हेलिकप्टर नपुग्दा घाइते अझै गाउँमै- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

हेलिकप्टर नपुग्दा घाइते अझै गाउँमै

आनन्द गौतम

ताप्लेजुङ — बेलैमा हेलिकप्टर नपुग्दा जिल्लाको भारतीय सीमावर्ती याम्फुदिनका तीन जना घाइतेको उद्धारमा कठिनाइ भएको छ । बुधवार राति स्थानीय लाक्पा भोटेले ‘बाम्फोक’ प्रहार गर्दा घाइते भएका उनीहरू शुक्रबार बिहानसम्म पनि अचेत छन् ।

सिरिजंघा गाउँपालिकाका अध्यक्ष टीका गुरुङका अनुसार तीनै जनालाई वडाको स्वास्थ्य चौकीमा राखिएको छ । वडामा प्राथमिक उपचार मात्र भएकाले त्यहाँ थप उपचार सम्भव नभएको गाउँपालिकाले जनाएको छ ।

ताप्लेजुङका प्रहरी नायब उपरीक्षक महेन्द्र श्रेष्ठका अनुसार काठमाडौंबाट उडेको हेलिकप्टर बिहीबार सोलुखुम्बुमा आएर बसेको छ । मौसम खुल्नासाथ उडाउने तयारी भइरहेको छ । ‘यहाँ त मौसम खुलिरहेकै छ,’ वडाध्यक्ष लाक्पा भोटेले भने, ‘खै उतैबाट हेलिकप्टर आएन ।’

सिरिजंघा–८ याम्फुदिन तारतुमका पासाङ भोटे (वर्ष ३६), लाक्पाछिरिङ भोटे (वर्ष १८) र लाक्पा भोटे (२२ वर्ष) बेलुकी टिभी हेर्दै थिए । दाजुभाइका छोरा उनीहरू पासाङको घरमा थिए । सधैं १० बजे बत्ती जाने भएकाले त्यतिन्जेल टिभी हेरेर उनीहरू सुत्न गए ।

तीनै जना दोस्रो तलामा सुते । छोरीसहित फुपुछिरिङ र फुटिक मुनिको कोठामा सुते । राति १२ बजे माथिल्लो तलामा गड्याङगुडुङको आवाज आयो । ठूलीआमा फुटिक मोबाइलको उज्यालोमा तलामाथि पुग्दा दुई जना काटिएको अवस्थामा थिए । के भयो भनेर सोध्दा उनीमाथि पनि प्रहार भयो । फुपुछिरिङ पुगेपछि भने लाक्पा भागे । प्रहरी नायब उपरीक्षक श्रेष्ठका अनुसार उनलाई बिहीबार दिउँसो घरको खोल्मामा लुकेको अवस्थामा पक्राउ गरिएको छ । उनलाई शुक्रबार सदरमुकाम फुङलिङ लगिँदै छ ।

श्रेष्ठका अनुसार लाक्पाले दुई जनालाई निदाएको अवस्थामा प्रहार गरेजस्तो देखिन्छ तर कारण खुलिसकेको छैन । ‘उनीहरूले बेलुकी केही मादक पदार्थ सेवन गरेको भन्नेसम्म सुनेको छु,’ श्रेष्ठले भने । लाक्पा आफैं अपांग भएकाले निदाएपछि प्रहार गरेको हुन सक्ने प्रहरीले जनाएको छ ।

प्रकाशित : आश्विन ९, २०७७ ०९:१५
प्रतिक्रिया
पठाउनुहोस्

डच प्रशिक्षकमा डी बोएर

एजेन्सी

हेग — डच फुटबल संघले नेदरल्यान्ड्सको राष्ट्रिय फुटबल टिमको प्रशिक्षकमा बुधबार फ्रान्क डी बोएरलाई नियुक्त गरेको छ ।

उनी डच टिमका लागि सर्वाधिक क्याप जित्ने तेस्रो क्रमका खेलाडी हुन् । उनले रोनाल्ड कोम्यानको स्थान लिनेछन् । कोम्यानले सिजनको सुरुमा बार्सिलोना जान डच टिमको जिम्मेवारी छाडेका थिए ।

सघले भनेको छ, ‘तत्काल लागू हुने गरेर उनले राष्ट्रिय टिम सम्हाल्ने छन् र उनकै नेतृत्वमा नेदरल्यान्ड्सले सन् २०२२ को विश्वकप छनोट खेल्नेछ ।’

सन् १९९० देखि २००४ सम्म डच टिमका प्रमुख खेलाडी रहेको डी बोएरलाई बायाँ खुट्टाका विशेषज्ञ डिफेन्डर मानिन्छ । सन् २००७ बाट उनले प्रशिक्षक जीवन सुरु गरेका थिए र पहिलोपल्ट सहयोगी प्रशिक्षकका रूपमा अयाक्स टिम सम्हाले ।

उनको प्रशिक्षक खेलजीवन भने उतारचढावपूर्ण छ । सन् २०१६ मा उनी इन्टर मिलानका प्रशिक्षक भए, तर ८५ दिनपछि नै उनी बर्खास्तगीमा परे । सन् २०१७ मा डी बोएर इंग्लिस प्रिमियर लिग क्लब क्रिस्टल प्यालेसका प्रशिक्षक नियुक्त भए, तर उनी त्यहाँ १० सातापछि नै बर्खास्त भए । त्यतिबेला प्यालेसले लिगका सुरुआती चार खेल लगातार गुमाएको थियो ।

प्रकाशित : आश्विन ९, २०७७ ०९:०२
पूरा पढ्नुहोस्
प्रतिक्रिया
पठाउनुहोस्
×