मोरङमा बाढी पहिरोले २१ परिवार विस्थापित

उर्लाबारी नगरपालिकास्थित वक्राहा खोला र कानेपोखरी र रंगेलीस्थित चिसाङ खोलामा आएको बाढीले डुबान हुँदा २१ विघा १७ कठ्ठाको धानबाली नष्ट भएको छ । चिसाङ खोलामा आइतबार आएको बाढीले कानेपोखरी–५ स्थित दुखीटोलमा कटान सुरु भएपछि स्थानीय ५ घर र चिङखोला नजिकको सुकुम्बासी बस्तीको २ परिवारका ३२ जना विस्थापित भएका छन् । उनीहरुलाई भौसावारी माध्यमिक विद्यालयमा सारेर सुरक्षित राखिएको कानेपोखरी–५ का वडाध्यक्ष चरण गुरुङले बताए ।

‘पूर्व–पश्चिम राजमार्गभन्दा उत्तरबाट चिसाङ खोलाले कटान गरिरहेको र त्यसलाई तत्काल रोक्न नसकिए कानेपोखरी गाउँपालिका नै बगाउने जोखिम छ,’ उनले भने, ‘उक्त कटान रोक्न एक्स्काभेटर लिएर खोलामा च्यानेलाइजेसनको तयारीमा जटेका छौं ।’ उनले वडा नम्बर २ मा समेत चिसाङ खोलाले पाण्डव र सलाङ ऋषिदेवको घर कटान गरी बगाएको बताए । उनीहरुलाई उद्धार गरी अहिले छिमेकीको घरमा राखिएको छ ।

यस्तै, तेली खोलामा आएको बाढीले उर्लाबारी–३ रामनगरचोककी तीनमाया तामाङको टिनको छाना भएको घर कटान गरी बगाएको र घरमा भएको सामग्री निकालेर उनको परिवारका सदस्यहरुलाई सुरक्षित स्थानमा लगिएको जिल्ला प्रहरी मोरङका प्रवक्ता डिएसपी मानबहादुर राईले बताए ।

यस्तै, मिक्लाजुङ गाउँपालिका–२ कुवापानी बस्ने रनकुमार राईको काठ तथा टिनको छाना भएको २ तले दुईवटा घर शनिबार राति पहिरोले पुरिएको छ । राईको परिवारका सदस्यहरु सुरक्षित रहेको डीएसपी राईले बताए ।

यस्तै, केसलीया खोलामा आएको बाढीले विराटनगर महानगर–१२ सिम्राही टोलको मुसहर बस्तिको १० घर डुबानमा परेको छ । १० वटै परिवारका सदस्यहरुलाई बखरी आधारभूत विद्यालयमा सुरक्षित सारिएको डीएसपी राईले बताए ।