रयोग गरिँदा मानव स्वास्थ्यमा समस्या देखापर्न थालेको छ । विषादी प्रयोग नगर्न कृषि समूहमार्फत किसानलाई सचेतनामूलक गोष्ठीलगायत औपचारिकतामा सीमित हुने गरेको छ । संघीय, प्रदेश तथा स्थानीय पालिकामार्फत विषादी न्यूनीकरणका लागि विनियोजित लाखौं बजेट प्रभावहीन देखिएको छ ।

किसानले कीटनाशक विषादीका रूपमा साइफरमेसिन, क्लोरोफाइडिप्स, थायडिन, डाजागाड, किङस्टारलगायत विषादी प्रयोग गर्दै आएको धनकुटा नगरपालिका कृषि सेवा प्रमुख भक्तमान राईले बताए । रोगनाशक विषादीका नाममा उनीहरूले डाइमिटाफर्मा, डाइटानेम ४५ क्लिरोसिल, क्लोरियमलगायत विषादी प्रयोग गर्दै आएका छन् । ती विषादी तरकारी बालीमा प्रयोग नगर्न र प्रयोग घटाउन भनिए पनि अझ अत्यधिक मात्रामा प्रयोग गरिँदा उपभोक्ताको स्वास्थ्यमा असर पुग्ने गरेको छ ।

टमाटर, खुर्सानीलगायत बालीमा त्यस्ता विषादीको मात्र अधिक प्रयोग गरिने राईको भनाइ छ । नगरपालिकाले विषादी न्यूनीकरण तथा प्रांगारिक खेतीबारे बजेट विनियोजन हुने भए पनि त्यसबारे आफूलाई जानकारी नगराइने उनको गुनासो छ । ‘कर्मचारी र गैरकृषि प्राविधिकको मिलेमतोमा बजेट सकिने गरेको छ,’ उनले भने, ‘आफूहरू सम्बन्धित भए पनि असम्बन्धित व्यक्तिले औपचारिकतामा बजेट खर्चिने गरेको छ ।’

यता कृषि ज्ञान केन्द्र धनकुटामा यस वर्ष विषादी घटाउन र त्यसको विकल्पमा प्रांगारिक खेती गर्न किसानका लागि १ करोड ७० लाख बजेट विनियोजन भएको छ । उक्त बजेट कृषक सहकारी, समूह र व्यक्तिगत फर्मका प्रतिनिधिलाई प्रांगारिक खेतीका लागि अनुदान दिन लगानी गरिने ज्ञान केन्द्रका प्रमुख पूर्णमाया लिम्बूले बताए ।

प्रत्येक वर्ष विषादी न्यूनीकरणका लागि कृषि ज्ञान केन्द्र तथा पालिकास्तरीय कृषि केन्द्रमा बजेट विनियोजन हुने गरेको छ । प्रायः बजेट औपचारिक कार्यक्रममा सीमित हुने गरेको छ । जसका कारण उद्देश्यअनुसारको उपलब्धि हात परेको छैन । भकारो सुधार, थोपा सिँचाइ, प्लास्टिक घरलगायतका लागि बजेट विनियोजन गरिएको ज्ञान केन्द्र प्रमुख लिम्बूले बताइन् । ‘विषादी प्रयोग न्यूनीकरण जरुरी छ,’ उनले भनिन्, ‘किसानलाई बर्सेनि सचेतनाका कार्यक्रम गरिए पनि ठोस प्रभावकारी हुन सकेको छैन ।’

प्रकाशित : फाल्गुन १६, २०७७ ०९:५९
प्रतिक्रिया
पठाउनुहोस्

तीन दर्जन पुल शिलान्यास र उद्घाटन गर्न प्रधानमन्त्री ओली आइतबार झापा आउँदै

अर्जुन राजवंशी

बिर्तामोड — प्रधानमन्त्री केपी शर्मा ओली आइतबार झापा आउँदै छन् । आफ्नो निर्वाचन क्षेत्र झापा–५ का ३६ वटा योजनाको शिलान्यास र उद्घाटनका लागि ओली गृहजिल्ला आउन लागेका हुन् ।

तस्बिर : हेमन्त श्रेष्ठ/कान्तिपुर

प्रधानमन्त्रीका सचिवालय सदस्य होमबहादुर थापाका अनुसार प्रधानमन्त्री ओली बिहान ११ बजे भद्रपुर विमानस्थलबाट सिधै कमल गाउँपालिकाको तोपगाछी पुग्नेछन् । त्यहाँ ११:४५ बजे कमल खोलामा पुलको उद्घाटन गर्नेछन् । दोस्रो कार्यक्रम १२:४५ बजे दमक नगरपालिका १० बाट मोरङको आमबारी जोड्ने मावा–बेतनी खोलाको पुलको उद्घाटन गर्नेछन् । दिउसो १:१५ बजे दमक १० को सेतुमारीबाट गौरादह नगरपालिका जोड्ने रतुवा नदीमा निर्माण भएको पुलको उद्घाटन गर्ने कार्यक्रम छ ।

त्यस्तै दिउँसो साढे १ बजे कमल गाउँपालिका–७ झर्काहामा ‘चीन–नेपालमैत्री औद्योगिक पार्क’ को शिलान्यास गर्ने कार्यक्रम रहेको थापाले बताए । उनका अनुसार त्यसपछि दमक नगरपालिका–१ बाट इलामको चुलाचुली जोड्ने रतुवा नदीमा निर्माण सम्पन्न भएको पुल उद्घाटन गर्ने कार्यक्रम छ । त्यस्तै मदन भण्डारी मार्गको धरान–बाहुनडाँगी सडकखण्डमा पर्ने ३१ वटा खोलामा पर्ने पुलहरूको एकै स्थानबाट सामूहिक शिलान्यास गर्ने कार्यक्रम छ । प्रधानमन्त्री ओली साँझ साढे ५ बजे भद्रपुर विमानस्थलबाट काठमाडौं फर्किने थापाले जानकारी दिए ।

प्रकाशित : फाल्गुन १६, २०७७ ०९:०२
पूरा पढ्नुहोस्
प्रतिक्रिया
पठाउनुहोस्
×