बिरामीलाई स्ट्रेचर र ट्रयाक्टरको भर- प्रदेश १ - कान्तिपुर समाचार

बिरामीलाई स्ट्रेचर र ट्रयाक्टरको भर

पालिकाहरूले विभिन्न बहानामा एम्बुलेन्स खरिदमा ढिलाइ गर्दा बिरामीहरूले सास्ती भोग्नुपरेको छ
एलिसा श्रेष्ठ

भोजपुर — भोजपुरका साल्पासिलिछो गाउँपालिका, षडानन्द नगरपालिका र रामप्रसाद राई गाउँपालिकामा एम्बुलेन्स नहुँदा बिरामीले स्ट्रेचर र ट्रयाक्टरको भर पर्नुपरेको छ ।

पालिकाहरूले विभिन्न बहानामा एम्बुलेन्स खरिदमा ढिलाइ गर्दा बिरामीहरूले सास्ती भोग्नुपरेको हो ।

एम्बुलेन्स अभावले बिरामीलाई समयमै अस्पताल लैजान नसक्दा कतिपयको बाटैमा मृत्यु हुने गरेको छ । ‘सडक पुगे पनि ट्रयाक्टर मात्रै कुद्छन्, गाउँमा कोही बिरामी पर्‍यो भने मान्छे भेला पारेर स्ट्रेचरबाट लैजानुपर्छ,’ साल्पासिलिछो गाउँपालिका–४, खाटम्माका तारा राईले भनिन्, ‘न एम्बुलेन्स छ न त अस्पताल नै, यसरी कच्ची र अप्ठ्यारो बाटोबाट बिरामी लैजाँदा बिरामीको बाटैमा ज्यान पनि जाने गर्छ ।’ नजिकै अस्पताल पनि नहुँदा संखुवासभाको खाँदबारी जानुपर्ने बाध्यता रहेको उनले बताइन् ।

जिल्लाका अन्य पालिकाका विकट भेगमा पनि अवस्था उस्तै छ । गाउँगाउँमा सडक पुगे पनि अव्यवस्थित हुँदा एम्बुलेन्स सञ्चालन हुन सकेको छैन । त्यसैले दुर्गम भेगका स्थानीयलाई अझै स्ट्रेचरकै भरमा बिरामी अस्पतालसम्म पुर्‍याउनुपर्ने बाध्यता रहेको हतुवागढी गाउँपालिका–२, रानीबासका शम्भु राईले बताए ।

हतुवागढी, पौवादुङमा, टेम्केमैयुङ, आमचोक, अरुण गाउँपालिकाले मात्रै एम्बुलेन्स ल्याएका छन् । जिल्लाका दोभाने, तिम्मा, मानेभन्ज्याङ, सानोदुम्मा, ठूलोदुम्मा, जरायोटार, दुम्माना, हसनपुर, वासिङथर्पु, बासिखोरा, देवानटारलगायत क्षेत्रका सर्वसाधारणलाई अझै पनि उपचार गर्न घण्टौं हिँडेर अस्पताल पुग्नुपर्ने बाध्यता छ ।

जिल्ला अस्पतालका दुई एम्बुलेन्स बिग्रिएर थन्किएका छन् । अस्पतालमा एम्बुलेन्स नहुँदा सदरमुकामलगायत आसपासका क्षेत्रबाट इन्डियन वेल्फेयर र नेपाल रेडक्रस सोसाइटीबाट सञ्चालित एम्बुलेन्सले बिरामी ओसारपसार गर्ने गरेका छन् ।

कोभिड–१९ का कारण नयाँ एम्बुलेन्स खरिद प्रक्रिया रोकिएको र चाँडै प्रक्रिया अघि बढाउने साल्पासिलिछो गाउँपालिका अध्यक्ष महेश राईले बताए । ‘एम्बुलेन्सले सेवा दिन नसक्दा गाउँपालिकावासी सास्ती खेप्न बाध्य भएका छन्,’ उनले भने, ‘चालु आर्थिक वर्षभित्रै गाउँपालिकामा एम्बुलेन्स आइसक्छ ।’

प्रकाशित : भाद्र २२, २०७७ २१:११
प्रतिक्रिया
पठाउनुहोस्

कर्मचारी नियुक्तिमा प्रधानाध्यापकको मनोमानी, परीक्षा मर्यादित नभएको गुनासो

एलिसा श्रेष्ठ

भोजपुर — प्रधानाध्यापकले मनोमानी ढंगबाट अमर्यादित परीक्षा गराएर कर्मचारी नियुक्ति गरेको खुलेको छ । रामप्रसाद राई गाउँपालिका–५ मानेभञ्ज्याङस्थित स्थानीय बेहेरेश्वर माध्यमिक विद्यालयका प्रधानाध्यापक खगेश्वर पौडलले लेखापाल दरबन्दीको कर्मचारी नियुक्तिमा मनोमानी गरेको खुलेको हो ।

गत भदौ १३ गते लिइएको परीक्षामा प्रधानाध्यापक पौडेलले आफू निकट परीक्षार्थीलाई व्यक्तिगत ढंगबाट लेखापालमा नियुक्ति गरेको भन्दै परीक्षार्थी र सरोकारवालाबाट चर्को असन्तुष्टि भएको हो । पुरानै पाठ्यक्रम अनुरुप नै परीक्षाको तयारी गरेपनि प्रधानाध्यापक पौडेलले आफू अनुकुल एनआईसी एसिया बैंक बैकुण्ठे शाखाका कर्मचारीलाई रोस्टर राखेर पाठ्यक्रम बाहिरको प्रश्नावली बनाएको एक परीक्षार्थी स्मृति कार्कीले गुनासो गरिन् । छोटो समयमा नयाँ पाठ्यक्रम समेटिएको उक्त परीक्षामा प्रधानाध्यापकले नियुक्त गरेको रोस्टरले प्रश्नपत्रको ३४ प्रतिशत प्रश्न पाठ्यक्रमबाहिरबाट समेटेर बनाएको उनले गुनासो पोखिन् । उक्त प्रश्नापत्र पनि अंग्रेजी माध्यमबाट बनाइएको परीक्षार्थीको गुनासो छ ।

परीक्षा सञ्चालन गराउन प्रधानाध्यापक पौडेलले रोस्टरमा विद्यालयकै शिक्षक टंकप्रसाद घिमिरेलाई प्रस्ताव गरेका थिए । तर परीक्षाको मिति नजिकिने बेला प्रधानाध्यापक पौडेलले आफू निकट रविना बस्नेतलाई कर्मचारी नियुक्ति गराउन आग्रह गरे । घिमिरेले परीक्षा प्रणाली मर्यादित गर्नुपर्छ भनेपछि प्रधानाध्यापक पौडेलले आफू अनुकुल बैंकका कर्मचारीलाई तत्काल रोस्टर बनाएका थिए । ६ जना सहभागी परीक्षालाई वैधानिकता र मर्यादित बनाउने किसिमको परीक्षा प्रणाली नभएको उनले बताए । घिमिरेका अनुसार निकट रहेका व्यक्तिलाई नै नियुक्ति गर्ने टुंगो नभएपछि एउटै विद्यालयको शिक्षकलाई रोस्टर राख्दा विवाद हुन्छ भनी भन्न लगाइ घिमिरेको ठाउँमा बैंकका कर्मचारीलाई रोस्टर बनाइएको थियो ।

यता प्रधानाध्यापक पौडेलले कर्मचारी नियुक्तिको सबै परीक्षा प्रणाली पारदर्शी भएको बताएका छन् । गाउँपालिकाका शिक्षा शाखा प्रमुख श्रीप्रसाद ढकाल, शिक्षा समन्वय इकाइ भोजपुरका प्रतिनिधि, गाउँपालिकाका कर्मचारीको प्रत्यक्ष निरीक्षणमा परीक्षा सञ्चालन गरिएको उनले बताए । प्रधानाध्यापक पौडेलका अनुसार रोस्टरमा नियुक्ति गरिएका ती बैंकका कर्मचारीलाई कोडिङ गरेरै परीक्षा गराउन पठाएको बताए ।

विद्यालय व्यवस्थापन समितिको निर्णय अनुसार नै गत २०७६ पुस १८ गते पाठ्यक्रमसहित कर्मचारी नियुक्तिको विज्ञापन खुलाइएको थियो । परीक्षाबाट उतीर्ण गराइएका बस्नेतलाई प्रधानाध्यापक पौडेलले विद्यालय व्यवस्थापन समितिको बैठक नै नबसी नियुक्ति दिएको पनि खुल्न आएको छ ।

प्रकाशित : भाद्र १६, २०७७ १७:०७
पूरा पढ्नुहोस्
प्रतिक्रिया
पठाउनुहोस्
×