लालीगुराँस नगरपालिकामा प्रक्रिया मिचेर राहतको चामल बिक्री- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

लालीगुराँस नगरपालिकामा प्रक्रिया मिचेर राहतको चामल बिक्री

चन्द्र कार्की

तेह्रथुम — लालीगुराँस नगरपालिकाले कानुनी प्रक्रिया मिचेर राहतको चामल बिक्री गरेको खुलेको छ । कोराना संक्रमणको सुरुवाती चरणमा खरिद गरिएको चामल नगरप्रमुख अर्जुन माबोहाङले न्यून मूल्यमा बेचेका हुन् ।


राहतको चामलमा अनियमितता भएको आरोप लगाउँदै स्थानीयले अख्तियार दुरुपयोग अनुसन्धान आयोगमा उजुरीसमेत दिएका छन् । थोरै मात्र वितरण गरी नगरपालिकाको गोदाममा थन्क्याइएको बाँकी चामल भदौ २१ गते सार्वजनिक सूचना नै ननिकाली सीमित व्यापारी र केही व्यक्तिलाई बेचिएको छ । प्रतिबोरा ५ सय रुपैयाँका दरले बेचिएको चामल एकै व्यक्तिले १५ देखि २० बोरासम्म लगेका छन् ।

नगरपालिकाले भने चामल गोदाममै बिग्रिन लागेकाले सस्तो मूल्यमा बिक्री गरिएको दाबी गरेको छ । नगरप्रमुख माबोहाङले नगरसभा बैठकले न्यूनतम मूल्य कायम गरी चामल बेच्ने निर्णय गरेको बताए । ‘विपत्को समयमा कानुनी प्रक्रिया अपनाउनेतर्फ ध्यान दिइएन,’ उनले भने । सार्वजनिक सूचना जारी गर्दा पनि सबैलाई वितरण गर्न चामल नपुग्ने भएकाले बजार क्षेत्रमा मात्र बिक्री गरिएको माबोहाङले बताए । यद्यपि उनले चामल बिग्रिन लागेकैले बेच्न हतारिनुको आधार र प्रमाण देखाउन सकेनन् ।

नगरप्रमुख माबोहाङले खरिद गरिएको १ हजार ५ सय बोरा चामलमध्ये बाँकी रहेको २ सय ६६ बोरा मात्र बेचिएको बताए पनि नगरबासीले भने एक हजारभन्दा बढी बोरा बेचिएको दाबी गरेका छन् । उक्त चामल संघीय सरकार, प्रदेश सरकार, नगर क्षेत्रका शिक्षक र कर्मचारीबाट रकम उठाई राहतका लागि खरिद गरिएको थियो ।

नेकपाको लालीगुराँस नगरकमिटीले विज्ञप्ति जारी गरी नगरप्रमुख माबोहाङले आर्थिक अनियमितता गरेको आरोप लगाएको छ । स्टोरमा दाखिला भएको चामल आर्थिक कार्यविधि ऐनअनुसार सार्वजनिक सूचना आह्वान गरी टेन्डरमार्फत बिक्री गर्नुपर्नेमा त्यसो नगरिएको नेकपा नगरकमिटी अध्यक्ष कलम खड्काले बताए ।

कार्यविधि ऐनमा कार्यालयप्रमुख वा निजले तोकेको अधिकारीको लिखित आदेशविना जिन्सी मालसामान लिलाम बिक्री वा हस्तान्तरण गर्न नहुने उल्लेख छ । तर नगरप्रमुख माबोहाङले प्रमुख प्रशासकीय अधिकृत अर्जुन निरौला बिदामा रहेको मौकामा चामल बेचेका छन् । बिदामा बसेको समयमा चामल बिक्री भएकाले आफू उक्त कार्यमा संलग्न नभएको प्रमुख प्रशासकीय अधिकृत निरौलाले बताए । ‘नियत असल भए पनि चामल बिक्री गर्ने विषयमा कानुनी प्रक्रिया भने नपुगेकै हो,’ उनले भने ।

नगरप्रमुख माबोहाङले राहतको चामल बिक्री गरी आर्थिक अनियमितता गरेकाले आफूहरू कानुनी उपचारमा जाने स्थानीय प्रकाश श्रेष्ठले बताए । यही विषयलाई लिएर स्थानीयले असोज १ गते अख्तियार दुरुपयोग अनुसन्धान आयोगमा उजुरीसमेत दर्ता गराइसकेका छन् ।

प्रकाशित : आश्विन ७, २०७७ १२:५४
प्रतिक्रिया
पठाउनुहोस्

छथर गाउँपालिकामा एकल पुरुषलाई सामाजिक सुरक्षा भत्ता 

चन्द्र कार्की

तेह्रथुम — छथर गाउँपालिकाले एकल पुरुषलाई सामाजिक सुरक्षा भत्ता दिन थालेको छ । गाउँपालिकाले एकल पुरुषको तथ्यांक संकलन गरी वार्षिक रुपमा एकमुष्ठ पाँच हजार रुपैयाँ सामाजिक सुरक्षा भत्ता दिन थालेको हो ।

एकल पुरुषलाई सामाजिक सुरक्षा भत्ता वितरण गर्न आर्थिक वर्ष २०७७/७८ को गाउँसभाबाट नीति तथा कार्यक्रममै बजेटको व्यवस्था गरिएको गाउँपालिका अध्यक्ष सन्तवीर लिम्बूले बताए । आर्थिक अवस्था कमजोर भएर एकल पुरुषले सामान्य उपचार सेवासमेत पाउन नसकेको र बिहान–बेलुका छाक टार्नसमेत मुस्किल भएकाले त्यस्ता एकल पुरुषको संख्या पहिचान गरी सामाजिक सुरक्षा भत्ता दिन थालिएको उपाध्यक्ष तारा ढकालले बताइन् । यो कार्यक्रमले एकल पुरुषलाई ठूलो राहत मिलेको उनको भनाइ छ । सन्तान नभएका एकल पुरुषका लागि यो कार्यक्रम थप प्रभाबकारी भएको गाउँपालिकाको भनाइ छ ।

आर्थिक रुपमा विपन्न भए पनि राज्यले दिने सामाजिक सुरक्षा भत्ता पाउन पुरुषको हकमा ७० वर्ष उमेर पुग्नुपर्छ । महिलाको हकमा भने श्रीमान्को मृत्युपछि राज्यले एकल महिला सामाजिक सुरक्षा भत्ता दिने गरेको छ । विपन्न तथा एकल पुरुषका लागि केन्द्र सरकारले कुनै पनि कार्यक्रम ल्याउन नसकिरहेको बेला आफूहरुले एकल पुरुषलाई राहत पुग्ने गरी नेपालमै पहिलो पटक यस्तो कार्यक्रम लागु गरेको अध्यक्ष लिम्बूले दाबी गरे ।

गाउँपालिकाले अघिल्ला वर्षमा ज्येष्ठ नागरिकलाई घरमै पुगेर स्वास्थ्य उपचार दिनुको साथै लौरो उपहार कार्यक्रमसमेत सञ्चालन गरेको थियो । विभिन्न प्रकारका दीर्घरोगीलाई ५ हजारदेखि २५ हजार रुपैयाँसम्म उपचारका लागि आर्थिक सहयोग दिइँदै आएको गाउँपालिकाले जनाएको छ । ‘विपन्न परिवारका लागि नि:शुल्क मिटर बक्स तथा जस्तापातालगायत विभिन्न कार्यक्रम गाउँपालिकाले सञ्चालन गर्दै आएको जनाएको छ । जटिल प्रकृतिका बिरामीहरुको घरमै पुगेर गाउँपालिका अध्यक्ष आफैले उद्धार गरी उपचारमा सहयोग पनि गर्दै आएका छन् ।

विवाहपछि कारणवश एकल भएका पुरुषलाई यस्तो भत्ता दिन थालिएको गाउँपालिकाले जनाएको छ । वुढ्यौली उमेरसम्म विवाह नगरी बसेका एकल पुरुषले पनि यो सुविधा पाउनेछन् । यस्ता एकल पुरुषको संख्या प्रत्येक वर्ष थपघट भइरहने भएकाले त्यसका लागि वडा कार्यालयमार्फत संख्या निक्र्यौैल गरिने अध्यक्ष लिम्बूले बताए । कार्यक्रम सुरु भएको पहिलो वर्ष वार्षिक ५ हजार रुपैयाँका दरले भत्ता वितरण थालिएको गाउँपालिकाले जनाएको छ । कार्यक्रम प्रभावकारी भए आगामी वर्षबाट भत्ताको रकम बढाएर मासिक रुपमै वितरण गपरने अध्यक्ष लिम्बूले जानकारी दिए ।

प्रकाशित : भाद्र २५, २०७७ १०:३२
पूरा पढ्नुहोस्
प्रतिक्रिया
पठाउनुहोस्
×