विराटनगर महानगरमा थपिए २९ जना कोरोना संक्रमित
मोरङ — विराटनगर महानगरपालिकामा शुक्रबार २९ जना नयाँ कोरोना संक्रमित थपिएका छन् । जसमा १३ महिला र १६ जना पुरुष हुन् । महानगरमा संक्रमितको संख्या ७ सय ७४ पुगेको छ । जसमा १ सय ६७ जना निको भएर घर फर्किइसकेका छन् भने ९ जना संक्रमितको मृत्यु भएको छ ।
शुक्रबार संक्रमित भएकासहित ३ सय ६० जना संक्रमित आइसोलेसनमा शय्या अभावमा घरमै बस्न बाध्य छन् । प्रदेश १ मा शुक्रबार ९० जना कोरोना संक्रमित थपिएका छन् । मोरङमा ४४, सुनसरीमा २९, झापामा ७, इलाममा ४, पाँथर र उदयपुरमा १/१ जना र प्रदेश २ का ४ जनामा संक्रमण पुष्टि भएको सामाजिक विकास मन्त्रालयले जनाएको छ ।
यस प्रदेशमा हालसम्ममा संक्रमितको संख्या २ हजार ४ सय ८७ पुगेको छ । जसमा १ हजार २ सय २५ जना निको भएर घर फर्किसकेका छन् भने १४ जना संक्रमितको मृत्यु भइसकेको छ । यस प्रदेशमा हालसम्ममा ७५ हजार ६ सय १९ जनाको पीसीआर परीक्षण गरिएको मन्त्रालयले जनाएको छ ।