कोसी अस्पतालको ओपीडी पुन: सञ्‍चालन- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

कोसी अस्पतालको ओपीडी पुन: सञ्‍चालन

जितेन्द्र साह

विराटनगर — चार दिनदेखि बन्द विराटनगरस्थित कोसी अस्पतालको बहिरंग सेवा (ओपीडी) मंगलबारदेखि पुन: सञ्चालन भएको छ । स्वास्थ्यकर्मी संक्रमित हुन थालेपछि अस्पताल व्यवस्थापनले बिहीबारदेखि अनिश्चितकालकालागि ओपीडी बन्द गरेको थियो ।

स्वाब परीक्षणपछि आएको रिपोर्टमा ओपीडीका थप स्वास्थ्यकर्मीमा संक्रमण नदेखिएकोले बन्द सेवा पुन: सञ्चालन गरिएको अस्पतालका मेडिकल सुपरिन्टेन्डेन्ट (मेसु) डा. चुमनलाल दासले बताए ।

‘लकडाउनले यातायात बन्द रहेकाले सेवाग्राही त पक्कै पनि कमै आउलान्, त्यही पनि सरकारी अस्पतालको ओपीडी हो, लामो समयसम्म बन्द राख्दा आम नागरिक समुदायलाई मर्का पर्छ,’ उनले भने । कर्मचारी र स्वास्थ्यकर्मी संक्रमित हुन थालेपछि विराटनगरका अन्य प्राइभेट अस्पताल पनि बन्द भएकाले बिरामीले उपचार पाउन कठिन भइरहेको उनले बताए ।

गत शुक्रबारदेखि मंगलबारसम्म कोसी अस्पतालमा कोरोना संक्रमित स्वास्थ्यकर्मीसम्मको संख्या ११ पुगेको सूचना अधिकारी विष्णु बुढाथोकीले बताए । संक्रमित हुनेमा एक चिकित्सक, ६ नर्स र ४ सहयोगी कर्मचारी छन् ।

कोसी अस्पतालमा चिकित्सकसहित पाँच सय स्वास्थ्यकर्मी कार्यरत छन् भने सामान्य दिनमा औसत दिनहुँ १ हजार २ सय सेवाग्राही आउने गरेको अस्पतालले जनाएको छ । लकडाउन नभएको बेला ओपीडी खुल्ला हुँदा अहिलेको यो विषम परिस्थिति र खेतीपातीको समयमा समेत दिनहुँ ६ सय सेवाग्राहीसम्म आएको अस्पतालले जनाएको छ । ‘लकडाउन भएकाले कमै सेवाग्राही आउँछन् तर आउने जतिलाई सेवा दिन्छौं,’ उनले भने ।

शुक्रबारसम्म संक्रमण पुष्टि भएकाको प्रत्यक्ष सम्पर्कमा आएका १ सय ८४ जनाको स्वाब संकलन गरिएको र सबैको रिपोर्ट आइसकेको अस्पतालका डा. दासले बताए । उनले अस्पतालका अन्य विभागका संक्रमित र उनीहरुको सम्पर्कमा आएकाको स्वाब परीक्षण र क्वारेन्टाइनमा राख्ने क्रम अझै जारी रहेको बताए ।

संक्रमित सबैको कोभिड–१९ अस्पतालमा उपचार भइरहेको र अहिलेसम्म ३७ स्वास्थ्यकर्मी र कर्मचारी क्वारेन्टाइनमा रहेको उनले बताए ।

काठमाडौंको औषधि व्यवस्था विभागबाट यो अस्पतालमा सरुवा भएर आएका एक चिकित्सकमा गत शुक्रबार र उनको सम्पर्कमा आएका प्रसूतिका अर्का एक नर्समा गत सोमबार कोभिड–१९ को संक्रमणको पुष्टि भएको थियो । यसपछि विभिन्न चरणमा संकलन गरिएको स्वाब परीक्षणको रिपोर्टमा अस्पतालका संक्रमित हुने कर्मचारीको संख्या थपिएको थियो ।

‘अहिले सम्मको विश्लेषणमा हाम्रै एक चिकित्सक र यो अस्पताल बाहेक आंशिक रुपमा विराट नर्सिङ होममा कार्यरत एक स्टाफ नर्सबाट फैलिएको देखिन्छ,’ डा.दासले भने, ‘सेवाग्राहीबाट चिकित्सक, स्वास्थ्यकर्मी र प्रशासनिक कर्मचारी संक्रमित भएको देखिएको छैन ।’

कोरोना भाइरसबाट उक्त नर्सिङ होमका सञ्चालक डा.ज्ञानेन्द्रमान सिंह कार्की संक्रमित भएको पुष्टि भएपछि उनको सम्पर्कमा आएकाको पनि स्वाब परीक्षण भएको थियो । थप परीक्षणपछि आएको रिपोर्टमा कोसीकै एक नर्समा समेत संक्रमणको पुष्टि भएको थियो ।

प्रकाशित : श्रावण २०, २०७७ १२:२१
प्रतिक्रिया
पठाउनुहोस्

प्लाज्मा थेरापीको प्रभावकारिता अध्ययनका लागि सरकारले तोक्यो १२ अस्पताल

कान्तिपुर संवाददाता

काठमाडौँ — स्वास्थ्य तथा जनसंख्या मन्त्रालयले कन्भालेसेन्ट प्लाज्मा थेरापी विधिको परिक्षणका लागि १२ वटा अस्पताल तोकेको छ । कोरोना संक्रमितको परीक्षणका लागि सरकारले तीनवटा निजी अस्पताल र ९ वटा सरकारी अस्पताल तोकेको हो ।

निजीमा नेपाल मेडिसिटी अस्पताल , ह्याम्स अस्पताल र ग्राण्डी अस्पताल तोकिएका छन् । त्यसैगरी सरकारी अस्पतालहरुमा धुलिखेल अस्पताल, बीपी कोइराला स्वास्थ्य विज्ञान प्रतिष्ठान, त्रिवि शिक्षण अस्पताल, शुक्रराज ट्रपिकल तथा सरुवा रोग अस्पताल टेकु, कर्णाली स्वास्थ्य विज्ञान प्रतिष्ठान जुम्ला, नेपालगञ्ज मेडिकल कलेज, भक्तपुर अस्पताल, नारायणी अस्पताल, भेरी अस्पताल र सेती अस्पताल रहेका छन् ।

नेपाल स्वास्थ्य अनुसन्धान परिषदका कार्यकारी सदस्य सचिव डाक्टर प्रदीप ज्ञवालीका अनुसार प्लाजा दिने दाता कोरोना उपचारबाट निको भएको हुनुपर्ने , रक्तदान गर्नुपूर्व १४ दिन अगाडि लक्षण नदेखिएको हुनुपर्नेलगायतका प्रावधान छन् । त्यसका साथै प्लाजमा दिने व्यक्ति १८ वर्ष पूरा भएको हुनुपर्ने , अस्पताल भर्ना भइ उपचार हुनुपर्ने र स्वास्थ्य अवस्था गम्भीर भएको हुनुपर्ने बताइएको छ ।

डा. ज्ञवालीले यो अध्ययनका लागि अहिलेसम्म कोरोना जितेर घर फर्केका २५ जनाले प्लाज्मा दिन इच्छुक भएर नाम लेखाएको समेत जानकारी दिए । डा. ज्ञवालीले कोरोना संक्रमणबाट निको भएका २५ जनाले प्लाज्मा दिन इच्छुक रहेको जनाए ।

यद्यपी यो उपचार विधि पूर्ण रुपमा प्रमाणित सफल उपचार विधि भने होइन । विश्वका धेरै देशहरुमा यस बारे थप अध्ययन तथा अनुसन्धान भइरहेको छ ।

यो उपचार प्रणाली कोरोनाले निको भएका बिरामीको शरीरमा संक्रमणलाई असरहीन बनाउने एन्टिबडी विकास हुने धारणामा आधारित छ । कोरोना निको भएका बिरामीको रगतबाट प्लाज्मा निकालेर नयाँ संक्रमितको रगतमा हालेपछि त्यसबाट कोभिड भाइरसलाई समाप्त पार्न सकिन्छ ।

प्लाज्मा रगतको तरल (पहेँलो) खण्ड हो । यो रगतको कुल मात्राको करिब ५५ प्रतिशत हुन्छ । यसमा भाइरस, ब्याक्टेरियाबाट हुने संक्रमणलाई मार्ने एन्टिबडीको उच्च क्षमता हुन्छ । प्लाज्मा थेरापी रगतको प्लाज्मामा पाइने ‘एन्टिबडी’ को आधारमा शरीरमा कुनै भाइरसविरुद्ध प्रतिरोध क्षमता विकास गर्ने प्रक्रिया हो।

कुनै पनि भाइरस प्रवेश गरेपछि शरीर आफै त्यसविरुद्ध लड्न थाल्छ र त्यो भाइरस समाप्त पार्न एन्टिबडी बनाउँछ । एन्टिबडी भाइरसलाई समाप्त गर्न सफल भएपछि बिरामी पूर्ण रूपले निको हुन्छ ।

प्रकाशित : श्रावण २०, २०७७ ११:५९
पूरा पढ्नुहोस्
प्रतिक्रिया
पठाउनुहोस्
×