कान्तिपुर वेबसाईट
AdvertisementAdvertisement

झापामा खोलाले बगाउँदा एकको मृत्यु, एक बेपत्ता 

पर्वत पाेर्तेल

काँकडभिट्टा — झापामा खोलाले बगाउँदा एक जनाको मृत्यु भएको छ भने एक जना बेपत्ता छन् । 


जिल्ला प्रहरी कार्यालय झापाका अनुसार बुधवार दिउँसो २ बजे संखुवासभा घर भइ अर्जुनधारा–४ बागेडाँगीमा बसोबास गर्दै आएका ३० वर्षीय सुगम राईलाई खोलाले बगाउँदा मृत्यु भएको छ । उनी स्थानीय दहीझोडा सामुदायिक वनमा बाँसको तामा संकलन गर्न श्रीमती र साथीहरुसँग गएका थिए । तामा संकलन गरेर फर्किने क्रममा अनारमनी खोला तर्दै गर्दा उनलाई खोलाले बगाएको थियो । खोलाको गहिरो दहको भुमरीभित्र पसेका उनको घटनास्थलमै मृत्यु भएको थियो । घटनास्थल शनिश्चरे बजारबाट १५ किलोमिटर दक्षिण–पश्चिममा पर्छ ।

त्यस्तै बुधबार अपरान्ह सवा ३ बजे कन्काई खोलाको बाढीले सोही नगरपालिका–४ का अन्दाजी २७ वर्षीय कमल मुखियालाई बगाएको थियो । उनी बाढीमा बगेको दाउरा निकाल्दै खोलामा पसेका थिए । सोही क्रममा उनलाई भेलले बगाएर लगेको र हालसम्म फेल पार्न नसकिएको प्रहरीले जनाएको छ ।

वर्षा सुरु भएयता झापामा बाढी र पहिरोमा परी २० जनाको मृत्यु भइसकेको जिल्ला प्रहरी कार्यालय झापाले जनाएको छ । मृत्यु हुनेमा ८ जना बालबालिका छन् ।

प्रकाशित : श्रावण १५, २०७७ १४:४४
प्रतिक्रिया
पठाउनुहोस्

बाँकेमा आइतबारदेखि तीन दिनसम्म निषेधाज्ञा

रुपा गहतराज

नेपालगन्ज — कोरोना संक्रमण बढेपछि जिल्ला प्रशासन कार्यालय बाँकेले जिल्लाभरि आइतबारदेखि तीन दिनसम्म पुनः निषेधाज्ञा जारी गर्ने निर्णय गरेको छ । जिल्ला संकट व्यवस्थापन केन्द्रको बैठकले निषेधाज्ञा लागू गर्ने निर्णय गरेको हो ।

'एकैदिन धेरै जनामा कोरोना संक्रमण पुष्टि भएपछि आइतबारदेखि ३ दिनसम्म बाँके जिल्लाभरि पूर्णरूपमा निषेधाज्ञा जारी गर्ने निर्णय गरेका हौं' प्रमुख जिल्ला अधिकारी रामबहादुर कुरुम्बाङले भने,‘अत्यावश्यक काम बाहेक आदेश उल्लंघन गर्नेलाई पक्राउ गरिने छ ।’

जिल्लामा कोरोना भाइरसको संक्रमण व्यापक बन्दै गएको देखिएकाले संक्रमण थप फैलन नदिन तथा यसको रोकथाम, नियन्त्रण उपचार तथा व्यवस्थापनलाई प्रभावकारी बनाउन तिन दिनसम्म बाँके जिल्लाभरि निषेधाज्ञा जारी गर्ने निर्णय भएको प्रजिअ कुरुम्बाङले बताए ।

निषेधाज्ञा अवधिभर औषधि उपचार तथा अन्य अत्यावश्यक काममा बाहेक कुनै पनि व्यक्ति घरबाहिर ननिस्कने आदेश भएको उनले बताए ।

स्वास्थ्य, खानेपानी, दूध, विद्युत, दमकल, सञ्चार, फोहरमैला व्यवस्थापन, इन्धन, एम्बुलेन्स, औषधिजस्ता अति आवश्यक सेवाबाहेक अन्य सम्पूर्ण पसल, उद्योग, व्यवसाय, सेवा सञ्चालन बन्द गर्ने निर्णय भएको छ । पछिल्लो पटकको 'रेन्डम सेम्पलिङ' गर्दा ट्राभल हिस्ट्री नभएकाहरुमा कोरोना देखिएको हो ।

कन्टयाक्ट ट्रेसिङका क्रममा बिहीबार मात्र आन्तरिक राजस्व कार्यालयका ९ सहित, जिल्ला अदालत र त्रिभुनचोकको मिठाइ पसलका गरी थप ११ जना कर्मचारीमा कोरोना संक्रमण पुष्टि भएको छ । यसअघि नै दुईजनामा संक्रमण देखा परिसकेको थियो । ११ जना कर्मचारीसहित बाँकेका २७ जनामा संक्रमण पुष्टि भएको हो ।

भेरी अस्पताल, नेपालगन्जले ३६ जना कोरोना संक्रमितको विवरण सार्वजनिक गर्दा आन्तरिक राजस्व कार्यालयका ११ जना, नेपालगन्जका १६ जना, बर्दियाका ७ र दाङमा २ जना परेका हुन् ।

नेपालगन्जको वडा नम्बर ११ त्रिभुवनचोक आसपासका १३ जनामा कोरोना देखिएको छ । वडा नम्बर १०, वडा नम्बर १३ र १९ नम्बरका एक/एकजना रहेका छन् ।

आन्तरिक राजस्व कार्यालयका ११ जना कर्मचारीमध्येमा ४ जना बाँके, सुर्खेतका दुईजना, बर्दिया तथा अर्घाखाँची, कञ्चनपुर, सर्लाही र प्यूठानका एक/एक जना रहेका छन् ।

प्रकाशित : श्रावण १५, २०७७ १४:४०
पूरा पढ्नुहोस्
प्रतिक्रिया
पठाउनुहोस्
×