प्रतिनिधिसभा पुनःस्थापना नभए संसदीय व्यवस्था समाप्त हुन्छ : सिटौला- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

प्रतिनिधिसभा पुनःस्थापना नभए संसदीय व्यवस्था समाप्त हुन्छ : सिटौला

अर्जुन राजवंशी

बिर्तामोड — नेपाली कांग्रेसका नेता कृष्णप्रसाद सिटौलाले प्रतिनिधिसभा पुनःस्थापना हुन नसके मुलुकबाट संसदीय व्यवस्था नै समाप्त भएर जाने बताएका छन् । 


उनले संसदीय व्यवस्था कायम राख्न सर्वोच्चले प्रधानमन्त्री केपी ओलीको असंवैधानिक निर्णयविरुद्ध फैसला गर्नुको विकल्प नभएको तर्क गरे । प्रधानमन्त्री ओलीले प्रतिनिधिसभा विघटन गरेसँगै संसदीय व्यवस्था संकटमा परेको उनको भनाइ छ । उनले प्रतिनिधिसभा पुनःस्थापना गरेर मुलुकलाई दुर्घटनाबाट जोगाउन अदालत समक्ष आग्रह गरे । शनिबार झापाको बिर्तामोडमा पुराना कांग्रेस नेता सीके प्रसाईको २७ औं स्मृति दिवसका अवसरमा आयोजित कार्यक्रमलाई सम्बोधन गर्दै नेता सिटौलाले संविधानसभाबाट निर्मित संविधान कार्यान्वयन नभए मुलुकमा कुन संविधान कार्यान्वयन हुन्छ ? भनेर अदालतलाई प्रश्न समेत गरे ।

‘जननिर्वाचित प्रतिनिधिहरुको ऐतिहासिक संविधानसभाले अहिलेको संविधान बनाएको हो । यो संविधान कार्यान्वयन हुँदैन भने यो मुलुकमा अब कुन संविधान मान्य हुन्छ ?,’ उनले भने,‘प्रधानमन्त्रीको असंवैधानिक निर्णयसामू सर्वोच्चले खुट्टा टेक्न सक्नुपर्छ । अन्यथा ओलीको निर्णयले मुलुकलाई द्वन्द्वतर्फ धकेल्छ ।’ पार्टी सभापति शेरबहादुर देउवातर्फ इंगित गर्दै नेता सिटौलाले प्रतिनिधिसभा विघटनविरुद्ध कांग्रेसले सशक्त रुपमा बोल्नुपर्ने जिकिर गरेका छन् । सत्ताको नजिक हुन पार्टीका शीर्ष नेताले अहिलेको अवस्थामा बोल्न डराउनु बिडम्बना हुने उनको भनाइ छ ।

‘अदालतमा विचाराधिन छ भनेर प्रतिनिधिसभा विघटनबारे बोल्नबाट शीर्ष नेता भाग्न मिल्दैन,’ उनले भने,‘यो जग्गा किचलो विषय होइन । मुलुकको संविधान रक्षा गर्ने विषय हो । त्यसैले कांग्रेसजस्तो जिम्मेवार पार्टी र त्यसका शीर्ष नेताहरुले नबोले कस्ले बोल्ने ?’

नेता सिटौलाले प्रधानमन्त्री ओलीलाई प्रतिनिधिसभा विघटन गर्ने विशेषाधिकार छ भन्ने तर्क गलत भएको बताए । उनले भने,‘विगतका संविधानमा राजा–महाराजाका लागि विशेषाधिकारको व्यवस्था थियो । तर, २०७२ को संविधानमा त्यस्तो कुनै व्यवस्था गरिएको छैन । अदालत संविधानको रक्षा गर्ने निकाय हो । प्रधानमन्त्री ओलीको कदमले संविधानको मान्यतालाई समाप्त गरेको छ । त्यसलाई उल्ट्याउनुको विकल्प अदालतसँग छैन ।’

प्रकाशित : फाल्गुन ८, २०७७ १७:०२
प्रतिक्रिया
पठाउनुहोस्

सभामुख सरकारका झगडिया र किर्ते, उपराष्ट्रपति चुनावतिर आउनुस् : प्रधानमन्त्री ओली

कान्तिपुर संवाददाता

काठमाडौँ — प्रधानमन्त्री केपी शर्मा ओलीले सभामुख र उपराष्ट्रपतिको आलोचना गरेका छन् । उपराष्ट्रपति नन्दबहादुर पुनले सरकारको आलोचना गरेको र सभामुख अग्निप्रसाद सापकोटाले किर्ते गरेको तथा सरकारविरुद्ध मुद्दा हालेको भनेर प्रधानमन्त्रीले आलोचना गरेका हुन् । 

ओली समूहले शनिबार विराटनगरमा आयोजना गरेको सभामा प्रधानमन्त्रीले सभामुख बनाइएको व्यक्ति सरकारको विरुद्धमा मुद्दा हाल्दै हिँडेको र किर्ते काममा लागेको आरोप लगाएका हुन् । 'सभामुख बनाइएको थियो एकजनालाई । सरकारविरुद्ध मुद्दा हाल्न जानुभएको छ । सरकारविरुद्ध झगडिया हो सभामुख । सुहाउँछ ? सभामुख झगडिया हुन जानुभएको छ,' प्रधानमन्त्रीको भनाइ थियो ।

संवैधानिक परिषद्‍बाट भएका विभिन्न संवैधानिक निकायमा भएका नियुक्तिविरुद्ध परिषद् सदस्यसमेत रहेका सभामुख सापकोटाले सर्वोच्च अदालतमा रिट निवेदन दर्ता गराएका थिए । सोही कुरालाई लिएर प्रधानमन्त्री ओलीले आलोचना गरेका हुन् ।

त्यस्तै, सभामुख सापकोटाल किर्ते गरेको पनि ओलीले आरोप लगाएका छन् । उनले भने, 'उहाँले किर्ते गर्नुभएको छ । भन्न पनि लाज लाग्ने कुरा । सभामुखजस्तो पदको मान्छेले किर्ते सनाखत गर्छ । साढे ३ बजे दर्ता गर्न लगेको कुरालाई १०:४० बजे ल्याएको भनेर किर्ते सनाखत गर्नुजस्तो लज्जास्पद कुरा के हुन्छ ?,' उनले भने ।

प्रधानमन्त्रीविरुद्ध नेकपाका सांसदहरूले ल्याएको अविश्वासको प्रस्तावको समयलाई लिएर विवाद उत्पन्न भएको थियो । सोही विषयमा प्रधानमन्त्रीले सभामुखको आलोचना गर्दै किर्ते गरेको भनेका हुन् ।

उपराष्ट्रपतिलाई सरकारविरुद्ध भाषण गर्दै हिँड्नुभन्दा निर्वाचनमा आउन ओलीले चुनौती दिएका छन् । उपराष्ट्रपति पुनले पत्रकार महासंघको महाधिवेशनको उद्घाटन गर्दै प्रतिनिधिसभा विघटनको विरोध गरेका थिए । उक्त भनाइतर्फ इंगित गर्दै ओलीले भने, 'उपराष्ट्रपति सरकारविरुद्ध भाषण गर्दै हिँड्नुभएको छ । उहाँको पदले भाषण गरेर हिँड्ने, सरकारको विरोध गरेर हिँड्ने होइन । संविधान मिचियो, प्रजातन्त्र मासियो आदि कुराहरू, प्रतिनधिसभा विघटन गरेर बेठिक भयो चुनाव, गर्न पाइँदैन भन्ने होइन ।'

उपराष्ट्रपतिको पदबारे उल्लेख गर्दै प्रधानमन्त्री ओलीले थपे, 'उहाँ त चुनाव नगर्ने नै पृष्ठभूमिबाट आउनुभएको हो । अब त कमसेकम चुनावतिर आउनुस् ।'

प्रकाशित : फाल्गुन ८, २०७७ १६:४५
पूरा पढ्नुहोस्
प्रतिक्रिया
पठाउनुहोस्
×