हत्याको घटनामा फर्जी फाइल खडा गरेपछि उर्लाबारीमा प्रहरी कार्यालय घेराउ- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

हत्याको घटनामा फर्जी फाइल खडा गरेपछि उर्लाबारीमा प्रहरी कार्यालय घेराउ

देवनारायण साह

मोरङ — हत्याको घटनामा सत्यतथ्य लुकाएर दोषीलाई उन्मुक्ति दिन खोजेको भन्दै मृतकका परिवार र आफन्तले सोमबार इलाका प्रहरी कार्यालय उर्लाबारी घेराउ गरी नाराबाजी गरेका छन् । सोही कारण उर्लाबारीको अवस्था तनावग्रस्त बनेको छ । 

परिवारजनले हत्याको घटनामा सत्यतथ्य लुकाएर तथ्यहीन फाइल खडा गर्ने प्रहरी निरीक्षक उद्धव पोखरेललाई छानबिन गरी कारबाहीको दायरामा ल्याउनु पर्ने र घटनाको छानबिन गरी दोषीलाई कारबाहीका लागि जिल्ला अदालत मोरङमा मुद्दा दर्ता गर्नुपर्ने माग राखेका छन् ।

उर्लाबारी-५ का ३१ वर्षीय प्रविण बाँस्तोलाको शव पुस ५ गते स्थानीय गोदाबरी अस्पतालमा परिवारजनले फेला पारेका थिए । मृतकका काका युवराज बाँस्तोलका अनुसार उर्लाबारी-४ स्थित रमेश गिरीको घरमा डेरा गरी बस्दै आएका मेहरमान दर्जीले प्रविणलाई पुस ४ गते फोन गरेर बोलाएका थिए । ‘दर्जी, दिपेश पौडेल, राजेश रणपहेलीसँगै प्रविणले उर्लाबारीको पूर्वपट्टीको बस स्ट्यान्ड नजिकको सौरभी होटलमा मद्यपान गरेर सबैजना सँगै दर्जीको डेरामा गएका थिए,’ युवराजले भने, ‘पुस ५ गते बिहान ११ बजे प्रविणको मृत्यु भएको फोन आयो ।’

गत वर्षको होलीमा दर्जीसँग प्रविणको भएको झगडाको रिसइबीका कारण योजनावद्ध ढंगले हत्या गरेको युवराजको दाबी छ । उनले अस्पताल स्रोतले पुस ४ गते राति ११ बजे नै प्रविणको मृत्यु भएको जानकारी दिएको सुनाए ।

‘प्रविणलाई अस्पतालसम्म कसले ल्याएको, कसरी मृत्यु भएको र कसले मारेको अहिलेसम्म हामीलाई केही जानकारी छैन,’ उनले भने, ‘सुरुमा प्रहरीले अनुसन्धान भइरहेको भन्दै घट्ना भएको केही दिन जाहेरी पनि लिन मानेनन् तर दबाब दिएपछि पुस २२ गते उनीहरुविरुद्ध किटानी जाहेरी दर्ता गराउन सफल भयौं ।’ प्रहरीले घटनाको भोलिपल्ट नै पक्राउ गरेका दर्जी, पौडेल र रणपहेलीलाई छाडिदिएकाले आफूहरु सशंकित भएको मृतकका काका युवराजले बताए । ‘प्रहरी निरीक्षक पोखरेललाई पटक पटक अनुसन्धान कहाँसम्म पुग्यो र अदालतमा मुद्दा कहिले दर्ता हुन्छ भनी सोधखोज गर्दै आएका थियौं,’ उनले भने, ‘कर्तव्य ज्यान मुद्दाका लागि प्रमाण नपुगेकाले पटकपटक सरकारी वकिलको कार्यालयबाट फाइल फिर्ता आएको भन्दै आउनु भएको थियो,’ उनले भने ।

प्रहरीको भूमिकाप्रति शंका लागेपछि फागुन ९ गते आइतबार अहिलेसम्म के-के अनुसन्धान भयो भनेर प्रहरी कार्यालय घेराउ गरी नाराबाजी गर्दै फाइल देखाउन दबाब दिएको युवराजले बताए । ‘प्रहरी निरीक्षक पोखरेलले देखाएको फायलमा त मृतकको फोटोसमेत अर्कै राखेर फर्जी फाइल खडा गरेको पायौं,’ उनले भने, ‘कहिले पनि चाँदीको सिक्री प्रविणले लगाएको थिएन तर फाइलमा सिक्री लगाएको अर्कैको तस्बिर राखिएको लगायत तथ्यबाट प्रहरीले गलत अनुसन्धान गरेको पाएपछि विरोध गर्यौं ।’

आफूहरु विरोधमा उत्रिएपछि प्रहरी निरीक्षक उद्धव पोखरेल एक घण्टाका लागि इलाका प्रहरी कार्यालयबाट गायब भएर तत्काल अर्को फाइल खडा गर्न लगाएको पीडित परिवारको दाबी छ । आइतबारदेखि नै प्रहरी निरीक्षक पोखरेललाई छानबिन गरी कारबाही गर्नुपर्ने र प्रविणको मृत्यु भए पनि न्याय मर्न नदिन आन्दोलनमा उत्रिन आफूहरु बाध्य भएको बाँस्तोलाले बताइन् ।

जिल्ला प्रहरीद्वारा डिएसपी राईको नेतृत्वमा छानबिन टोली गठन

यसैबीच, जिल्ला प्रहरी मोरङले प्रहरी नायब उपरीक्षक मानबहादुर राईको संयोजकत्वमा तीन सदस्यीय छानबिन समिति गठन गरेको छ । समितिमा प्रहरी नायब उपरीक्षक राईको नेतृत्वमा प्रहरी सहायक निरीक्षक दिवस कुँवर र प्रहरी हवल्दार रमेश थापा छन् । ‘आइतबार नै प्रहरी नायब उपरीक्षक राईको नेतृत्वको छानबिन समितिले अनुसन्धान सुरु गरेको छ,’ प्रहरी नायब उपरीक्षक लोकदर्शन थापाले भने, ‘मृतक प्रविणको घटना सम्बन्धमा अनुसन्धान कार्यमा घटनाका तथ्यहरुमा तात्विक फरक पर्ने गरी प्रमाण संकलन गरेको र कसुरदारलाई उन्मुक्ति दिने गरी गैरव्यवसायिक अनुसन्धान कार्य गरेको पाइएमा सम्बन्धित अनुसन्धानमा खटिएका प्रहरी कर्मचारीहरुलाई कानुन बमोजिम कारबाही गर्छौं ।’

मृतकका बुबा प्रेमप्रसाद बाँस्तोलाले रणपहेली, दर्जी र पौडेलविरुद्ध किटानी जाहेरी पुस २२ गते प्राप्त भएपछि तीनै जनालाई नियन्त्रणमा लिई छानबिन गरेको थापाले बताए । तत्काल शव परीक्षण प्रतिवेदन तथा फरेन्सिक परीक्षण प्रतिवेदन उपलब्ध नभएकाले प्रतिवादीहरुलाई कानुन बमोजिम २५ दिन थुनामा राखी अनुसन्धान गर्ने अवधि समेत पुरा भएको हुँदा जिल्ला सरकारी वकिल कार्यालय मोरङको निर्देशन अनुसार माघ २ गते जिम्मा जमानीमा उपस्थित हुने गरी उनीहरुलाई छाडिएको उनले सुनाए ।

प्रकाशित : फाल्गुन १०, २०७७ १४:५६
प्रतिक्रिया
पठाउनुहोस्

बीपी प्रतिष्ठानका उपकुलपति र शिक्षाध्यक्षको कक्षमा लागेको ताला खुल्यो

प्रदीप मेन्याङ्बो

सुनसरी — धरानस्थित बीपी कोइराला स्वास्थ्य विज्ञान प्रतिष्ठानको उपकुलपति र शिक्षाध्यक्षको कार्यकक्षमा लागेको ताला खोलिएपछि सोमबारदेखि नियमित काम कारबाही कार्यकक्षबाटै सुरु भएको छ ।

चिकित्सा तथा दन्तचिकित्सा शिक्षण कल्याण समाजले तीन वर्षदेखि रोकिएको बढुवा प्रक्रिया र कोरोना जोखिम भत्ता प्रति बेवास्ता गरेको भन्दै उपकुलपति प्रा.डा ज्ञानेन्द्र गिरीको कार्यकक्षमा एकसाताअघि र शिक्षाध्यक्ष प्रा.डा. गुरूप्रसाद खनालको कार्यकक्षमा दुइसाता अघि तालाबन्दी गरेको थियो ।

आइतबार दिनभर चिकित्सा समाज र प्रतिष्ठानका उपकुलपति, शिक्षाध्यक्ष, रजिष्ट्रार प्रा.डा. मोहनचन्द्र रेग्मी र अस्पताल निर्देशक प्रा.डा. गौरी शंकर साहबीचको वार्तामा सहमति भएपछि ताला खोलिएको हो ।

फ्याक्ल्टीहरुको बढुवा सम्बन्धमा एक महिनाभित्र बढुवाको विज्ञापन प्रकाशित गर्ने, कोरोना जोखिम भत्ता फागुन १४ गतेभित्र वितरण सुरु गर्ने र अन्य मागहरुका सम्बन्धमा एक हप्ताभित्र तार्किक निष्कर्षमा पुग्ने सहमति भएपछि तालाबन्दी खुलेको समाजका महासचिव डा. सूर्यप्रसाद रिमालले बताए ।

प्रतिष्ठानको हितमा आन्दोलित समाजको माग फेरिपनि बेवास्ता गरे २ सय ७० जना चिकित्सकले सामूहिक राजीनामा दिने चेतावनी समेत दिएपछि वार्तामा सहमती भएको र हाललाई आन्दोलनका सम्पूर्ण कार्यक्रमहरु फिर्ता गरिएको समाजका अध्यक्ष डा.विष्णु पोखरेलले बताए । उनले अन्य मागहरू एक सातामा पूरा गर्ने सहमति भएपछि काम गर्नका लागि ऊर्जा मिलेको बताए ।

सहमति पत्रमा प्रतिष्ठानका चारैजना पदाधिकारीहरु उपकूलपति प्राडा गिरी, शिक्षाध्यक्ष प्राडा खनाल, अस्पताल निर्देशक प्राडा साह र रजिष्ट्रार प्राडा रेग्मीले हस्ताक्षर गरेका छन् । समाजकातर्फबाट अध्यक्षसहित महासचिव डा. रिमाल, सहसचिव डा. सन्दिप साह, कोषाध्यक्ष डा. अन्जनिकुमार यादव, सदस्य डा. मनोज भट्टराई, डा. निर्मलप्रसाद साह र डा. लक्ष्मण खनालले हस्ताक्षर गरेका छन् ।

प्रकाशित : फाल्गुन १०, २०७७ १४:५५
पूरा पढ्नुहोस्
प्रतिक्रिया
पठाउनुहोस्
×