झापामा यस वर्ष ९ वटा बीओपी थपिँदै- प्रदेश १ - कान्तिपुर समाचार

झापामा यस वर्ष ९ वटा बीओपी थपिँदै

पर्वत पोर्तेल

भद्रपुर/झापा — सीमा सुरक्षामा खट्दै आएको सशस्त्र प्रहरीले यस वर्ष झापाका ९ वटा नाकामा बोर्डर आउट पोस्ट (बीओपी) थप्ने भएको छ । सशस्त्र प्रहरीको नम्बर २ हेडक्वार्टर झापाका सशस्त्र प्रहरी उपरीक्षक रमेशकुमार पाण्डेले सीमासुरक्षाका लागि थप निगरानी बढाउन बीओपी थप्न लागिएको जनाए ।

उनका अनुसार यस वर्ष पूर्वोत्तर झापाका तिरिङ, नकलबन्दा तथा दक्षिणतिरका सतीघट्टा, ज्यामिरगढी, भद्रपुरको मेची पुलआसपास, महेशपुर, पाठामारी, पन्थापाडा र गौरदाहको आँपगाछीमा बीओपी थपिनेछ । काँकडभिट्टाको सशस्त्र प्रहरी राजस्व गुल्मलाई यसै वर्ष बीओपीमा परिणत गरिसकिएको छ ।

यसअघि बाहुनडाँगी, पृथ्वीनगर, केचना, घेराबारी, भागडुब्बा, कुन्जीबारी, गौरीगन्ज र टाघनडुब्बामा बीओपी स्थापना भइसकेका छन् । एसपी पाण्डेले तीन वर्षभित्र झापाका ३७ नाकामा बीओपी स्थापना गर्ने सरकारको लक्ष्य रहेको जनाए ।

बीओपी स्थापनाका लागि कम्तीमा सात बिघा जमिन आवश्यक पर्ने भएकाले केही स्थानमा जमिन खोजी भइरहेको उनले बताए । ‘जमिन टुंगो लाग्नेबित्तिकै धमाधम पोस्ट राख्न थाल्नेछौं,’ उनले भने । बीओपी थपिएपछि खुला सीमाको फाइदा उठाएर हुने चोरी–तस्करी, हातहतियार, लागू पदार्थ ओसारपसार, मानव बेचबिखनजस्ता आपराधिक गतिविधि नियन्त्रण हुने पाण्डेले दाबी गरे ।

झापामा १ सय ४४ किलोमिटर खुला सीमाक्षेत्र छ । दक्षिणी भेगमा भारतको विहार र पूर्वी भेगमा पश्चिम बंगाल राज्यसँग साँधसीमा जोडिएको छ । खुला सीमाका कारण नेपाली सुरक्षाकर्मीलाई अपराध नियन्त्रण तथा तस्करी नियन्त्रणमा चुनौती हुँदै आएको थियो ।

कोरोना भाइरस रोकथाम तथा नियन्त्रणका लागि चैतयता झापाका विभिन्न नाकामा १ सय ३६ वटा अस्थायी पोस्ट खडा गरिएका थिए । अहिले धेरैजसो पोस्ट मर्ज भएका छन् । हाल ३९ नाकामा मात्रै अस्थायी पोस्ट छन् ।

प्रकाशित : भाद्र २९, २०७७ १०:५८
प्रतिक्रिया
पठाउनुहोस्

क्रिकेटमा भविष्य खोज्दै नेपाली बालबालिका

नारायण खड्का

सिड्नी — दिव्यांसा पाण्डे अभिभावकसँग शनिबार बिहानै खेलमैदानमा पुग्छिन् । तीन सातादेखि ७ वर्षीया उनको दिनचर्या करिब डेढ घण्टा अभ्यास गर्नमै बित्छ । ९ वर्षे प्रेरित जोशीको समेत दिनचर्या उस्तै छ । एकाबिहानै आधा घण्टा दूरीमा रहेको खेलमैदान पुग्ने र आफूले सकेजति अभ्यास गर्ने र खेलकौशल देखाउने उनीहरूको दैनिकी हो ।

दक्षिण अस्ट्रेलियाका करिब १ सय नेपाली बालबालिकाको दिनचर्या अहिले हरेक साता क्रिकेट अभ्यास गर्न र आफूले जानेको खेलकौशल देखाउनमा बित्ने गरेको छ । यहाँको क्रिकेट एसोसिएसनले जुटाइदिएको बहुसांस्कृतिक विश्वकपको तयारीलाई लागिपरेका उनीहरूमध्ये जम्मा २० जनाले छनोट हुन पाउनेछन् । जसका कारण उनीहरू आवश्यकभन्दा बढी नै ध्यानपूर्वक खेलिरहेका देखिन्छन् ।

यहाँस्थित साउथ अस्ट्रेलियन क्रिकेट एसोसिएसन (साका) ले हरेक वर्ष नेपाल, भारत, पाकिस्तान, मलेसिया, बंगलादेशलगायतका आधा दर्जन देशका बालबालिकालाई राज्यस्तरीय टिममा ल्याउने योजनासहित तीन वर्षदेखि यो कार्यक्रम आयोजना गर्दै आएको छ । यही अक्टोबरमा आयोजना हुन गइरहेको उक्त विश्वकपमा नेपालीले दुइटा टिम निर्माण गर्दैछ । यू–१० र यू–१२ । त्यसका लागि तीन सातादेखि निरन्तर अभ्यास चलिरहेको छ ।

नेपाली बालबालिकालाई यो अवसर दिलाउन यहाँस्थित नेपालीको क्रिकेट संघले ठूलै कसरत गरेको छ । अस्ट्रेलियन–नेप्लिज क्रिकेट एसोसिएसन (एन्का) का अध्यक्ष विजय जोशी यो प्रतियोगिता कला र जोस भएका बालबालिकाका लागि क्रिकेटमै भविष्य बनाउने पहिलो खुड्किलो भएको दाबी गर्छन् । ‘अस्ट्रेलियामा क्रिकेट खेललाई अत्यन्तै महत्त्व दिइन्छ र यो खेलमा उत्कृष्ट हुनसके भविष्यमा अन्य प्रतियोगितामा छनोट हुने अवसर प्राप्त हुन्छ ।’ जोशी आफैं सहभागी भएर विगत केही वर्षदेखि नेपाली क्रिकेटलाई अघि बढाउन लागिपरेको दाबी गर्छन् । लामो समयको मिहिनेतपछि पछिल्लो समयमा नेपाली क्रिकेटले समेत अस्ट्रेलियामा आफ्नो छाप दह्रो बनाउँदै लगेको उनको ठम्याइ छ ।

बालबालिकाको यो खेल प्रतियोगितालाई स्थानीयस्तरमा समेत ठूलो सहयोग प्राप्त छ । अस्ट्रेलियाको ठूलोमध्येको व्यापारिक संस्था ‘वुलवर्थ’ ले सहभागी सबै नेपाली बालबालिकालाई निःशुल्क टिसर्ट, टोपी, ब्याट र बल उपलब्ध गराइदिएको छ । ‘वुलवर्थ क्रिकेट ब्लास्ट’ नाम दिएर सुरु गरिएको यो कार्यक्रमअन्तर्गत बालबालिकालाई निःशुल्क तालिम, खेलपछि खाजा र साकाका अधिकारीले अनुगमन र निरीक्षण गर्ने गरेका छन् ।

हरेक शनिबार हुने यो अभ्यासबाट चार सातापछि टिम छनोट गरिने र छनोट भएकालाई तालिम दिएर प्रतियोगितामा सहभागी गराइने छ । साउथ अस्ट्रेलियन क्रिकेट एसोसिएसनकी अधिकारी जेसिका ब्राइसले बहुसांस्कृतिक देश भएकाले अन्य देशका प्रतिभालाई समेत अवसर दिने उद्देश्यले यो कार्यक्रम आयोजना गरिएको बताइन् । ‘अभिभावक जुन देशबाट आएका भए पनि प्रतिभा भएका बालबालिकालाई समान अवसर प्रदान गर्ने र सफल क्रिकेटरको खोजी गर्नु नै यो प्रतियोगिताको लक्ष्य हो,’ ब्राइसले कान्तिपुरसँग भनिन् ।

नेपाली बालबालिकाको हौसला बढाउनका लागि अस्ट्रेलियाली महिला टिमकी अलराउन्डर ताहिला म्याकग्रा र एडिलेड स्ट्राइकरका ओपनिङ ब्याट्सम्यान जेक वेदराल्ड शनिबार बिहानै अभ्यासस्थल पुगेका थिए । मैदानमा बालबालिकालाई क्रिकेट सिकाउँदै समय बिताएका उनीहरूले मिहिनेत र लगनशीलतासाथ खेल्न सुझाए । क्रिकेटर वेदराल्डले नेपाली समुदायबाट दुई जनासम्म बालबालिकालाई राज्यस्तरीय टिममा ल्याउन सके त्यो नै ठूलो हुने बताए । उनी यस किसिमका कार्यक्रमले बालबालिकालाई खेलमा अघि बढ्न प्रोत्साहन गर्ने बताउँछन् ।

प्रकाशित : भाद्र २९, २०७७ १०:५३
पूरा पढ्नुहोस्
प्रतिक्रिया
पठाउनुहोस्
×