सुनसरी–मोरङ औद्योगिक क्षेत्रका उद्योगको उत्पादन घट्यो- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

सुनसरी–मोरङ औद्योगिक क्षेत्रका उद्योगको उत्पादन घट्यो

विनोद भण्डारी

विराटनगर — लकडाउन हटेको तीन महिना बित्दा पनि सुनसरी मोरङ–औद्योगिक करिडोरका उद्योगले उत्पादन बढाउन सकेका छैनन् । माग नै नआएको भन्दै उद्योगहरूले क्षमताको ४० प्रतिशत मात्र उत्पादन गर्दै आएका छन् ।

आरती स्ट्रिप्स उद्योगले जस्तापाता वार्षिक १ लाख १० हजार टन, रंगीन पाता वार्षिक ६० हजार टन र कालोपाइप वार्षिक ५० हजार टन उत्पादन गर्थ्यो । अहिले तीनवटै उत्पादन बढीमा ४० प्रतिशत मात्र भएको उद्योगका प्रशासन प्रमुख दिवस नेपालले बताए ।

उद्योगले सामान्य अवस्थामा फलामे पाइप दैनिक ६ हजार ५ सय टन उत्पादन गर्दै आएको थियो । नेपालले भने, ‘त्यसको उत्पादन अहिले ठप्प गरेर पुरानो उत्पादन बिक्री गर्दै छ । बजारमा माग नै छैन । माग भएर बजार पुगेका सामानको पनि रकम फिर्ता आउँदैन ।’

सामान्य अवस्थामा दैनिक ७५ टन धागो उत्पादन गर्दै आएको सुनसरी, खनारको रिलायन्स स्पिनिङ उद्योगको पनि उत्पादन आधा घटेको छ । कोरोनाका कारण आवश्यकताअनुसार मजदुरसमेत पाइँदैनन् । अहिले करिडोरका खाद्यान्न, मास्क र सेनिटाइजर उद्योगले मात्र पूर्ण क्षमतामा सामान उत्पादन गर्दै आएको र अन्य उद्योगको उत्पादन ५० प्रतिशतभन्दा बढीले घटेको उद्योग संगठन मोरङका अध्यक्ष भीम घिमिरेको भनाइ छ । ‘खाद्यान्न, सेनिटाइजर र मास्कबाहेकका सामानको बजारमा माग नै छैन,’ उनले भने, ‘त्यसैले अन्य उद्योगका सञ्चालकले औद्योगिक कच्चा पदार्थ आयात र उत्पादन दुवै घटाए ।’

लकडाउन हटे पनि औद्योगिक क्षेत्रको अवस्था सुधार हुन नसकेको मोरङ व्यापार संघका अध्यक्ष प्रकाश मुन्दडाको बुझाइ छ । उनका अनुसार बजारमा उपभोग्य वस्तुको माग नै नहुँदा लगानी गर्ने वातावरण छैन । ‘अहिले माग र आपूर्तिबीचको सम्बन्ध नै बिग्रिएको छ,’ मुन्दडाले भने, ‘बजारमा सामानको माग नबढेसम्म उद्योगले उत्पादन बढाउने अवस्था नै छैन ।’

उद्योग पूर्ण क्षमतामा नचल्दा विराटनगर भन्सारको राजस्व असुली पनि प्रभावित भएको छ । औद्योगिक कच्चा पदार्थको आयात आधा घटेको छ । ‘यो भन्सारको राजस्व औद्योगिक कच्चा पदार्थ आयातमा निर्भर छ,’ भन्सार प्रमुख शिव भण्डारीले भने, ‘कच्चा पदार्थ आयात नै घटेपछि राजस्व असुली प्रभावित हुने नै भयो ।’

भन्सारले असोजमा ४ अर्ब ५९ करोड ५० लाख रुपैयाँ राजस्व असुली गर्ने लक्ष्य राखेकोमा ७० दशमलव २५ प्रतिशत अर्थात ३ अर्ब २२ करोड ८२ लाख मात्र असुली गरेको छ । सामान्य अवस्थामा यो भन्सारले दैनिक सरदर १५ करोड रुपैयाँ राजस्व संकलन गर्दै आएको थियो ।

प्रकाशित : कार्तिक २६, २०७७ १४:२७
प्रतिक्रिया
पठाउनुहोस्

सहिद मैदानमा बल्ने भो फ्लडलाइट

विनोद भण्डारी

विराटनगर — दुई वर्षदेखि चर्चामा रहेको सहिद मैदानमा फ्लडलाइट जडान गर्ने र विराटनगरमा पनि रात्रिकालीन खेलकुद प्रतियोगिताको आयोजना गर्ने खेलकुदकर्मीको सपनाले बल्ल मूर्त रूप लिएको छ । प्रदेश १ सरकारको ४ करोड २९ लाख रुपैयाँको लागतमा स्थायी फ्लडलाइट जडान कार्य सुरु भएको हो ।

सहिद मैदानको चार कुनामा चार एङकल नटबल्ट उठाएर त्यसमाथि ३० मिटर अग्लो माक्स जडान गरेर हजार वाटका १०८ वटा बत्ती जडान गरिने छ । त्यसका लागि निर्माण ठेक्का पाएको लामा–कार्कीबन्धु अमर जेभी कन्स्ट्रक्सनले जमिनमा पायल फाउन्डेसन गरेर जमिनमुनि १० मिटर गहिराइवाट चारवटा एङकर नटबल्ट उठाइसकेको छ ।

अब ती चारवटा एङकर नटबल्टमा समान ३० मिटर अग्लो माक्स जडान गरेर हजार वाटका १०८ वटा बत्ती जडान गर्नमात्र बाँकी छ । निर्माण कम्पनीका प्रमुख गणेश कार्कीले भने कात्तिकसम्म फ्लडलाइट जडान कार्य सकेर प्रदेश १ को सामाजिक विकास मन्त्रालयलाई हस्तान्तरण गर्ने तयारी छ । एङकर नटबल्टमा जडान गरिने माक्स कोलकाताबाट चाँडै आयात गर्ने तयारी भइरहेको उनले जानकारी गराए ।

तीन वर्षअघि विराट गोल्डकप आयोजक समितिले सहिद मैदानमा अस्थायी फ्लडलाइटको व्यवस्था गरेर रात्रिकालीन विराट गोल्डकप आयोजना गरेपछि विराटनगरका खेलकर्मीले सहिद मैदानमा स्थायी फ्लडलाइट जडान गरेर हरेक वर्ष रात्रिकालीन खेलकुद प्रतियोगिता गर्ने सपना देखेका थिए ।

विराट गोल्डकप ट्रस्टका अध्यक्ष सन्तोष वानियाँले भने, ‘यसपालिदेखि बल्ल हाम्रो सपना पुरा हुने भयो ।’ त्यही सपनाका कारण विराट गोल्डकपका दुई संस्करण आयोजना गर्न नपाइएको उनले बताए । अब विराट गोल्डकपका हरेक संस्करण रात्रिकालीन हुने अध्यक्ष बानियाँले सुनाए ।

प्रदेश सरकारको लगानीमा सहिद मैदानमा स्थायी फ्लडलाइट जडान गर्ने चर्चा दुई वर्षअघिदेखि चलेको हो । त्यसैअनुसार सरकारले साढे ४ करोड रुपैयाँ पनि विनियोजन गर्‍यो । त्यसमा ४ करोड २९ लाख लामा–कार्की बन्धु अमर जेभी कन्स्ट्रक्सनले ठेक्का पाएको थियो । तर निर्माण कम्पनीले टेण्डर भर्दा पेस गरेको ओपन फाउन्डेसन स्ट्रक्चरलाई प्राविधिक पक्षले स्वीकृति नदिँदा निर्माण कार्य ढिलाइ भएको सम्बद्ध पक्षको भनाइ छ ।

निर्माण कम्पनीले पहिला ओपन फाउण्डर स्ट्रक्चर पेस गरेर टेण्डर भर्दा त्यसलाई स्वीकृति दिएर ठेक्का पाएको थियो । तर पछि त्यसअनुरुप फ्लडलाइट जडान गर्दा भइरहेको भौतिक पूर्वाधारको निकै क्षति हुने प्राविधिक पक्षले निष्कर्ष निकाल्यो । त्यसपछि प्राविधिक पक्षले निर्माण भइसकेको पूर्वाधारको क्षति कम गर्न पायल फाउन्डेसनमा जाने निचोड निकाल्यो ।

निर्माण कम्पनीले फेरि पायल फाउन्डेसनअनुसार स्ट्रक्चर सामाजिक विकास मन्त्रालयमा पेस गरेको थियो । त्यसलाई स्ट्रक्चर, मेकानिकल र इलेक्ट्रिक इन्जिनियरले अन्तिम रूप दिन ढिलाइ गर्दा समय धकेलिएको हो ।

सामाजिक विकास मन्त्रालयका एक अधिकारीका अनुसार ठेकदार कम्पनीले पछिल्लो पटक पेस गरेको स्ट्रक्चरलाई स्ट्रक्चर, मेकानिकल र इलेक्ट्रिक इन्जिनियरले फाइनल गरेपछि निर्माण कार्यले गति लिएको हो । पायल फाउन्डेसनका आधारमा पनि सहिद मैदानमा फ्लडलाइट जडान गर्दा पनि मैदानको चार कुनामा प्यारापिट तोडफोड भएको छ ।

निर्माण कम्पनीका कार्कीले भने, ‘माक्स र बत्ती जडान सकिएपछि क्षतिग्रस्त प्यारापिटको मर्मत गरिने छ ।’ यसअघि सहिद मैदानमा प्रदेश सरकार र विराटनगर महानगरपालिकाको डेढ करोड खर्चमा मैदानको मर्मतसहित खेलाडी चेन्जिङ रूम निर्माण गरेर अघिल्लो वर्ष पाँचौं महिला साफ च्याम्पियनसिप फुटबल आयोजना गरेको थियो ।

प्रकाशित : आश्विन १४, २०७७ ०८:२५
पूरा पढ्नुहोस्
प्रतिक्रिया
पठाउनुहोस्
×