‘भ्रष्टाचार रोक्न सरकार उदासीन’

‘प्रदेश सरकारका विकास निर्माणलगायतका योजना तथा आयोजनामा व्यापक भ्रष्टाचार भइरहेको छ,’ नेकपाका प्रदेश सांसद राजन राईले भने, ‘तर त्यसलाई रोक्न प्रदेश सरकार उदासिन छ ।’ खानेपानी, ढल, विकास निर्माणजस्ता योजनामा प्रदेश सरकारले भ्रष्टाचार नदेखे प्रदेशसभा सदस्यहरु प्रमाण उपलब्ध गराउन तयार रहेको राईले दाबी गरे । खोटाङ्गको बञ्चरे खोला डक्बरे कुलोको काम सम्पन्न भएपनि पुनः यो वर्ष ५० लाख रूपैयाँ बजेट विनियोजन भएको भन्दै उनले काम भइसकेको योजनामा बजेट विनियोजन गर्नुले भ्रष्टाचार गर्ने नियत उजागर भएको बताए ।

सत्तारुढ दलका अर्का प्रदेशसभा सदस्य रामकुमार राईले सिँचाइ, सडक, खानेपानी जस्ता विकासे कार्यालयमा बढी भ्रष्टाचार भइरहेको बताए । प्रदेशसभा सदस्य खिनु लङ्ग्वा लिम्बुले पहाडका अधिकांश बिजुलीका पोल काठका भएका र ती मक्किइ सकेकाले तत्काल हटाएर स्टिलको पोल जडान गर्न माग गरिन् । प्रदेश सभा सदस्यहरूले लकडाउनका कारण बजारमा उपभोग्य वस्तुको अभाव भएकाले आपूर्ति व्यवस्था सहज बनाउन समेत माग गरेका छन् ।