१५ दिनका लागि भोजपुर प्रवेशका नाकाहरु सिल- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

१५ दिनका लागि भोजपुर प्रवेशका नाकाहरु सिल

एलिसा श्रेष्ठ

भोजपुर — कोरोना भाइरस संक्रमणको जोखिम बढ्दै गएपछि भोजपुरका सबै सीमा नाका सिल गरिएको छ ।

संक्रमणको जोखिम न्यूनिकरण गर्न जिल्ला प्रवेश गर्ने सबै नाकाहरु १५ दिनका लागि सिल गरिएको स्थानीय प्रशासनले जनाएको छ ।

प्रमुख जिल्ला अधिकारी वसन्तराज पुरीले छिमेकी जिल्लाहरुमा कोरोना संक्रमण तीव्र रुपमा बढिरहेकाले सबै सीमा नाकाको सुरक्षा व्यवस्थालाई कडाइ गरिएको बताएका छन् ।

यस्तै, जिल्लाभर सञ्चालनमा रहेका साना ठूला सबै होटल बन्द गर्ने र जिल्ला प्रवेश गर्ने सबै सवारी साधनहरुलाई नाकामा निर्मलिकरण गर्ने निर्णय भएको प्रजिअ पुरीले बताए ।

जिल्ला संकट व्यवस्थापन समितिको बैठकले भोजपुर नगरपालिका ६ देउरालीमा रहेको क्वारेन्टाइन स्थलमा २० बेड, पर्यटन सूचना केन्द्र टक्सारमा १६ बेड, जिल्ला अस्पतालमा १० बेड र अस्पतालको कुरुवा घरमा १४ बेड क्षमताको आइसोलेसन वार्ड बनाउने निर्णय गरेको छ । बैठकले जिल्लाका प्रत्येक स्थानीय तहका स्वास्थ्य केन्द्रमा पाँच ओटा अक्सिजन सिलिण्डरसहितको उपचार व्यवस्था मिलाउने निर्णय पनि गरेको छ ।

भोजपुरमा गत वैशाख ११ गते हतुवागढी गाउँपालिकाका १ जना, जेठ २३ गते षडानन्द नगरपालिकाका ५ जनामा कोरोना पुष्टि भएको थियो । भदौ २ गते विराटनगरबाट सरुवा भई भोजपुर आएका ३ प्रहरीमा पनि कोरोना पुष्टि भएको थियो।

प्रशासनले भोजपुर सदरमुकाम र आसपासका मुख्य बजार क्षेत्रमा मास्क प्रयोगलाई अनिवार्य गरेको छ । जोखिम बढेकाले बाटोमा हिंड्ने सर्वसाधरणले मास्क नलगाएको भेटिए न्यूनतम एक सय रुपैयाँ जरिवाना लगाउने निर्णय भएको प्रजिअ पुरीले बताए ।

प्रकाशित : भाद्र १०, २०७७ १५:२६
प्रतिक्रिया
पठाउनुहोस्

लुम्बिनी प्रादेशिक अस्पतालका थप तीन जनामा कोरोना संक्रमण

सन्जु पौडेल

तिलोत्तमा — बुटवलस्थित लुम्बिनी प्रादेशिक अस्पतालका थप तीन जनामा कोरोना संक्रमण पुष्टि भएको छ ।योसँगै अस्पतालभित्रैका स्वास्थ्यकर्मी र कर्मचारी संक्रमितको संख्या १४ पुगेको छ ।

फाइल तस्बिर

अस्पतालका सूचना अधिकारी डा. विष्णु गौतमका अनुसार बुधबार बिहान अस्पतालको प्रशासन शाखामा कार्यरत ३ जनामा संक्रमण पुष्टि भएको हो । कोरोना पुष्टि भएका तीनै जना सेल्फ आइसोलेसनमा बसेको गौतमले बताए । यसअघि संक्रमण भएका अन्यम ध्ये केही निको भइसकेका छन् भने केही सेल्फ आइसोलेसनमै छन् ।

अस्पतालका स्वास्थ्यकर्मी र कर्मचारीमा संक्रमण देखिएपछि काम गर्ने समय तालिकामा परिवर्तन आएको डा. गौतमले जनाए । यसअघि ६ घण्टामा सिफ्ट परिवर्तन हुने गरेकामा अहिले एउटै कर्मचारीले १२ घण्टा काम गरिरहेका छन् । अस्पतालका संक्रमितमध्ये ९ जना स्वास्थ्यकर्मी हुन् भने ५ जना प्रशासनका कर्मचारी हुन् ।

स्वास्थ्यकर्मी र कर्मचारीमा संक्रमण देखिदै गएपछि अस्पतालका मेडिकल सुपरिटेन्डेन्ट डा. राजेन्द्र खनाल सेल्फ आइसोलेसनमा बसेका छन् ।

प्रकाशित : भाद्र १०, २०७७ १५:११
पूरा पढ्नुहोस्
प्रतिक्रिया
पठाउनुहोस्
×