मास्क नलगाई हिँड्ने खोटाङका १८० जना प्रहरीको नियन्त्रणमा  

डिल्लीराम खतिवडा

उदयपुर — खोटाङमा मास्क नलगाई हिँड्ने १ सय ८० जनालाई प्रहरीले नियन्त्रणमा लिएको छ । तीन दिनयता सदरमुकाम दित्तेल बजारसहित जिल्लाका विभिन्न क्षेत्रमा मास्क नलगाई हिँडदै गरेकालाई नियन्त्रणमा लिइएको हो । बिहीबारमात्रै १ सय ३९ जनालाई नियन्त्रणमा लिइएको जिल्ला प्रहरी कार्यालयले जनाएको छ ।


लकडाउन नियमको पालन गर्न आग्रह गरिरहँदा पनि बेवास्ता गरी मास्क नलगाई हिँडनेलाई नियन्त्रणमा लिइएको प्रहरी नायब उपरीक्षक नारायणप्रसाद चिमोरियाले बताए । ‘लडकडाउन नियमको पालन गर्दै मास्क लगाउन आग्रह गरियो,’ प्रहरी नायब उपरीक्षक चिमोरीयाले भने, ‘पटकपटक गरिएको आग्रहलाई वास्ता नगरेपछि सदरमुकाम दिक्तेल बजारलगायत जिल्लाका विभिन्न स्थानबाट निन्त्रणमा लिइएको हो ।’ नियन्त्रणमा लिइएका सर्वसाधरणलाई २/३ घण्टा राखेर कोरोना संक्रमण र त्यसले पार्ने प्रभाव, मास्कको प्रयोगबारेमा जनचेतनामूलक कार्यक्रम गरेर छोडिएको प्रहरी नायब उपरीक्षक चिमोरीयाले बताए ।

कोभिड–१९ को संक्रमण फैलिन नदिन सरकारले अत्यावश्यक काममा सवारीसाधन वा पैदल हिँड्दा अनिवार्यरूपमा मास्क लगाउने र सामाजिक दूरीलाई पालन आग्रह गरेको छ । तर सर्वसाधारणले सरकारी आग्रहलाई बेवास्ता गरेकाले पक्राउ गरी सचेतना गराएर छोडेको प्रहरी नायब उपरीक्षक चिमोरियाले बताए ।

संक्रामक रोग ऐन २०२० को दफा ३ मा संक्रमक रोग सम्बन्धी नियम उल्लंघन गरे १ सय रुपैया जरिवाना वा १ महिना कैद वा दुवै सजाय हुने व्यवस्था छ । सोही दफामा नियम पालना गराउने क्रममा काममा अवरोध पुर्‍याए ६ सय रुपैयाँ जरिवाना वा ६ महिना कैद वा दुवै सजाय हुनसक्ने व्यवस्था छ ।

प्रकाशित : असार २५, २०७७ १८:३९
प्रतिक्रिया
पठाउनुहोस्

वाग्मती प्रदेशमा विपद् व्यवस्थापन समन्वय इकाई स्थापना 

प्रताप विष्ट

हेटौंडा — विभिन्न जिल्लामा बाढीपहिरोले धनजनको क्षति पुर्‍याइरहेको बेला वाग्मती सरकार आन्तरिक मामिला तथा कानुन मन्त्रालयअन्तर्गत प्रदेश विपद व्यवस्थापन समन्वय इकाई स्थापना गरिएको छ । 

वाग्मती प्रदेश विपद व्यवस्थापन सम्बन्धमा हेटौंडामा बिहीबार सरोकारावाला निकायबीच भएको आकस्मिक बैठकले प्रदेश विपद व्यवस्थापन समन्वय इकाई स्थापनाको निर्णय गरेको हो । इकाईको संयोजकत्वमा मन्त्रालयका अधिकृत छन् ।

समन्वय इकाईमा तीनवटै सुरक्षा निकायका प्रदेशस्तरीय प्रतिनिधि, प्रदेश पत्रकार महासंघ, रेडक्रसलगायत सदस्य रहने छन् । समन्वय इकाईले बाढीपहिरोको जोखिम क्षेत्रमा रहेकाहरुलाई स्थानीय प्रशासन र पालिकाहरुसँग समन्वय गरेर स्थानान्तरण, उद्धार र राहतको समन्वय गर्ने जिम्मा पाएको छ ।

बैठकमा मध्यपृतना हेटौंडाका महासेनानी प्रकाश थापाले वाग्मती प्रदेशका सवै जिल्लाहरुमा नेपाली सेनाले विपद व्यवस्थापनको निम्ति जनशक्ति खटाएको र आवश्यक पर्ने उपकरणहरु तैनाथ गरेको जानकारी दिएका थिए । उनले विपदमा परेकाहरुको उद्धार र राहतका लागि चितवनमा मध्यपृतनाले हेलिकोप्टरसमेत राखेको जानकारी गराएका थिए । बैठकमा प्रहरी प्रहरी कार्यालय हेटौंडाका डिएसपी विज्ञान बस्नेतले विपद व्यवस्थापन गर्न प्रदेश प्रहरी कार्यालय मातहत विपद व्यवस्थापन गुल्मसमेत रहेको जानकारी गराएका थिए ।

त्यस्तै वाग्मती प्रदेश रेडक्रस शाखा अध्यक्ष भोला रुपाखेतीले प्रत्येक जिल्लामा रेडक्रसका शाखामा सय जनालाई पुग्ने गैरखाद्य सामग्री रहेको जानकारी दिएका थिए ।

प्रकाशित : असार २५, २०७७ १८:३६
पूरा पढ्नुहोस्
प्रतिक्रिया
पठाउनुहोस्
×