सप्तकोसीको बहाव तीव्र, २६ ढोका खोलियो

कान्तिपुर संवाददाता

विराटनगर — सप्तकोसी नदीमा पानीको बहाव तीव्र रुपमा बढिरहेको छ । केही दिनयता भइरहेको लगातार वर्षाका कारण कोसीमा पानीको बहाव वृद्धि भएको हो । पूर्वी पहाडी जिल्लामा केही दिनयता लगातार वर्षा भइरहेको छ । तराइका जिल्लामा पनि उस्तै अवस्था छ ।

शुक्रबार मध्याह्न गरिएको मापनअनुसार कोसी ब्यारेज भएर १ लाख ७६ हजार ५ सय ८० क्युसेक पानीको बहाव थियो ।

बिहीबार करिब १ लाख १० हजार क्युसेक पानीको बहाव रहेकामा शुक्रबार वृद्धि भएको कोसी ब्यारेजस्थित नियन्त्रण कक्षले जनाएको छ ।

पानीको सतह बढ्न थालेपछि निकास दिनका लागि ब्यारेजका ५६ मध्ये २६ वटा ढोका खुला गरिएको छ ।

पानीको बहाव लगातार बढिरहेको कोसी ब्यारेजस्थित एक प्राविधिकले बताए । तत्काल कुनै खतराको अवस्था नरहेको भन्दै उनले तर सामान्य भन्दा पानीको बहाव तीव्र रुपले वृद्धि भइरहेकाले सतर्कता अपनाउनुपर्ने अवस्था रहेको जनाए ।

प्रकाशित : असार १२, २०७७ १७:११
प्रतिक्रिया
पठाउनुहोस्

समुदायमा संक्रमण फैलिएको निष्कर्षसहित गोरखाको भिमसेन थापा गाउँपालिकाको तीन गाउँ सिल

हरिराम उप्रेती

गोरखा — समुदायस्तरमा कोरोना संक्रमण फैलिएको निकर्षसहित भिमसेन थापा गाउपालिकाको तीन गाउँ सिल गरिएको छ । भिमसेन थापा गाउँपालिका–५ को रिठ्ठेपानी, वडा नम्बर ८ को महादेवटार, वडा नम्बर ६ को झिंगटे र मोहरिया पूर्ण रुपमा सिल गरिएको गाउँपालिकाले जनाएको छ । ती गाउँमा पाँचजनामा कोरोना संक्रमण पुष्टि भएपछि कन्ट्याक्ट ट्रेसिङ भइरहेको छ ।

सुरक्षा समितिको शुक्रबार बसेको बैठकले सिल भएका गाउँमा थप सुरक्षाकर्मी खटाइ लकडाउन प्रभावकारी बनाउने निर्णय समेत गरेको छ । कोरोना संक्रमणको जोखिम उच्च रहेको र कोरोनाभाइरस समुदायस्तरमा फैलिएको निष्कर्ष निकाल्दै उच्च सतर्कता अपनाएको गाउँपालिका अध्यक्ष इश्वर पाण्डेले बताए ।

कोरोना संक्रमण हुनसक्ने सम्भावित स्थानहरुमा एकसाताका लागी मानिसहरुको आवातजावात पूर्ण रुपमा बन्देज लगाइएको गाउँपालिका अध्यक्षले बताए । ‘पालिका भित्रका एक वडाबाट अर्को वडामा अत्यावश्यक अवस्था बाहेक आउजाउमा रोक लगाएका छौँ,’ उनले भने । एक साताका लागी गाउँपालिका भित्रका स्वास्थ्य सेवा बाहेक सम्पूर्ण सरकारी कार्यालयबाट प्रवाह हुने सेवा पनि बन्द गरिएको उनले बताए ।

बैंक तथा वित्तिय संस्था उद्योग व्यवसाय र पसल बन्द गर्ने र खाद्यान्न तरकारी फलफुल दुग्ध जन्य पदार्थ विक्रि गर्ने पसल बिहान ६ देखि १० बजेसम्म मात्र संचालन गर्ने गरी समयसिमा तोकिएको छ ।

समाजमा जुवातास खेल्ने हुलहुज्जत तथा समुह बनाइ हिँड्‌डुल गर्ने कार्यलाई पूर्ण रुपमा निषेध गरिएको गाउँपालिकाले जनाएको छ ।

उत्त गाउँपालिकामा कोरोना संक्रमितको संख्या २६ पुगेको छ । ती मध्ये चारजना संक्रमित निको भएर घर फर्किएका छन् । ‘समुदायस्तरका पाँचजनामा कोरोना संक्रमण पुष्टि भएपछि कन्ट्याक्ट ट्रेसिङको काम पनि भइरहेको छ,’ गाउँपालिकाका स्वास्थ्य शाखा प्रमुख भेषराज खनालले भने ।

प्रकाशित : असार १२, २०७७ १७:०६
पूरा पढ्नुहोस्
प्रतिक्रिया
पठाउनुहोस्
×