हात्ती आक्रमणबाट सुनसरीमा एक जनाको मृत्यु
सुनसरी — सुनसरीस्थित कोसीटप्पु वन्यजन्तु आरक्षबाट निस्केको जंगली हात्तीको आक्रमणबाट सोमबार बिहान कोसी गाउँपालिकामा एक जनाको मृत्यु भएको छ ।
आरक्षका वार्डेन रामदेव चौधरीका अनुसार आरक्षमा बस्दै आएको मकुना हात्तीको आक्रमणबाट वडा नं ७ श्रीपुरका २७ वर्षीय प्रमोद यादवको मृत्यु भएको हो ।
हरिपुरस्थित गहुँ खेतमा पानी पटाउँदै गरेका यादवलाई बिहान ६ बजे हात्तीले आक्रमण गरेको थियो । बिहान बाक्लो हुस्सु लागेकाले हात्ती नजिकै आउँदा पनि यादवले देख्न नसकेको हुन सक्ने जनाउँदै उनको घटनास्थलमै मृत्यु भएको चौधरीले बताए ।
आरक्षमा करिब एक दशकदेखि उक्त हात्ती एक्लै हिँड्ने गरेको छ । यसले तीन वर्षयता ९ जनाको ज्यान लिइसकेको छ । २३ जना घाइते भएका छन् ।
यादवको शव पोस्टमार्टमका लागि इनरुवा अस्पताल लगिएको छ । मृतकका परिवारलाई आरक्षले १० लाख रुपैयाँ क्षतिपूर्ति दिने वार्डेन चौधरीले बताए ।
