सशस्त्र‍ प्रहरीको प्रदेश १ गणमा थप १६ जनामा कोरोना संक्रमण- प्रदेश १ - कान्तिपुर समाचार

सशस्त्र‍ प्रहरीको प्रदेश १ गणमा थप १६ जनामा कोरोना संक्रमण

विप्लव भट्टराईं

इलाम — इलाममा रहेको सशस्त्र प्रहरी बल प्रदेश १ गणमा बिहीबार थप १६ जनामा कोरोना संक्रमण देखिएको छ । सबै संक्रमितलाई उपचारका लागि गोठगाउँ पठाइएको छ । उक्त गणमा हालसम्म कोरोना संक्रमितको संख्या ४३ पुगेको छ । 

गणमा साउन १७ गते १७ जना, साउन १६ गते ५ र ११ गते ५ जनाको नतिजा पोजीटिभ आएको थियो ।

पछिल्लो पटक रिपोर्ट पठाएका ६० मध्ये १६ जना एपिएफको मात्र नतिजा पोजिटिभ आएको हो । परीक्षणका लागि एपीएफका ३८ जनाको स्वाब पठाइएको थियो । स्वास्थ्य कार्यालयका कोरोना फोकल पर्सन बिमल बरालले सशस्त्रमा समूहगत रुपमा कोरोना फैलिएपछि नजिकैको शिक्षा, मालपोत कार्यालय, नापीलगायत बन्द रहेको बताए ।

स्थानीय बासिन्दामा कोरोना फैलिने त्रास बढेको छ । बाक्लो बस्ती भएकाले कोरोना फैलिएको हुन सक्ने भन्दै जतिसक्दो चाँडो परीक्षण गर्न स्थानीयले माग गरेका छन् । इलाममा बिहीबारसम्म संक्रमितको संख्या ७६ पुगेको छ । जिल्लामा २ हजार ५७१ जनाको परीक्षण गरिएकोमा ४७ जनाको रिपोर्ट आउन बाँकी छ । संक्रमितमध्ये ३२ जना निको भएर घर फर्किएका छन् ।


प्रकाशित : श्रावण २२, २०७७ १५:५२
प्रतिक्रिया
पठाउनुहोस्

वीरगन्जको कोरोना अस्पतालमा एकको मृत्यु, पीसीआर रिपोर्ट आउन बाँकी

भूषण यादव

वीरगन्ज — नारायणी अस्थायी कोरोना अस्पतालमा उपचारको क्रममा वीरगन्जका एक ५७ वर्षीय व्यवसायीको मृत्यु भएको छ । बुधबार साँझ ती व्यवसायीको स्वाब संकलन गरिएपनि हालसम्म रिपोर्ट आइसकेको छैन् । 

कोरोना अस्पतालका संयोजक डा. उदय नारायण सिंहका अनुसार पुराना मुटुरोगी ती व्यवसायी पछिल्लो समय निमोनिया र श्वासप्रश्वासको समस्या लिएर मंगलबार अस्पताल आएका थिए ।

‘उपचारकै क्रममा बुधबार राति करिब १० बजेको समयमा स्वास्थ्य बिग्रिएपछि उनलाई भेन्टिलेटरमा राखिएको थियो,’ डा.सिंहले भने, ‘बिहीबार बिहान साढे ८ बजेको समयमा उनको मृत्यु भयो ।’ वीरगन्ज घन्टाघर निवासी ५७ वर्षीय व्यवसायीलाई स्वास प्रश्वासमा समस्या आएपछि मंगलबार दिउँसो परिवारले कोरोना अस्पताल पुर्‍याएका थिए ।


प्रकाशित : श्रावण २२, २०७७ १५:२७
पूरा पढ्नुहोस्
प्रतिक्रिया
पठाउनुहोस्
×