ज्यान मुद्दाका फरार प्रतिवादी १७ वर्षपछि पक्राउ- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

ज्यान मुद्दाका फरार प्रतिवादी १७ वर्षपछि पक्राउ

अर्जुन राजवंशी

बिर्तामोड — ज्यान मुद्दाका फरार प्रतिवादी १७ वर्षपछि पक्राउ परेका छन् । पक्राउ पर्नेमा हल्दिबारी गाउँपालिकाको जलथल निवासी दुर्गाबहादुर मगर छन् । ०६० कात्तिक ३० गते जलथलमा पाहुना आएका झापा गाउँपालिका ४ का बिरिकलाल माझीको कुटपिटका कारण मृत्यु भएको थियो ।

उनी जलथलमा रहेकी छोरीको घरमा पाहुना आएकी थिइन् । पाहुना आएका माझीलाई स्थानीय दुर्गाबहादुर मगर, खेम फुयालसहित ३/४ जनाको समूहले कुटपिट गरेका थिए । कुटपिटका कारण गम्भीर चोट लागेका माझीको भद्रपुरस्थित मेची अस्पतालमा उपचारका क्रममा घटना भएको ४ दिनपछि मंसिर ४ गते मृत्यु भएको थियो ।

घटनालगत्तै कुटपिटमा संलग्न सबै व्यक्ति फरार भएका थिए । जिल्ला प्रहरी कार्यालयले गत वैशाख ३० गते जिल्ला अदालतबाट पक्राउ अनुमति लिई मगरसहितका फरार व्यक्तिहरुको खोजी तीव्र पारेको थियो । जिल्ला प्रहरीका प्रहरी निरीक्षक साकारराज पन्तको टोलीले बिहीबार मेचीनगर नगरपालिका १२ सहरेडाँगीस्थित आफन्तको घरमा लुकेर बसेको अवस्थामा मगरलाई पक्राउ गरिएको एसपी कृष्णप्रसाद कोइरालाले जानकारी दिए । घटनामा संलग्न अन्य व्यक्तिहरु अझै फरार रहेकोले उनीहरुको खोजी कार्य जारी रहेको उनले बताए ।

पक्राउ परेका मगरमाथि शुक्रबार जिल्ला अदालतबाट ५ दिनको म्याद थप गरी अनुसन्धान गरिरहेको उनले बताए ।

प्रकाशित : श्रावण २३, २०७७ १७:५७
प्रतिक्रिया
पठाउनुहोस्

श्रीलंकाका समकक्षी राजपाक्षलाई प्रधानमन्त्री ओलीको बधाई 

कान्तिपुर संवाददाता

काठमाडौँ — प्रधानमन्त्री केपी शर्मा ओलीले श्रीलंकाका प्रधानमन्त्री महिन्दा राजपाक्षलाई उनको श्रीलंकन पिपुल्स पार्टी (एसएलपीपी) ले शुक्रबार सम्पन्न निर्वाचनमा पाएको सफलतालाई लिएर बधाई दिएका छन् । ओलीले शुक्रबार राजपाक्षलाई टेलिफोन गर्दै नेपाल सरकार र नेकपाको तर्फबाट बधाई दिएका हुन् । ओलीले राजपाक्षको कार्यकालको लागि पनि शुभकामना दिए । 

राजपाक्षको एसएलपीपीले संसदको २२५ सिटको मध्ये १४५ सिट जितेको थियो भने थप ५ सिट एसएलपीपीकै गठबन्धनमा रहेको पार्टीहरुले हात पारेका छन् ।

दुई प्रधानमन्त्रीले नेपाल र श्रीलंका बीचको सम्बन्धलाई आगामी दिनमा थप मजबुद बनाउँदै जाने विषयमा कुरा गरेकाे परराष्ट्र मन्त्रालयले विज्ञप्तिमार्फत् जनाएको छ ।

दुई प्रधानमन्त्रीले आ–आफ्नो मुलुकमा कोभिड–१९ को संक्रमणविरुद्ध लड्नको लागि भइरहेको राष्ट्रिय अनुभवको आदान–प्रदान गरेका थिए । उनीहरुले कोरोना भाइरस संक्रमण सकिएपछि एक आपसमा उच्चस्तरीय भ्रमण गर्ने सम्बन्धमा पनि कुरा भएको थियो । परराष्ट्र मन्त्रालयका अनुसार संवादको क्रममा ओलीले नेपालमा सन् २०१५ मा गएको भूकम्पपछि श्रीलंकाले दुई सांस्कृति क्षेत्रको पुननिर्माण गरेको सहयोगलाई लिएर राजपाक्षलाई धन्यवाद दिएका थिए ।

यस्तै राजपाक्षले प्रधानमन्त्री ओलीलाई टेलिफोन गरी बधाई दिएकाेमा धन्यवाद भन्दै नेपाल भ्रमणको निम्तो दिएकाे ट्वीट लेखेका छन् ।


प्रकाशित : श्रावण २३, २०७७ १७:३५
पूरा पढ्नुहोस्
प्रतिक्रिया
पठाउनुहोस्
×